49
1 Yaakuuba noddi ɓiɓɓe muuɗum, wi'i:
— Kawritee faa mi haalana on ko hewtotoo on ley duuɓi garooji. 2 Kawritee, kettindee. Miin baabii on Yaakuuba, bi'eteeɗo Israa'iila, kettindee ko kaalanammi on:
3 — Ruben, aan woni afo am, aan woni semmbe am, ɓiɗɗo am mo artumi keɓumi ley njokollaaku am. Aan woni ɓurɗo teddeengal e baawɗe fuu. 4 Aɗa nanndi e ndiyam iloojam, a walaa nanngitaare. A heɓataa ardaade, sabo a fukkake dow daɗɗo bammaa, de tuuninɗaa ngo.
5 — Simeyon e Lewi wo sakiraaɓe, kaafaaje maɓɓe wo nyannguɗe. 6 Mi naatataa ley anniyaaji maɓɓe. Taa ɓernde am seyoroo hawritinde e maɓɓe fey! Sabo ley tikkere maɓɓe ɓe mbarii yimɓe. Ley fijo maɓɓe du, ɓe taƴii codduli na'i. 7 Kuddi wona dow tikkere maɓɓe sabo nde nyanngunde, ɓernugol maɓɓe ina mawni. Mi feccan ɓe hakkunde ɓiɓɓe Yaakuuba, mi sankitan ɓe ley Israa'iila.
8 — Aan Yahuuda, sakiraaɓe maa manete, junngo maa wonan dow koƴƴuli wayɓe maa, sakiraaɓe maa cujidante. 9 Yahuuda le wo laddeeru jokoldu. A nyaamoyi ko loohiɗaa, de ngartuɗaa, aan ɓiyam. A leeƴii, aɗa ɗappinorii hono laddeeru, mbaaloriɗaa hono laddeeru rewru semmbiɗindu. Moy suusi umminde ma? 10 Sawru laamu heddoto e lenyol Yahuuda, laamu ƴuwataa ley ƴuwdi makko, faa nde podanaaɗo jeyude laamu oon wari. Lenyi adunaaru ɗowtanto mo, ɗi njardanto mo. 11 O haɓɓan araawa makko e cabiihi, o haɓɓan mola makko du e liccal ɓurngal wooɗude. O lonniran kaddule makko cabijam, o mutinan saaya makko ley cabijam mboɗejam ɗaam. 12 Cabijam ɓawlinan gite makko, ɓiraaɗam du rawninan nyiiƴe makko.
13 — Jabulon jooɗoto daande maayo, nokku jipporde laanaaji ndiyam. Leydi makko yottoto leydi Sidon.
14 — Isakar wo araawa cemmbiɗinga, mbaaliinga hakkunde galbe baali ɗiɗi. 15 Nde nga tawnoo hoɗorde ndeen ina wooɗi, leydi ndiin du ina weli fu, nga turni balaaje magga faa nga ronndii donngal, nga laatii maccuɗo golleeji tiiɗuɗi.
16 — Dan du saroto lenyol muuɗum hono no lenyi Israa'iila keddiiɗi ngarrata noon. 17 Dan laatoto hono mboddi dow laawol. O laatoto hono foosokere dow laawol, soppoore teppe pucci faa waɗɗiiɓe ɗi caamira gaɗa gaɗalde. 18 Miɗo doomi kisindam ƴuuruɗam to maa, aan Joomiraaɗo!
19 — Konunkooɓe konan Gad, de kam du sakitoto hona ɓe.
20 — Aser jogoto neema gooduɗo nebbam. O waɗanan laamiiɓe neemaaji mbelɗi.
21 — Naftali wo lewla njoofaanga, ndimoowa ɓiɓɓe fonnditiiɓe.
22 — Yuusufi wo liccal lekki dimoowal, lekki ndimoowi ngonki dow ildude ndiyam, ki licce muuɗum mbeeltata dow kokuwol. 23 Fiɗooɓe kure koni mo, piɗi mo, torri mo. 24 Ammaa imo tiigii laanyal makko faa teeŋi, juuɗe makko ina celli saabe ballal Laamɗo jom baawɗe mo Yaakuuba sujidani oon, kam woni Duroowo laatiiɗo tepaare Israa'iila. 25 Laamɗo bammaa oon wallete, kam woni baawɗo barkinande ma huunde fuu, barkeeji ƴuurooji dow kammu e barkeeji ilam mbaaliiɗam e leydi e barkeeji enɗi e enɗam. 26 Barkeeji bammaa ɓuri barkeeji baamle ɓooyɗe e moƴƴereeji nokkuuje toowɗe duumiiɗe. Ɗi ngona dow hoore maaɗa, dow hoore maa, aan Yuusufi, cenndaaɗo hakkunde sakiraaɓe maaɗa.
27 — Benyamin wo suundu seekooru, nyaamooru wanyuɓe ɗum gilla beetee, peccoowo ko heɓi du wakkati kiiral naange.
28 Wooɗi, ɓee ngoni lenyi Israa'iila sappo e ɗiɗi ɗiin. Ɗuum woni ko baaba maɓɓe wi'i nde barkinnoo ɓe ndeen. Gooto fuu fodde barke muuɗum o barkiniri ɗum.
Maayde Yaakuuba
29 Yaakuuba tindini ɓe, wi'i:
— Joonin mi maayan, mi hawritowan e maamiraaɓe am. Mooɓaa kam ɗakkol baabiraaɓe am ley loho wonko e ngesa Eforon Hitiyanke koon. 30 Koon woni loho tawaako e ngesa Makpela, lettugal Mamre. Loho koon, wo Ibrahiima soodi ko kanko e ngesa ngaan fuu e junngo Eforon faa nokku oon laatoo nokku caabeeje. 31 Toon Ibrahiima e jom suudu mum Saaratu mooɓaa. Toon Isiyaaka e jom suudu mum Rifka du mooɓaa. Toon mooɓumi Leya du. 32 Ngesa ngaan e loho wonko e magga koon fuu e juuɗe Hitiyankooɓe coodaa.
33 Nde Yaakuuba tilinoo e tindinde ɓiɓɓe muuɗum ɓeen ndeen, hawrini koyɗe muuɗum dow daɗɗo, foofi foofaango sakitiingo, de dilli adunaaru, hawritowi e maamiraaɓe muuɗum.