50
1 Yuusufi hippii dow bammum, woyi mo, muccii mo.2 Yuusufi yamiri sawrooɓe muuɗum ngatta bammum ure heɓa taa nyola. Sawrooɓe ɓeen ngatti Israa'iila ure.3 Ɓe ngolliri ɗum balɗe capanɗe nay, ɗum woni balɗe ɗe maayɓe mbujirtee ure heɓa taa nyola. Misirankooɓe mboyi mo balɗe capanɗe jeɗɗi sabo ɗeen ngoni balɗe ɗe maayɗo woyetenoo.
4 Nde nyalaaɗe woyeede Yaakuuba ɗeen kiɓɓunoo fu, Yuusufi wi'i mawɓe ɓattiiɓe Fira'awna ɓeen:
Si on njaɓanii kam fu, miɗo ŋaaroo on, nyaaganee kam Fira'awna, mbi'on: 5 «Nde baabam ɓadinoo maayde ndeen, waɗii kuniimi mi mooɓan ɗum nder saabeere nde wasani hoore muuɗum ley leydi Kanaana. Joonin accaa kam mi mooɓowa baabam de mi warta.»
6 Fira'awna jaabii, wi'i:
— Yahu, mooɓowaa bammaa hono no o waɗunoo kunoriɗaa noon.
7 Yuusufi yehi mooɓowii bammum. Gollooɓe Fira'awna e mawɓe suudu muuɗum e mawɓe leydi Misira fuu njaadi e makko. 8 Noon du suudu Yuusufi e sakiraaɓe muuɗum e suudu bammum fuu njehi. Wo sukaaɓe e dammuuli e na'i maɓɓe tan ɓe njoppi ley leydi Goosan. 9 Torkooji pucci sordaasiiɓe e waɗɗiiɓe pucci njaadi e Yuusufi. Jamaa oon heewi sanne.
10 Nde ɓe njottinoo njaayri Atat lettugal gooruwol Urdun ndeen, ɓe mboyi toon bojji mawɗi sanne. Yuusufi woyiri bammum balɗe jeɗɗi. 11 Wonɓe e leydi Kanaana ɓeen nani bojji maɓɓe ley ƴarorde Atat ndeen. De ɓe mbi'i: «Ɗii bojji Misira, wo ɗi mawɗi.» Ɗum waɗi de ɓe inndiri nokku oon e Ibraninkoore Awil-Misirayim (ɗum na fiirta «Bojji Misirankooɓe»). Iɗum tawaa gere oo to Urdun. 12 Ɓiɓɓe Yaakuuba ngaɗani ɗum hono no yamirnoo ɗum'en noon. 13 Ɓe ndonndii mo faa e leydi Kanaana, de ɓe mooɓi mo ley loho wonko ngesa Makpela. Loho koon woni ley ngesa ngonnga yeeso Mamre nga Ibrahiima soodunoo to Eforon, Hitiyanke oon, faa laatanoo ɗum nokku caabeeje. 14 Nde ɓe mooɓidino mo fu, Yuusufi yecci Misira kam e sakiraaɓe muuɗum e ɗowtirnooɓe ɓe mooɓoyde baabiiɓe ɓeen fuu.
No Yuusufi deƴƴiniri sakiraaɓe muuɗum
15 Nde sakiraaɓe Yuusufi nji'unoo baaba muɓɓen maayii ndeen, mbi'i:
— Ina waawi taweede Yuusufi wanyan en joonin, de yomnitoo en torraaji ɗi ngaɗunoɗen ɗum ɗiin.
16 Saabe ɗuum ɓe neli e Yuusufi, ɓe mbi'i ɗum:
— Fadde bammaa maayde ndeen, hokkii tindinoore nde ɗo: 17 «Mbi'ee Yuusufi, ɗum ɗo: Miɗo nyaage, yaafa sakiraaɓe maa hakke mo ɓe ngaɗi ma, njaafoɗaa luttal maɓɓe ngaal, ko ɓe ngaɗi ma ko boni ɗuum». Joonin le si goonga, miɗen ŋaare, yaafa luttal amin, minen maccuɓe Laamɗo bammaa ɓeen.
Nde Yuusufi nannoo haalaaji ɗiin ndeen, woyi.
18 Wooɗi du sakiraaɓe makko ɓeen ngari cujidi yeeso makko, mbi'i:
— Inani min, wo min maccuɓe maa!
19 Ammaa Yuusufi wi'i ɓe:
— Taa kulee! Yalla miin wo mi Laamɗo naa? 20 Onon le, on muuyiino waɗude kam ko boni, ammaa Laamɗo kaa muuyrii ɗum moƴƴere, faa danna yimɓe heewɓe hono no ɗum laatorii hannden nii. 21 Ndelle joonin, taa kulee. Mi jogoto on, onon e koreeji mon fuu.
Noon o deƴƴiniri ɓe, o waaltinii ɓerɗe maɓɓe.
Maayde Yuusufi
22 Yuusufi jooɗii Misira, kam e suudu bammum fuu. O wuurii duuɓi hemre e sappo. 23 Yuusufi yi'i ɓiɓɓe Efrayim e taaniraaɓe muuɗum. Wooɗi ɓiɓɓe Makir, ɓii Manasa oon du, ndimaama dow koyɗe Yuusufi. 24 Yuusufi wi'i sakiraaɓe muuɗum:
— Mi ɓadake maayde. Ammaa Laamɗo wallan on. O wurtinan on e leydi ndi, o yaaran on e leydi ndi o huninoo o hokkan Ibrahiima e Isiyaaka e Yaakuuba ndiin.
25 Yuusufi waɗi ɓiɓɓe Israa'iila kunii. O wi'i:
— Laamɗo wallan on. Si oɗon ndilla ɗo fu, ndillidon e ƴi'e am.
26 Caggal ɗuum, Yuusufi maayi, duuɓi muuɗum wo hemre e sappo. Ɓe mbuji mo ure heɓa taa o nyola, ɓe ndesi mo ley keesuwal ley leydi Misira.