Noddaango hakkillo
9
1 Hakkillo na nanndi e debbodarnuɗo bimmbeeje jeɗɗi,
nyiɓi suudu mum.
2 Ngo hirsii daabaaji,
ngo hawrondirii cabijam,
ngo segilake nyaamdu.
3 Ngo nelii horɓe maggo noddowa yimɓe,
ngo ƴeeŋii nokkuuje huɓeere ɓurɗe toowde,
ngo gooynii, ngo wi'i:
4 — Onon ɓe ƴoƴaa, ngaree ɗo.
Ngo wi'i ɓe ngalaa ko'e:
5 — Ngaree nyaamee nyaamdu am,
njaree cabijam ɗam kawrondirmi.
6 Accee puuyndam, de mbuuron,
njokkon laawol paamal.
7 Tefoowo dartinde jalnortooɗo fooɗanan hoore mum yaweede,
tindinɗo bonɗo waddanan hoore mum yennoore.
8 Taa felu jalnortooɗo yimɓe, o wanyete,
felu jom hakkillo, o yiɗete.
9 Haalan jom hakkillo, o ɓeydan hakkillo makko,
faamin ponnditiiɗo, o ɓeydan anndal makko.
10 Hulude Joomiraaɗo woni puɗɗam hakkillo,
anndude Ceniiɗo woni paamal.
11 Hakkillo kam ɓeydata nguurndam maa,
ingo ɗuuɗina balɗe maa.
12 Si a waɗii hakkillo, a waɗanii ngo hoore maa,
si wo a jalnortooɗo yimɓe du, dow maaɗa pay ɗum saamata.
Noddaango puuyndam
13 Puuyndam na nanndi e debbo carkotooɗo,
mo ƴoƴaa, mo anndaa faa'e,
14 jooɗiiɗo dammbugal suudu mum,
dow nokkuure ɓurnde toowde ley huɓeere,
15 ina nodda faltotooɓe,
jokkuɓe laawol muɓɓen, ina wi'a:
16 — Onon ɓe ƴoƴaa, ngaree ɗo.
Imo wi'a fuuyɓe du:
17 — Ndiyam mbujjaaɗama na weli,
neema nyaameteeɗo nder cuncukka na weli!
18 Tawi le ɓe anndaa ɗoon wo wuro maayɓe,
naatuɗo ɗoon, naatii e laakara.