Maammuwan ino Espiritu a Maggabwat sike Dios
4
Iddu-iddukangku a wawwayik, ammeyu kuruwan inoyera a massapit a ana sikwara yo Espiritu i Dios udde pureban diyawera abbu takesi maammuwan nu gakkurug a naggabwat sike Dios ino espiritu a ana sikwara. Se oddu a sasan-profetera a nassiwarak sito talubaggan. 2 Kunna sitaweno pemunuwan a yo Espiritu i Dios ino ana sikwara: seanya yo massapit a i Jesu Kristo e nattabali si tolay, i Dios lamang yo nanundun sikwara. 3 Anna seanya yo massapit a i Jesu Kristo e ammena neyanak a tata a tolay, bakkan yo Espiritu i Dios ino ana sikwana. Anna iyaweno espiritu na kapakwa i Kristo a nadingngag diyaw a dumatang e sitoye anen sito talubaggan. 4 Ikkayu a ibilangku a anakkuwera, naaffut diyawin ino sasan-profetera se yo Espiritu i Dios a ana sikwayu e mas makapangwa ammat sike Satanas a ana so tolayera a mangwa-angwa si maral a amme makaammu sike Dios. 5 Iyawera a sasan-profetera e manolay si amme kaangga-anggam sike Dios, antu nu nenay sapi-sapitanda e amme makapaanggam sike Dios antu yo tolayera a amme makaammu sike Dios e mangurug so sapitanda. 6 Mebilang etam sike Dios. Seanya yo makaammu sike Dios e maningngag sikwatam, udde seanya yo amme mebilang sike Dios e amme maningngag sikwatam. Kunna sitawtam a paddadaruman ino Espiritu na kagakkuruwan anna espiritu na siri.I Dios e Idduk
7 Ikkayu a iddu-iddukangku, makkaiddu-idduk etam gumafu se yo idduk e naggabwat sike Dios. Seanya yo midduk si korwan a tolayera e anak i Dios anna ammuna i Dios. 8 Seanya yo ammena midduk e ammena ammu i Dios, se i Dios e idduk. 9 Kunna sitaw yo nepaitana i Dios a idduknga sikwatam. Nedundunneno mittata a anaknga sito talubaggan takesi maindan etam si angat megafu sikwana. 10 Antuweyaw yo gakkurug a idduk, bakkan si inidduktam i Dios nu bakkan ikkanetam yo inidduknga anna nedundunneno Anaknga tapenu mesakrifisyuweno angatna takesi mapakoman ino liwa-liwattam.
11 Ikkayu a iddu-iddukangku, gumafu se iddu-iddukanna etam ingke i Dios, maawag penad a makkaiddu-idduk etam si siggatatan. 12 Awan kepay a nakaita sike Dios udde nu makkaiddu-idduk etam, i Dios e ana sikwatam anneno idduknga e awan pakkuranganna sikwatam.
13 Maammuwantam a sigigyan etam sike Dios anna ana sikwatam i Dios gumafu se neyaddana sikwatam ino Espirituna. 14 Naitami anna tinestiguwammi a dinundun i Ama ino Anaknga tapenu tabbutanna amminan a tolayera sito talubaggan. 15 Seanya yo mattakkilala a i Jesus e Anak i Dios, sigigyan i Dios sikwana anna sigigyan pay baggina sike Dios. 16 Antu ammutamun anna kinurugtam ino idduk i Dios sikwatam.
I Dios e idduk anna seanya yo manolay a ana idduknga e sigigyan sike Dios anna i Dios e sigigyan pay sikwana. 17 Na idduk i Dios sikwatam e awan pakkuranganna, antu ammetam mattalaw so Aw na Pannunut, gumafu se yo akkatoletam sito talubaggan e kakunna sike Kristo. 18 Awan pattalawan si idduk i Dios gumafu se yo idduknga a awan pakkuranganna e arinna iyaweno pattalaw. Anna seanya yo mattalaw e kanggamma sapitan a ammena napureban ino idduk i Dios a awan pakkuranganna. 19 Midduk etam se i Dios ino palungu a nidduk sikwatam. 20 Inoyera a massapit, “Iddukangku i Dios,” udde ikalussora ke yo wawwayirera si angngurug e massissiri. Seanya yo ammena midduk si wawwayirera si angngurug a maitara e amme midduk sike Dios a ammera maita. 21 Antuweyaw yo dundun a neyaddana i Kristo sikwatam: na midduk sike Dios e maawag pay a midduk si wawwayinera si angngurug.