Haala rimeede Muusaa
2
1 Gorko gomma jeyaaɗo e ƴuwdi Lewi ɓaŋi debbo e lenyol muuɗum. 2 Debbo oon reedi, rimi ɓinngel gorel. Nde o yi'unoo no ngel foti ŋarɗude fu, o suuɗi ngel faa waɗi lebbi tati. 3 Caggal ɗuum, o ronki suuɗude ngel katin. Ndeen o hooƴi handeere ciidi, o takki ɗum ɗakkere e taari. O watti ɓinngel ngeel ley toon. O yehi o joƴƴini handeere ndeen ley soɗorko daande maayo Nil. 4 Mawniingel debbo ina darii to toowti faa ndaara noy ɗum laatortoo. 5 Caggal ɗuum, ɓii Fira'awna debbo wari maayo Nil faa lootoo. Horɓe muuɗum ina njahanno ɗakkol daande maayo ngoon. O yi'i handeere ndeen ley soɗorko. O nuli korɗo makko ada nde wadda. 6 Nde o omtunoo nde fu, o tawi hen cukalel gorel. Ingel woya. O yurmii ngel, o wi'i:— Wo ɓinngel Ibraninkooɓe.
7 Ndeen mawniigel debbo wari wi'i mo:
— Yalla mi yaha mi filanowe musinoowo ngel hakkunde rewɓe Ibraninkooɓe naa? 8 Ɓii Fira'awna oon jaabii mo, wi'i:
— Yahu.
O yehi o noddowii inna cukalel ngeel. 9 Ndeen ɓii Fira'awna wi'i debbo oon: Hooƴu cukalel ngeel tiigoɗaa ngel aɗa musinana kam ngel, mi yoɓete.
Debbo oon hooƴi na musina ngel. 10 Nde ngel mawnunoo fu, o wartiri ngel to ɓii Fira'awna debbo oon, de waɗi ngel ɓiyum. O inndiri ngel Muusaaa. O wi'i:
— Saabe mi ittii ngel ley ndiyam.
No Muusaa doggiri yehi leydi Madiyan
11 Nde Muusaa mawnunoo fu, wurtii nyannde gomma, yehi to yimɓe lenyol muuɗum. O yi'i golleeji naawɗi ɗi ɓe ngollinte. Ndeen o yi'i Misirankeejo gomma ina fiya banndiiko Ibraninkeejo gomma. 12 Muusaa yeeƴii ndaari gereeji fuu, yi'aay fay gooto. O tappi Misirankeejo oon, o wari ɗum. O suuɗi ɗum ley njaareendi. 13 Jaangoore majjum, o wurtii katin, o yi'i Ibraninkooɓe ɗiɗo na kaɓa. O ƴami toonyiiɗo oon: Ko waɗi aɗa fiya bannda? 14 Oon jaabii, wi'i:
— Moy waɗi ma ardiiɗo e carotooɗo amin? Yalla wo a anniyii warude kam hono no mbarduɗaa Misirankeejo noon naa?
Ndeen Muusaa huli, wi'itii:
— Ndelle, goonga kabaaru oon annditaama.
15 Fira'awna e hoorem humpitaa kabaaru oon, de filii warude Muusaa. Ndeen Muusaa doggi Fira'awna, yehi jooɗowii leydi Madiyan. Ley leydi ndiin, o wari o jooɗii ɗakkol ɓunndu. 16 Wooɗi tawi almaami Madiyan ina woodi sukaaɓe rewɓe njeɗɗo. Ɓeen ngari faa cafa kebbina akalaaje, njarna dammuuli baaba muɓɓen. 17 Ammaa durooɓe woɓɓe ngari ndiiwi ɓe. De Muusaa ummii walli ɓe, yarnani ɓe dammuuli maɓɓe. 18 Nde ɓe njeccinoo to Rewel baabiiɓe fu, oon ƴami ɓe:
Noy waɗi de ngartuɗon law hannden?
19 Ɓe mbi'i mo:
Misirankeejo gomma danni min e juuɗe durooɓe. Katin du o safi, o yarnani min dammuuli amin. 20 O ƴami sukaaɓe makko rewɓe ɓeen:
— Ndelle toy gorko oon woni? Ko waɗi njoppuɗon mo toon? Njehee noddowee mo o wara, o nyaamda e meeɗen.
21 Muusaa jaɓi jooɗaade ley ɓaade gorko oon. Oon hokki mo ɓiyum debbo inndirteeɗo Sifoora o ɓaŋi. 22 Debbo oon rimani mo ɓiɗɗo gorko. Muusaa inndiri ɗum Gersom sabo wi'i: Wo mi beero e leydi njananndi.