hitaym bawloos
tiitoss
1
1 an bawloos se aylet Moohaatenne nam hitaym heka Yesus kristoos kodd,
orr se moohan pahisam amaantetin kokkokkisaassenne shaakket se Mooha huura kollinnishshu ikkim ufunaanninani koda Moohot maakumusiyy kapa hitaym hitam.
2 amaantet hin it irraxatet se kiyyat parpar qari dihant kida;
Mooha eerpootta diinniyyu sapanat dihama turann irraxatet kiyyat sed innu dayy.
3 helpaan iyyat quur paene Moohot lelaayy patpahiyy.
antu lamm lel se an hark haayam ikkimin lelinos Moohot qoricaannu an acac.
4 hed tiitu se amaantet se innu ortura qafnun meetaawu shaakk koddess,
Mooha appaanne poldaaynu Yesus kristoos qoricaaynu kapa has dikkanne andot hedi koddenii.
erkama tiitu huss qertseesete
5 antu maalla qertsses hed diiyy,
hin paha diiy ikkim pahinnintossenne qum antu lamm hed acac qarass,
qimaayya maapar kristaana saparaddaalleesh ikkim maakkumusinnintos kida.
6 qimaayt maapar kristaana iyy haasutta dap,
aat shakkaah qapu,
meddooyy amaaniyanenne kiyyat nayqat shoke acacama diitta minin mahhatiddu waarama diinniyyu qapu kodda iyy fadusinnin.
7 sinkitt maapar kristaana oot erkama Mooha iyy harki haayamen maalla,
iyy haasutta dap kodda iyy fadusinnin,
settep lamm iyy fooja diinniyyu,
miiri shakar kida diinniyyu,
taarotta diinniyyu,
shiittamatta diinniyyu,
kodashshet olle hanhama diinniyyu kodda iyy fadusinnin.
8 sekapeeshsh iyy hayy qeeddanniyyu,
iyaan dikk hoxsaanniyyu,
illuushanniyu,
idikk,
imiil,
ituri tooyanniyyu koddu;
9 lamm kollilaan pah kollsan korsaassenne hin iyy shiittiy tusha ikkim fottinos,
qum iyyat koll mitt,
iyy lel se amaanamin qim koddu.
10 maana maalla,
orr acacama diinniyyanne ishaamaan awuta dap ishaamiyyanne iyyaan nam paasiyy kiyy;
karakutt iyyaan kaf orr karasam koddiyy iyyaan lek kiyy.
11 orr sed rui kidusiyyii;
maana maalla,
iyyaa paana nam deesanniyun akkan akkatta fadaann mannaa kel antan huss orqari oorin.
12 iyyaa ila himampaytaaddu ishshokku,
"orr qertsees eerpampayyaanne,
pinana naayqanne,
kardelayyaanne,
erraalet" hekid.
13 maanyetum hin shaakket kida.
semmaalla ikkim amaantet qint qafnaaninani orr sed tushii.
14 ikkim iyyaa torroot orr ayhuta kannass inxoorin illo acac orr se shaakket shiittiyyu indakayini dikkiyi tushii.
15 miilampayyaas akkanat dahenn immiil;
oshshiyyaanne orr amaana diinniyyoss lamm akkan miil shokkooh naf amm hekiyyamu,
laaddu mutsuraddonno koddo qaapaddonno hexoshshum.
16 "Mooha henxufn" kidin;
hokoddu male erkamooddonn marmiyyan;
iyyaa iyaan nam uuqiyyanne acacama diinniyyanne erkamaan dikk erkasa fotta diinniyy kida.