3
Itan diyaweno dokal a idduk a neyaddana i Ama sikwatam a maayan etam a anak ira i Dios e gakkurug iyan. Na gafuna a yo bakkan a minangikkurug ira e ammera etam ammu, gumafu se ammera ammu i Dios. 2 Iddu-iddukangku a wawwayik, anaknga etamun i Dios udde ammena kepay a nepaammu nu nenay etamma so gumumwang a awera. Ammutam a nanu mannulina imman i Kristo, mekunna etamma sikwana se maitatamma nu yanyengke baggina. 3 Anna amminan a ana kunna sitaw a inanama sikwana e ammerana malliwat kakunna i Kristo a awan liwatna.4 Udde seanya yo malliwat e baggineno mattulyat si katunungan i Dios, gumafu se yo liwat e pattulyat si katunungan. 5 Ammuyu a ginumumwang i Kristo takesi arinneno liwa-liwattam anna sikwana e awan liwat. 6 Nabu, seanya yo manolay sike Kristo e ammena ibali-balin a malliwat. Nu ibali-balinda a malliwat, ammera a maintindiyan i Kristo anna ammera ammu-ammu baggina. 7 Ikkayu a ibilangku a anakkuwera, ammeyu ipabulun a ana mangilloku sikwayu. Seanya yo mangwa si fustu e matunung kakunna i Kristo a matunung. 8 Udde seanya yo malliwat e anak na diyablu a i Satanas, se i Satanas e malli-malliwat sin palunguna kepay. Na anak i Dios e ginumumwang tapenu darallanneno akakwan ira i diyablu a i Satanas. 9 Inoyera a nattabali a anak ira i Dios e ammera ibali-balin a malliwat gumafu se sigigyan sikwareno bawu a angat a naggabwat sike Dios. Anna gumafu se i Dios ino amara, ammera dama a mangibalin a malliwat. 10 Sitawtam a memunuwan nu yanya yo anak ira i Dios anna nu yanya yo anak ira na diyablu a i Satanas: seanya yo ammena mangwa si matunung anna ammena midduk si wayina e bakkan a anak i Dios.
Màiinnidduk Etam a Siggatatan
11 Antuweyaw yo tunturu a nadingngag diyaw si pefuna sin palungu a nangurug kayu a makkaiddu-idduk etam nad. 12 Ammetam nad a mekunna sike Cain a neyannung si diyablu a i Satanas. Pinateneno tan-abbing a wayina a lalaki. Saay se pinateneno wayina a lalaki? Gumafu se yo taddanera ingkepay e maral udde yo wayina e matunung. 13 Ammeyu malaggat wawwayik a yo maral a tolayera e ikalussora kayu. 14 Ammutam a gakkurug a ammetamun a manilla natay a tolayera, nattabali etam a tolayera a ana gakkurug a angatna. Seanya yo ammena midduk si wayina si angngurug e ana pena si pakapangwa na patay. 15 Amminan a makalussaw si wayina e gumappatayera anna ammuyu a yo gumappatayera e ammera manolay a bulun i Dios amu-amu. 16 Kunna sitaw yo ammutam a gakkurug a idduk a natay i Kristo tapenu matabbutna etam si akkastigu na liwat. Anna para pay sikwatam, kakunna penad yo akwantam si wawwayitam si angngurug. 17 Nu maiteno wara-wara a tolay yo wayina a makaawag e ammena iyaw a dinuffunan si kaawannera, masapittam kad a iddukanna i Dios?
18 Ikkayu a ibilangku a anakkuwera, ammetam midduk si sapit lamang udde ipaitatam yo gakkurug a idduktam megafu si mapiya a taddatam ira.
Masinak a Nakam anna Sigigyan sike Dios
19 Anna megafu sitaw, maammuwantamma a meyannung etam si kagakkuruwan anna makkonfiyansa etamma so allangan i Dios. 20 Maski nu konsensiyanna etam yo nakamtam, mas kaatannangan i Dios ammat si konsensiyatam anna ammuna amminan. 21 Iddu-iddukangku a wawwayik, nu amme etam a konsensiyan ino nakamtam, makaaranni etam sike Dios a masinak yo nakamtam. 22 Maarasotam sikwana nu nenay arangngantam gumafu se makimoray etam so dundunnera anna akwantam ino makapaanggam sikwana.
23 Antuweyaw yo dundunna a mangurug etam nad sike Anaknga a i Jesu Kristo anna makkaiddu-idduk etam kakunna yo nedundunna sikwatam. 24 Amminan a makimoray si dundun ira i Dios e sigigyan sike Dios anna sigigyan i Dios sikwara. Anna maammuwantam a sigigyan baggina sikwatam megafu si Espiritu a neyaddana sikwatam.