I Kristo ino Mangitaddag Sikwatam sike Dios
2
Ikkayu a ibilangku a anakkuwera, iturakku iyawera sikwayu takesi amme kayuna malliwat. Udde nu wara makaliwat, ana i Jesu Kristo a matunung anna mangitaddag so allangan i Dios para sikwatam anna arangnganna sikwana a pakomanna etam. 2 I Kristo yo nesakrifisyu takesi mapakoman ino liwa-liwattam bakkan lamang para sikwatam kunsi kunnapay so liwa-liwat na amminan a tolayera si interu a talubaggan.3 Siguradu etam a ammutam i Dios nu makimoray etam so dundunnera. 4 Seanya yo massapit, “Ammuk i Dios,” udde ammena makimoray so dundunnera e masiri baggina anna awan sikwaneno kagakkuruwan. 5 Udde yo makimoray si sapit i Dios e gakkurug a midduk sikwana. Megafu sitaw, siguradu etam a meyannung etam sike Dios: 6 seanya yo massapit a sigigyan baggina sike Dios, maawag a manolay baggina a kakunna i Jesu Kristo.
Na Bawu a Dundun
7 Iddu-iddukangku a wawwayik, bakkan a bawu a dundun yo iturakku sikwayu udde dati a dundun a anen sikwayu sin pefuna kepay. Iyaw a dadan a dundun a makkaiddu-idduk e antu yo mensahe a nadingngag diyaw sinoy. 8 Udde mebilang iyaw a bawu. Neyakkatolay i Jesus ino kagakkuruwanna iyaw a dundun anna iyakkatoleyu pay gumafu se ibali-balin diyaw a mibbat a mangwa si maral kakunna yo pibbat a manolay si kalammukan a maawa-awan. Imbes, mangwa kayu si mapiya kakunna yo manolay si gakkurug a sirwat a mabaggawin. 9 Seanya yo massapit, “Manolayak a awan liwatku kakunna yo manolay si baggaw,” udde ikalussawna yo wayina si angngurug e kakunna keppay a manolay si maral kakunna yo manolay si kalammukan. 10 Seanya yo midduk si wawwayinera e kakunna yo manolay si baggaw anna bakkan baggineno pakegafuwan ino korwan ira a malliwat. 11 Udde seanya yo makalussaw si wawwayinera si angngurug e kakunna yo manolay si kalammukan anna ammena ammu nu sintaw anganna gumafu se yo kalammukan ino nappabulag sikwana.
12 Matturakak sikwayu a ibilangku a anakkuwera,
gumafu se napakoman ino liwat-liwat diyaw megafu sike Kristo.
13 Matturakak sikwayuwera a ama,
gumafu se ammuyu i Kristo a anen liye a naparatu yo talubaggan.
Matturakak sikwayu a sulteruwera anna sulterera,
gumafu se naaffut diyaw i Satanas.a
14 Sapitangku imman: matturakak sikwayu a abbing ira,
gumafu se ammuyu i Ama.
Matturakak sikwayuwera a ama,
gumafu se ammuyu i Kristo a anen baggina liye a naparatu yo talubaggan.
Matturakak sikwayu a sulteruwera anna sulterera,
gumafu se matuyag kayu
anna ibali-balin diyaw a makimoray si sapit i Dios,
anna naaffut diyaw i Satanas.
15 Ammeyu iddukan ino akkatolayeno maral a tolayera onnuweno kiya-kiyan sito talubaggan. Nu iddukan diyaweno akkatolayeno maral a tolayera, ammeyu iddukan i Ama. 16 Antuweyawera yo akkatolayeno maral a tolayera: yo maral a panggamman na baggi, maral a panggamman na matera anna pabbalagasay si wara-wara. Amminan iyawera e amme maggabwat sike Ama udde si maral a tolayera. 17 Na maral a tolayera anneno panggammandera e maawan udde inoyera a mangwa si uray i Dios e matolena a bulun i Dios amu-amu.
Palanán so Inoyera a Kapakwera i Kristo
18 Ikkayu a ibilangku a anakkuwera, antuweyawin yo panguddi a parte na tiyempu liye mannuli i Jesus. Nadingngag diyaw a yo kapakwa i Kristo e gumumwang, antu sitoye oddu a kapakwera i Kristo yo gumumwang. Nabu, ammutam a antuweyaw yo panguddi a parte na tiyempu liye mannuli i Jesus. 19 Maski nu dati a bafuluntam ira, inay a tolayera e ammetam a gakkurug a bulun. Inanawanda etam udde ammera meyannung sikwatam. Se nu neyannung ira sikwatam, sigigyan ira nad sikwatam. Udde si panora, mepaita a awan sikwara a meyannung sikwatam. 20 Udde dengke sikwayu, neyadden sikwayuweno Espiritu i Dios a neyaddana i Kristob sikwayu anna gumafu sitaw, ammuyun ino kagakkuruwan. 21 Matturakak sikwayu bakkan a gumafu se ammeyu ammuweno kagakkuruwan udde gumafu se ammuyu iyaw anna ammuyu a awan siri a maggabwat si kagakkuruwan. 22 Yanya yo masiri? Baggineno tolay a iyambafagnga a i Jesus e i Kristo.c Seanya yo massapit sitaw e antu yo kapakwa i Kristo, ammera kuruwan ino Ama anneno Anak. 23 Awan a tolay a iyambafagngeno Anak e makisittata sike Dios a Ama. Na tolay a mattakkilala a i Jesus e Anak i Dios, makisittata pay baggina sike Ama. 24 Maawag a manolay kayu meantu si kagakkuruwan a nadingngag diyaw sin pefuna. Nu ibali-balin diyaw a akwan iyaw, sigigyan kayuna a makibulun sike Anak anna sike Ama. 25 Anna antuweyaw yo netambana sikwatam a manolay a bulun i Dios amu-amu
26 Iturakku iyawera a kiya-kiyan takesi palanán takayu patamu so manggam a mangilloku sikwayu. 27 Udde dengke sikwayu, yo Espiritu i Dios a neyaddana i Kristo sikwayu e sigigyan sikwayu, antu ammeyu maawag a ana manunturu sikwayu nu nenay a gakkurug. Se yo Espirituneno manunturuna sikwayu si amminan a kiya-kiyan a maawag a maammuwan diyaw, anneno itunturuna e gakkurug, bakkan a siri. Anna kakunna yo panunturu na Espiritu sikwayu, sigigyan kayu sike Kristo.
28 Anna sitoye, ikkayu a ibilangku a anakkuwera, sigigyan kayu sikwana takesi nanu mannuli baggina, anana konfiyansatam anna ammetam meyatatal so allanganna so paggumuwangnga.
Anak ira i Dios
29 Makiyad sin ammuyu a matunung i Kristo, siguradu kayu a seanya yo mangwa si matunung e anak i Dios.