Affutan ino Angngurug ino Kamarallan
5
Seanya yo mangurug a i Jesus e i Kristo e anak i Dios. Anna seanya yo midduk si gagginafanna e iddukanneno anakngera. 2 Ammutam a iddukantam ino anak ira i Dios, nu iddukantam i Dios anna pakimorayantam ino dundunnera. 3 Se yo tata a gakkurug a midduk sike Dios e makimoray si dundunnera. Anna ammena madiyat a akwan ino dundunnera, 4 gumafu se seanya yo anak i Dios e affutanneno maral sito talubaggan anna mangaffut etam megafu si angngurugtam. 5 Se awan a makaaffut si kamarallan sito talubaggan nu bakkan ino mangurug a i Jesus e antu yo Anak i Dios.Na Testimonya Patamu so Anak i Dios
6 Inang i Jesu Kristo sito lubag e nabawtismuwan megafu si danum anna akkabalinna yo dāna e natturut sin natay baggina. Gakkurug a bakkan lamang yo akkebawtismuna a nangipaita a nedundun i Dios baggina kunsi kunnapay a megafu si annuturut na dāna. Anneno Espiritu i Dios e antu yo mangitaddag sitaw, se yo Espiritu i Dios e kagakkuruwan. 7 Ana tallu a mangitaddag patamu si kagakkuruwan meafu sike Jesu Kristo: 8 i Espiritu i Dios, yo akkebawtismuna si danum anneno dā si akkapatena e umannung iyawera a tallu. 9 Nu kuruwantam ino sapitan na tolayera, annanot nad a kuruwantam ino sapitan i Dios se antuweyaw yo sapitanna meafu so Anaknga. 10 Inoyera a mangurug a i Jesus ino Anak i Dios e awan pabbabang si nakamda. Udde inoyera a amme mangurug sike Dios, inangwara a siri i Dios, se ammera kinurug ino sinapit i Dios patamu si Anaknga. 11 E ammutam a gakkurug ino sinapit i Dios gumafu se inindanna etam si angat a manolay a bulunna amu-amu anna iyaw e maarasotam megafu sike Anaknga. 12 Seanya yo makitata sike Anak i Dios e matolena a bulun i Dios amu-amu udde seanya yo amme makitata sike Anak i Dios e ammenana matolay a bulun i Dios amu-amu.
Na Angat a Awan Pakiyaranna
13 Neturakku iyawera sikwayu a mangurug sike Anak i Dios takesi maammuwan diyawna a matolay kayu a bulun i Dios amu-amu.
14 Nabu, ammetam mattalaw a maddasal sike Dios se ammutam a nu marang etam si maski sanna meantu so urena e dingngagganna etam. 15 Gumafu se ammutam a dingngagganneno arangngantam, ammutam a iyaddaneno arangngantam.
16 Nu maitayu yo wawwayiyu si angngurug a malliwat a bakkan a pakesinanna sike Dios amu-amu, idasallan diyaw nad ira takesi indanderana i Dios si bawu a angat. Massapitak meafu si tolayera a yo liwat e ammena megiya si amu-amu a patay. Ana liwat a megiya si patay anna ammek sapitan a idasal diyaweno seanya a mangwa-angwa sitaw. 17 Amminan a maral a aggangwera e liwat, udde ana yo liwat a ammetam pakesinan sike Dios amu-amu.
18 Ammutam a yo anak ira i Dios e ammera ibali-balin a malliwat se tabburandera i Jesu Kristo, anna ammera dama a palowan na diyablu a i Satanas. 19 Ammutam a anaknga etam i Dios maski nu tangngallan i Satanas ino amminan a maral a tolayera. 20 Anna ammutam a ginumumwang sito lubag ino Anak i Dios e inindanna etam si pintindi takesi maammuwantam ino gakkurug a Dios. Meyannung etam so gakkurug a Dios se neyannung etam sike Jesu Kristo a Anaknga. Baggineno gakkurug a Dios anneno angat a awan pakiyaranna.
21 Ikkayu a ibilangku a anakkuwera, ammeyu maddayaw si sasan-dios ira.