4
1 moohaanne poldaaynu Yesus kristoos se orr kiyyonne orr raaw qari horat quurinu turassin akkaattayyenne daamumaayyin hed korsin.
2 lel Mooha lelii,
sentu sena diittonno helpa mitt qim erkayii;
duupattan kolliyii tushii illo korsii.
3 helpaan orrat kollila pah dakayya fada diininan deyina;
sekapeeshsh oot iyyaa ishaamaan lappa qara mororoqnniy iyyaa ishamiyyan maalla,
kollisampayyaan heka hadashadu iyyaa lelina issep qapannin.
4 shaakket dakaya qara lappaadu allmitaatin,
illo torroot dakaya hoxsaannin.
5 att lamm heikk qara illushadu,
rakkot qeeddadu,
erkama lel masmasunt erkayyii,
erkamott dahenn kaysiyyii.
6 antu lamm laaqqa koddaass hendehaad;
helpa antu husslah qara reehanninu anninu hepaen.
7 adant dikkatenno henxad,
feelantawonno henkaysiyy,
amaantetawonno henlushad.
8 sed kanneeshsh qoyqoyt tsillumat dikkisam an lushin;
qoyqoyt sedenno pold se qar quura male horat quuriyyu aw sette ani daannina;
iyyat daassaminu anasseeh kodda male,
orr se akkaattaayy hoxsaanniy dahenness kida.
qaap bawloos
9 paana att fottitin shakar kida an kapop deya kokaadu.
10 temaas husslahat hoxsaad illo all an diiy,
teseloonqep aan;
qerqis kalaatiyaap aan,
tiitonno tilmaatsiyaap aan;
11 luqaseeh an olle kiyy.
oot marqoos erkama ani fadusinniyyu maalla,
kanfad indeyii.
12 tikiqoos lamm efesoonepin hit.
13 et deyishsho koporta se antu karpus kapa tsiroata diiyenne matsaafaddaannenno,
karakutt hin heka qool koddin ani deyyii.
14 iskintr hin silifa se naaset kidamiyyu shumyu ikkaaness an qar kal;
poldat qum erkamooyyatep iyy daannina.
15 iyyat hin innu ishaaminkinnu qar ikaaness all hittinine hedenno iyy qara illushadu.
16 helpa deehaawu heka turi qattaate nam shokkooh naf amm an olle hekiyyamu,
all an diiyen;
sedenno Mooha iyyaa qari diha diiyyu.
17 hekoddu male ikkim hitaym hin dahenn an kapin eeshshaminu illo orr ayhuta kodda diiy dahin dakayinaaness,
poldat an olle kinnaad illo an qiqimiy;
kap karma kelanno henpassad.
18 poldanno akkan nayq dahenn kela an dininnina;
daamum moontallettessenno an kaysinnina;
hak parparat serka iyy koddenii;
ameen.
paanussa muutayta
19 birssiqillanne aqilanne,
orr man onesforetessenno paanussaawu dehayaa.
20 erastsoos qorontoosess hat,
oot tsirofimoos baaq maalla,
miltsessin alldiiy.
21 kashanat kala turin an kapop deya kokkaadu.
ewpulusenne putesenne linosenne,
qilawitiyanne orr amaan dahenn paanussa hedi dehannin.
22 Yesus kristoos pold hed olle kiyyaadu.
has dikk heka Mooha inn olle kinnaadu.