Nafaa hakkillo
2
1 Ɓiyam, si a hettindake haalaaji am,si a horsinii jamirooje am,
2 a omtanii noppi maa hakkillo,
si a huccintinii ɓernde maa du faro paamal,
3 goonga, si a toownii daande maa, a noddii caral,
si a durwii a ŋaarake paamal,
4 a tefirii ɗum hono cardi,
a fincitake ɗum hono jawdi cuuɗiindi,
5 ndeen, a faaman ko kulol Joomiraaɗo laatii,
a heɓan anndal Laamɗo.
6 Sabo wo Joomiraaɗo hokkata hakkillo,
anndal e paamal du to makko ƴuurata.
7 Imo resani fonnditiiɓe hakkillo,
o laatanto laaɓuɓe wawaade.
8 Imo reena laabi jom'en goonga,
imo moƴƴina laawol hakkilanɓe amaana makko.
9 Ɓiyam, si a hettindanake kam,
a faaman fonnditaare e goonga e dartaare,
a faaman du laabi lobbi fuu.
10 Ndeen ɓernde maa heewan hakkillo,
yonki maa du weltorto anndal.
11 Taykaare reenete,
paamal du haybete.
12 Hakkillo dannete e laabi oonyiiɗi,
ngo reenete e kunnduɗe bonɓe,
13 yoppuɓe laawol dartiingol,
de njokki laabi nimre,
14 weltortooɓe gollude ko oonyii,
seyortooɓe oonyaare bonanda.
15 Ko oonyii tan ɓe njokkata,
ko ɓe kaɓɓi fuu dartaaki fey.
16 Hakkillo dannete du e debbo jaayɗo,
eytiroowo ma haalaaji belɗi.
17 Oon wo joppuɗo kaɓɓanɗo ɗum gilla nde laatinoo surbaajo,
o yeggitii amaana dewgal makko yeeso Laamɗo.
18 Laawol wuro debbo oon wo laawol maayde,
wo jaaƴinoowol laakara.
19 Yahooɓe to makko fuu ngartataa,
ɓe njiitataa laabi nguurndam katin.
20 Ndelle, ɓiyam, jokku laawol lobbuɓe,
njaaɓaa nder laabi dartiiɓe.
21 Sabo wo fonnditiiɓe njooɗotoo nder leydi,
wo laaɓuɓe nduumotoo nder mayri.
22 Ammaa bonɓe mburtinte e mayri,
jambotooɓe ɗoofete ley mayri.