erkama kristaana
3
1 orrat dahenn ikkim peashisampayyaanne hayyotass dippatumun acacaminanenne iyyaan erkamaan dikk dahenn erkasa dikkisad koddinanenne
2 ikkim nam shokkooh naf qari iyaan nayq ishaama diinninan qaapusiyy;
sed kapeeshsh iyyaan nam olle jiiayta dapenne iyyaan didikkanne iyyaan dippatum shaakket nam heikketi akkinniyy koddenii.
3 innonno sed tureeshsh iyyaan qalliqaapattaanne acacama diinniyyanne paana patin dapiyyanne iyyaan hadatane naala soha hin hawhawi kikkiyyi piddamenne,
nayquntanne toqaytilan kallaanniyyanne,
ollin jiixiyyanne orqarhittinniyy kida.
4 hekoddu male helpaan dikkuntanne hoxsunt Mooha heka qoricaaynu akkaatte,
5 erkama tsilluma hin innu erkannin kodda male,
innu mutsuroottaayyenn innu diniyy;
iyyat innu diniyyenno jiqama dalatta awshittatenne oohama se laaffot miilotatin koddenn kida.
6 Moohot laaffoshayy dinnsampaytaaynu Yesus kristoos kapin puriy innu tiiq.
7 sedenno ikkimin dikkumooyyin tsillinnu kiyyat parpar se innu irraxatetin lushanninkinnu tayinnoss kida.
8 hin ishaamaan amaanam.
orr Mooha amaan ikkim erkamaan dikk erkasa kokkaanninanness ikkim sed dahenn qiminnintu qaapusinnintossin fadin.
hin iyyaan dikkanne nam heikketessenno fadusinniyy kida.
9 hekoddu male shiitta eepumatenne dalashot dihaanne tulayyaanne siitaan halitt minin deyiyy ketta sekaadu;
hin iyyaan kodda diinniyyanne awta dap kida.
10 nam reehaytetin deyiyyu et shokkonn shoke lakkin korsitu kanna ketta all sekaadu.
11 nam sedep kiyyu iyy nayqanne juppampayt kida.
iyyat nam horat iqari quur koddaayy ufunaadu.
korsa muutayta
12 oot antu helpa kashan niiqobiliya tarpisa kutad maalla,
etin artsimaas shoke tikiqoos hed kapop hito,
att ullop an kapop shakar kid deyyii.
13 semaas se halitt uponne abiloosess iyaan paanaadu iyyaa fadosinniyy qara qojisa male qarqaarii.
14 orraaynonno lamm qunda male allhata tura ikkim rakkot kallat orr qara tuqquura fottinan erkamaan dikk erkasa kollenii.
15 orr an olle kiyyu dahenn paanussa hed qara hitin;
moyshadaannu hin amaantetin innu olle kiyy dahenni paanussaannu dehayyii.
has dikk heka Mooha dahetaynin inn olle kinnaadu.