Banndi Suleymaanu
10
1 Ɓiɗɗo mo hakkillo, seyo baaba,ɓiɗɗo puuyɗo, mettorgal inna.
2 Jawdi keɓiraandi oonyaare nafataa,
de fonnditaare kaa na hisina yonki neɗɗo.
3 Joomiraaɗo yoppataa ponnditiiɗo ley rafo,
de na saloo eelgal bonɓe.
4 Jaasuɗo, kam e talkaaku,
tinniiɗo, kam e jawdi.
5 Ɓiɗɗo kawrinoowo nguurey ƴaamnde wo jom caral,
de ɗaaniiɗo wakkati tayri kaa wo ɓiɗɗo cemtinoowo.
6 Barke na woni dow hoore ponnditiiɗo,
de hunnduko bonɗo na suuɗa toonya.
7 Miccitagol ponnditiiɗo wo barke,
de inɗe bonɓe kaa nyolan.
8 Jom hakkillo na jaɓa jamirooje,
ammaa mo haalaaji puuyɗi kaa halkan.
9 Jokkuɗo laaɓal yaaran ndeenaagu,
de gaɗoowo ko oonyii kaa wannginte.
10 Maƴƴinoowo yitere dow anniya bonɗo na wadda naawalla ɓernde,
mo haalaaji jaayɗi halkan.
11 Hunnduko ponnditiiɗo, ildude nguurndam,
hunnduko bonɗo, suuɗirde nyanngere.
12 Nganyaandi na ummina hamre,
de njinngu kaa, na sudda feloore fuu.
13 Hakkillo dow ɗemngal jom caral,
sawru du dow kunkuuru puuyɗo.
14 Jom hakkillo na resa anndal,
ammaa borbortugol puuyɗo na ɓattina halkere.
15 Keɓal jom jawdi, ndeenaagu mum,
talkaaku talka, halkere mum.
16 Nguurndam, njobdi ponnditiiɗo,
kiite, keɓal bonɗo.
17 Jaɓuɗo eeltol jokkii laawol nguurndam,
de caliiɗo pelooje kaa wosake ngol.
18 Cuuɗoowo nganyaandi wo penoowo,
cankitoowo nyoore du wo puuyɗo.
19 Haala ɗuuɗuka waasataa hakke,
ammaa kakkilanɗo ko haalata kaa wo jom hakkillo.
20 Hunnduko ponnditiiɗo wo cardi ndimɗundi,
de ɓerɗe bonɓe kaa wo kuyfuɗe.
21 Haalaaji ponnditiiɗo na nyaamna yimɓe heewɓe,
puuyɗo le, rafi hakkillo warata ɗum.
22 Barke Joomiraaɗo na wadda jawdi,
mettorgal walaa e maggol.
23 Waɗude bone wo fijo to puuyɗo,
hakkillo du wo belɗum jom paamal.
24 Ko bonɗo hulata ɗuum saaman dow muuɗum,
de fonnditiiɓe kaa, ko muuyi kokketee.
25 Si nduuydi na faltoo bonɗo adete,
de ponnditiiɗo kaa, daroto faa abada.
26 Hono lammuɗam dow nyiiƴe naa cuurki nder gite,
noon jaayɗo laatanii neluɗo ɗum.
27 Hulude Joomiraaɗo na ɓeyda balɗe,
de naange bonɓe kaa, yanilawan.
28 Seyo woni ngeɗu fonnditiiɓe,
jikke bonɓe kaa, kalkan.
29 Laawol Joomiraaɗo wo reenorde koolniiɗo,
de waɗooɓe bone kaa, o halkan ɗum'en.
30 Walaa ko waawi liɓude ponnditiiɗo,
bonɓe kaa, tabitataa dow leydi.
31 Hunnduko ponnditiiɗo na wurtina hakkillo,
de kaaloowo ko oonyii kaa, taƴete.
32 Hunnduko ponnditiiɗo na anndi ko haani,
ko bonɗo du, ko oonyii.