No Israa'iilankooɓe laatorii maccuɓe ley leydi Misira
1
1 Inan inɗe ɓiɓɓe Israa'iila naadduɓe e Yaakuuba nder leydi Misira: 2 Ruben e Simeyon e Lewi e Yahuuda 3 e Isakar e Jabulon e Benyamin 4 e Dan e Naftali e Gad e Aser. Gooto e maɓɓe fuu yaadi e koreeji muuɗum. 5 Ƴuwdi Yaakuuba wo yimɓe capanɗe jeɗɗo. Yuusufi kaa ina woni ley Misira. 6 Caggal ɗuum, Yuusufi e sakiraaɓe muuɗum e yimɓe jamaanu muuɗum ɓeen fuu maayi. 7 Yimɓe Israa'iila ndimi, keewi sanne. Ɓe ɓeydi heewde sanne, semmbe maɓɓe du ɓeydii. Ɓe keewi e leydi ndiin fuu.8 Caggal ɗuum kaananke goɗɗo laamii Misira. Oon kaa anndaa fay gootum dow Yuusufi e dow ko waɗunoo. 9 O wi'i yimɓe makko:
— Inan yimɓe Israa'iila wo lenyol ɓurngol lenyol meeɗen ɗuuɗude e semmbe. 10 Ndelle, ina haani kakkilen, ngaɗen dabare faa kaɗen ɓe ɓeydaade katin. Sabo si en kaɓii e wayɓe men fu, iɓe mbaawi heedande ɓeen, ɓe kaɓa e men, de ɓe ndilla leydi meeɗen.
11 Ndeen yimɓe Misira cuɓii hooreeɓe golleeji tiiɗɗi faa ngollina Israa'iila'en golleeji naawɗi. Israa'iila'en ngaɗaa nyiɓani Fira'awna kuɓeeje desirɗe nyaamri, ɗeen ngoni Pitom e Ramesesi. 12 Ammaa no Misirankooɓe tampiniri ɓe fu, wo noon ɓe ɓeydorii heewde, noon du ɓe ɓeydorii sankitaade. Saabe ɗuum Misirankooɓe mbemmbaama saabe Israa'iila'en sanne. 13 Ndeen yimɓe Misira ngollini Israa'iila'en golleeji maccungaaku. 14 Ɓe mettiniri nguurndam ɓeen e golleeji naawɗi. Ɓe ndoolɗi ɓeen ngaɗa loope e pereeje e golleeji gese, e sii gollal naawngal fuu.
15 Fira'awna kaananke Misira haaldi e rewɓe rimtinooɓe deekiraaɓe Ibraninko'en ɓeen. Gooto maɓɓe ina wi'ee Sifira, gooto du Puwa. 16 O wi'i ɓe:
— Nde ndimtinton rewɓe Ibraninkooɓe fu, ndaaron wooɗa, si wo ɓiɗɗo gorko fu, mbaron ɗum, si wo ɓiɗɗo debbo, accon ɗum wuura. 17 Ammaa rimtinooɓe ɓeen wo hulooɓe Laamɗo. Ɓe ngaɗaay ko kaananke Misira oon wi'i ɓe. Ɓe acci cukaloy ngoroy kooy mbuuri. 18 Ndeen kaananke Misira oon noddi ɓe, ƴami:
— Ko waɗi ngaɗuɗon nii? On accii cukaloy ngoroy kooy mbuurii?
19 Rimtinooɓe ɓeen njaabii Fira'awna, mbi'i: Rewɓe Ibraninkooɓe nganaa hono rewɓe Misirankooɓe. Wo ɓe rewɓe semmbiɗinɓe. Ndimu tiiɗaa ɓe sanne. Wo ɓe ndiman gilla dimtinoowo yottaaki.
20 Laamɗo barkini rimtinooɓe ɓeen. Yimɓe Israa'iila ɓeydii heewude sanne, ngaɗi semmbe du sanne. 21 Saabe ko rimtinooɓe ɓeen kuli Laamɗo ɗuum, Laamɗo hokki ɓe ƴuwdi. 22 Wooɗi Fira'awna yamiri yimɓe muuɗum fuu, wi'i:
— Ɓii Ibraninkeejo gorko dimaaɗo hakkunde mooɗon fu, paɗɗon ɗum ley maayo Nil, ammaa accon cukaloy ndewoy kooy kaa mbuura.