Ko dewtere nde ekintinta
1
1 Inan banndi Suleymaanu ɓii Daawda, kaananke Israa'iila. 2 O winndii ɗi faa o hokka yimɓe hakkillo e ekintinol, heɓa ɓe paama haalaaji keewɗi anndal, 3 ɓe keɓa wuurude ley caral: waɗude fonnditaare, e goongalaaku, e dartaare, 4 faa mo ƴoƴaa heɓa ƴoyre, jokolɓe du, anndal e tayka.5 Jom hakkillo hettinoo de ɓeyda anndal mum, jom faamu du heɓa ko ɗowata ɗum, 6 de faama maanaa banndi, e haala lugguka, e haalaaji jom'en anndal, e ekintinol majji.
7 Hulude Joomiraaɗo woni puɗɗam anndal, wo puuyɗo yawata hakkillo e ekintinol.
Tindinooje saaraaɓe
8 Ɓiyam, jaɓu tindinoore baaba maa,
taa yoppu ekintinol inna maa,
9 sabo ɗe laatanto hoore maa kufune darja,
daande maa du, koɗol dawla.
10 Ɓiyam, si bonɓe ina tefa eytude ma,
taa jaɓu.
11 Si ɓe mbi'ii ma:
— Accu njehen ɗuppinanoɗen yimɓe, mbaren ɓe,
kippoɗen laaɓuɗo ɓolum.
12 Accu moɗen ɓe, gilla ɓe wuurɓe,
hono no saabeere moɗirta maayɓe,
ɓe naata ley gayɗe nder jokkollaaku maɓɓe.
13 Konen ɓe, de aden gineeji maɓɓe korsuɗi ɗiin fuu,
kebbinen cuuɗi men.
14 War kawten hunnduko,
a heɓan ngeɗu maa.
15 Ɓiyam, taa jokku iri yimɓe ɓeen,
fadda koyɗe maa e laabi maɓɓe.
16 Koyɗe maɓɓe na karwanii waɗude bone,
iɓe karanoo rufude ƴiiƴam.
17 Si foondu yi'ii ina tuufinee fu,
ɗum nafataa.
18 Ammaa kamɓe kaa ko'e maɓɓe ɓe tuufinta,
tuugol maɓɓe ngool wo kamɓe pay nanngata.
19 Noon ɗum laatoranto neɗɗo fuu tefoowo teetude jawdi woɓɓe.
Ndi fooɗanan ɗum maayde.
Noddaango hakkillo
20 Nanee, hakkillo ina gooyna dow laawol,
daande maggo na nanee dow taliyaare luumo.
21 Ingo gooyna dow laabi keewɗi yimɓe,
ingo haala ley dammbule kuɓeeje, ingo wi'a:
22 — Onon ɓe ƴoƴaa, faa ndeye celoton rafi ƴoyre?
Onon jalnortooɓe, ndeye accoton yawude jom hakkillo?
Onon fuuyɓe, faa ndeye keddotoɗon oɗon mbanya anndal?
23 Si on kettindakeno pelooje am,
mi haalananno on ko woni nder ɓernde am,
mi wannginananno on miilooji am.
24 Ammaa mi noddii on, de caliɗon.
Wooɗi du, mi foortanii on junngo, de fay gooto mon saanaay.
25 Kaari! On njokkaay tindinooje am,
on calake hettindaade pelooje am.
26 Saabe majjum, miin du nyannde bone saami dow mooɗon, mi jalan.
Mi jaltinto on wakkati kulol manngol saami dow mooɗon.
27 Si bone saamii dow mooɗon hono kenehenam,
si bonanda nanngii on hono duluuru,
si oɗon ngoni nder ɓillaare e kulol,
28 on noddan kam, de mi nootataako.
On tefan kam, de on njiitataa.
29 Sabo on mbanyii anndal am,
on calake hulude Joomiraaɗo.
30 On njiɗaay tindinooje am,
on pamɗinii pelooje am fuu.
31 Saabe majjum on nyaaman ɓiɓɓe golleeji mon bonɗi,
on kaaran dabareeji mon bonɗi.
32 Wosagol mo ƴoƴaa waran ɗum,
puuyɗo du, yeebaare mum halkata ɗum.
33 Ammaa kettindaniiɗo kam fuu wuuran nder jam,
ɓernde mum du waaltoto, walaa ko hulɓinta ɗum.