Na Palungu a Turak i
Juan
Na Sapit a Mangadda si Angat
1
Ikkanak i Juan a mattura-turak sikwayu meafu sikwana a mamefu kepay sin palunguna e naparatuwen ino talubaggan, Baggineno Sapita na Dios a mangadda si angat a awan pakiyaranna. Baggineno nadingngagmi, ikkami a apostol ira. Naitami baggina! Ikkami ingkepay e namunnakammi anna naiggammammi baggina. 2 Dengke sikwana a yo paggabwatan na angat, inang baggina sito talubaggan anna naitami baggina, anna sitoye taddammi anna ibalaggomi sikwayu a baggineno angat a awan pakiyaranna. Ana baggina sike Ama anna nepaammu baggina sikwatam. 3 Ibalaggomi sikwayuweno naitami anneno nadingngagmi takesi makibulun kayu sikwami anna gakkurug a yo pakibulummi e ana sike Ama anna sike Anaknga a i Jesu Kristo. 4 Iturakmi iyawera sikwayu takesi ammena makkurang ino anggamtam.bI Dios yo Sirwat
5 Antuweyaw yo mensahe a nadingngagmi sikwanac anna ibala-balaggomi sikwayu a i Dios e sirwat anna sikwana awan ingke kalammukan. 6 Nu kuntam a makibulun etam sike Dios udde manolay etam si kamarallan kakunna yo manolay si kalammukan, massalasiri etam anna ammetam manolay patamu si kagakkuruwan. 7 Udde nu manolay etam a awan liwat a kakunna i Dios a awan liwatna e mekunna si manolay etam si sirwat i Dios. Nu akwantam iyan, ana pakibuluntam si siggatatan anneno amminan a liwa-liwattam e linisan ino dā i Jesus a Anaknga. 8 Nu kuntam a awan liwattam, illo-illokuntam yo baggitam ingkepay anneno kagakkuruwan e awan sikwatam. 9 Udde nu sapitantam sike Dios yo liwa-liwattam, baggina a makurug anna matunung, innanamantam a pakomanna etamma anna linisanna etam si amminan a aggangwatam a ammena matunung. 10 Nu kuntam a ammetam nakaliwat, angwantam a masiri baggina anna ammayantam ino sapitna.