47
1 Yuusufi yehi humpitowi Fira'awna, wi'i:
— Baaba am e sakiraaɓe am e dammuuli muɓɓen e na'i muɓɓen e ko ɓe njogii fuu ƴuwii leydi Kanaana, ngarii. Iɓe toon ley leydi Goosan.
2 Yuusufi adi hakkunde sakiraaɓe muuɗum ɓeen yimɓe njoyo, darni ɓe yeeso Fira'awna. 3 Fira'awna wi'i sakiraaɓe makko ɓeen:
— Ɗume woni gollal mon?
Ɓe njaabii Fira'awna, ɓe mbi'i:
— Maccuɓe maa wo durooɓe, minen e baabiraaɓe amin fuu. 4 Min ngarii wo min jananɓe ley leydi maa, sabo dammuuli maccuɓe maa ngalaa durduɗe, rafo sattii ley leydi Kanaana. Joonin miɗen ŋaare, njardoɗaa maccuɓe maa njooɗoo ley leydi Goosan.
5 Fira'awna haaldi e Yuusufi, wi'i:
— Bammaa e sakiraaɓe maa ngarii to maa. 6 Leydi Misira ina woni yeeso maa. Honnu ɓe ley leydi ɓurndi woodde. Ɓe koɗa ley leydi Goosan. Si aɗa anndi waawɓe gollal durngol ina ngoni hakkunde maɓɓe fu, ngaɗaa ɗum'en hooreeɓe durooɓe daabaaji am.
No Yaakuuba e ɓiɓɓe muuɗum kawriri e Fira'awna
7 Yuusufi waddi bammum Yaakuuba, nanni ɗum yeeso Fira'awna. Yaakuuba barkini Fira'awna.
8 Fira'awna ƴami Yaakuuba:
— Duuɓi maa wo foti?
9 Yaakuuba jaabii Fira'awna, wi'i:
— Duuɓi am wo hemre e capanɗe tati. Mi wuurdii egga-hoɗa. Duuɓi am seeɗa ɗi du, mi wuurii ɗi ley tiiɗalla. Mi heɓaay duuɓi ɗi maamiraaɓe am mbuuri ley egga-hoɗa muɓɓen ɗiin.
10 Yaakuuba barkini Fira'awna, de waynii ɗum. 11 Yuusufi honni bammum e sakiraaɓe muuɗum, hokki ɗum'en laamoo ɗo ɓuri fuu wooɗude e leydi Misira, ley leydi Ramses hono no Fira'awna yamirnoo noon. 12 Yuusufi hokki bammum e sakiraaɓe muuɗum e koreeji muɓɓen nyaamri fodde no sukaaɓe muɓɓen poti.
13 Tawi nyaamdu walaa e leydi ndiin fuu, sabo rafo ngoon sattii sanne. Leydi Misira e leydi Kanaana fuu tampii rafo sanne. 14 Yuusufi hawrunduri ceede tawaaɗe Misira e tawaaɗe Kanaana ɗe ɓe coodiri nyaamri ɗeen. Yuusufi waddi ceede ɗeen to suudu Fira'awna laamordu. 15 Nde ceede timmunoo leydi Misira e leydi Kanaana ndeen, Misirankooɓe fuu ngari to Yuusufi, mbi'i:
— Hokku min nyaamri. Ndelle min maayan yeeso maa sabo min ngalaa ceede katin naa?
16 Yuusufi wi'i:
— Si on ngalaa ceede, ngaddee daabaaji mon de mi hokka on nyaamri.
17 Ɓe ngaddi daabaaji maɓɓe to Yuusufi, pucci e dammuuli e na'i e araaji, de kam du hokki ɓe nyaamri. Hitaande ndeen ɓe kokki mo daabaaji maɓɓe fuu faa ɓe keɓa nyaamdu.
18 Ko hitaande ndeen faltii, hitande jokkunde ndeen, ɓe ngarti to makko, ɓe mbi'i:
— Ceede amin timmii, min mbaawaa suuɗude ɗum joomii amin. Daabaaji amin du fuu ngartii e juuɗe maa, min ngalaa fuu ko min kokke si wanaa ko'e amin e leydi amin. 19 Yalla min maayan yeeso maa, minen e leydi amin fuu naa? Soottitora min ko nyaametee, minen e leydi amin fuu. Min laatoo maccuɓe Fira'awna, o hawjoo leydi amin ndiin du. Hokku min aawdi faa min mbuura, taa min maaya, taa leydi amin laatoo ɓoldi.
20 Yuusufi soottitanii Fira'awna leydi Misira fuu, sabo Misirankooɓe fuu coottii gese muɓɓen, no rafo sattiri e maɓɓe. Leydi ndiin laatii halal Fira'awna. 21 Ammaa yimɓe ɓeen, o eggini ɗum'en njooɗowii ley kuɓeeje, faa keeri Misira fuu. 22 O soodi leydi ndiin fuu. Leydi almaami'en tan woni o soodaay. Sabo nyaamri almaami'en ɓeen wo to Fira'awna woni. Ɓe mbuurdi e nyaamri ndi Fira'awna hokki ɓe ndiin, ɗum waɗi de ɓe coottaay gese maɓɓe.
23 Ndeen Yuusufi wi'i yimɓe ɓeen:
— Hannden onon e gese mon fuu mi soottanii on Fira'awna. Inan aawdi mooɗon. Aawee gese ɗeen. 24 Wakkati tayri on kokkan Fira'awna joorde joyaɓerde. Geɓe nay keddiiɗe ɗeen laatanoo on aawdi e nyaamri, onon e wonɓe ley cuuɗi mon e sukaaɓe mon fuu.
25 Ɓe mbi'i:
— A dannii yonkiiji amin. Min keɓii moƴƴere yeeso joomii amin, min laatoto maccuɓe Fira'awna.
26 Yuusufi waɗi ɗum yamiroore ley leydi Misira gilla ndeen faa warde hannden: Joorde joyaɓerde fuu wo Fira'awna jeyi. Leydi almaami'en ndiin tan woni ndi laatanaaki Fira'awna.
27 Wooɗi ɓiɓɓe Israa'iila du koɗi leydi Misira nder leydi Goosan. Ɓe keɓi toon jawdi, ɓe ndimi, ɓe keewi sanne. 28 Yaakuuba wuuri ley leydi Misira duuɓi sappo e jeɗɗi. Duuɓi ɗi Yaakuuba wuuri fu wo duuɓi hemre e capanɗe nay e jeɗɗi (147).
29 Nde Israa'iila ɓadinoo maayde ndeen, noddi ɓiyum Yuusufi, wi'i ɗum:
— Si mi heɓii moƴƴere yeeso maa fu, wattu junngo maa ley busal am faa ngaɗaa hunayeere a waɗanan kam ko hoolnii e ko dartii. Taa mooɓaa kam ley Misira. 30 Ammaa mooɓowaa kam ɗakkol baabiraaɓe am. Mbuurtinaa kam Misira, kooraa kam ley caabeeje maɓɓe, mooɓaa kam.
Yuusufi wi'i:
— Mi waɗiran hono no mbiiruɗaa noon.
31 Yaakuuba wi'i:
«Hunanam!»
Yuusufi hunanii mo. Israa'iila sujidi dow hoore daɗɗo muuɗum.