No Yaakuuba e koreeji muuɗum ngardi Misira
46
1 Israa'iila (bi'etenooɗo Yaakuuba oon) eggidi e ko mari fuu. O yottii Beerseba, ɗoon o hirsani Laamɗo baabiiko Isiyaaka kirsamaaji.2 Laamɗo haaldi e Israa'iila ley koyɗol jemma majjum, wi'i:
«Yaakuuba! Yaakuuba!»
De Yaakuuba nootii, wi'i:
— Inani kam.
3 Laamɗo wi'i:
— Miin woni Laamɗo, miin woni Laamɗo bammaa. Taa hulu yaade Misira, sabo lenyol manngol ƴuwan e maaɗa. 4 Mi yaadan e maa Misira, mi wurtinoyte du. Si a maayii du, wo juuɗe Yuusufi pay culmataa gite maa, de uwe.
5 Yaakuuba ummii Beerseba. Ɓiɓɓe Israa'iila nanni baaba muɓɓen Yaakuuba e ɓiɓɓe muɓɓen e rewɓe muɓɓen torkooji ɗi Fira'awna neldi ngadda ɓe ɗiin. 6 Ɓe kooƴi daabaaji maɓɓe e jawdi maɓɓe ndi ɓe keɓunoo ley leydi Kanaana. Yaakuuba yehi Misira, kam e koreeji muuɗum fuu. 7 O dillidi e ɓiɓɓe makko worɓe e taaniraaɓe makko worɓe e ɓiɓɓe makko rewɓe e taaniraaɓe makko rewɓe e koreeji makko fuu faa ɓe njottii leydi Misira.
8 Inan ɓiɓɓe Israa'iila warɓe Misira - ɓeen ngoni Yaakuuba e ɓiɓɓe muuɗum. Afo Yaakuuba wo Ruben. 9 Inan ɓiɓɓe Ruben worɓe: Henok e Pallu e Hesruuna e Karmi. 10 Ɓiɓɓe Simeyon worɓe ngoni: Yemu'el e Yamin e Ohada e Yakin e Sohar e Sawul, ɓii Kanaaninke debbo. 11 Ɓiɓɓe Lewi worɓe ngoni: Gerson e Kohat e Merari. 12 Ɓiɓɓe Yahuuda worɓe ngoni: Er e Onan e Sela e Peres e Serak. Ammaa Er e Onan maayii leydi Kanaana. Ɓiɓɓe Peres worɓe: Hesruuna e Hamul. 13 Ɓiɓɓe Isakar worɓe ngoni: Tola e Puwa e Yoba e Simron. 14 Ɓiɓɓe Jabulon worɓe ngoni: Sered e Elon e Yahalel. 15 Ɓeen ngoni ɓiɓɓe Leya worɓe ɓe o rimdi e Yaakuuba nde ɓe ngonnoo Padan-Aram, kamɓe e Dina ɓiyiiko debbo. Ɓiɓɓe e taaniraaɓe ɓe Yaakuuba heɓiri e deekum Leya ɓeen fuu wo capanɗe tato e tato worɓe e rewɓe. 16 Ɓiɓɓe Gad worɓe ngoni: Jifiyon e Haggi e Suni e Esbon e Eri e Arod e Areeli. 17 Ɓiɓɓe Asiira ngoni: Yimna e Yisuwa e Yiswi e Beriya e Serak, sakiike maɓɓe debbo. Ɓiɓɓe Beriya worɓe ngoni: Heber e Malkiyel. 18 Ɓeen ngoni ɓiɓɓe Jilpa mo Laban hokkunoo ɓiyum Leya, ɓeen Jilpa rimani Yaakuuba. Ɓe fuu wo ɓe sappo e njeegom. 19 Ɓiɓɓe Rahiina dee Yaakuuba, worɓe ngoni: Yuusufi e Benyamin. 20 Ɓiɓɓe Yuusufi worɓe rimaaɓe leydi Misira ɓeen ngoni: Manasa e Efrayim. Wo Asanata, ɓii Potifera almaami wuro Ona oon rimani ɓe Yuusufi. 21 Ɓiɓɓe Benyamin worɓe ngoni: Bela e Beker e Asbel e Geera e Na'aman e Eki e Roos e Muppim e Huppim e Arda. 22 Ɓiɓɓe e taaniraaɓe ɓe Yaakuuba heɓiri e deekum Rahiina ɓeen fuu wo sappo e nayo. 23 Ɓii Dan gorko wo Husim. 24 Ɓiɓɓe Neftalim worɓe ngoni: Yahetel e Guni e Yejer e Silem. 25 Ɓeen ngoni ɓiɓɓe Bilha mo Laban hokkunoo ɓiyum Rahiina, ɓeen Bilha rimani Yaakuuba. Ɓe fuu wo ɓe njeɗɗo. 26 Ɓiɓɓe e taaniraaɓe Yaakuuba, yaaduɓe e muuɗum Misira, fuu wo yimɓe capanɗe njeegom e njeegom, deekiraaɓe ɓiɓɓe muuɗum worɓe limaaka. 27 Ɓiɓɓe Yuusufi worɓe rimaaɓe Misira wo ɗiɗo. Yimɓe suudu Yaakuuba yottiiɓe Misira fuu wo capanɗe njeɗɗo.
28 Yaakuuba neli Yahuuda ardoo yaha to Yuusufi, faa Yuusufi sappoo ɗum laawol Goosan. Nde Yaakuuba e koreeji muuɗum njottinoo leydi Goosan ndeen, 29 Yuusufi segilii torkooru pucci mum, yehi faa sakkitowoo bammum to Goosan. Nde o yi'unoo ɗum ndeen, o mumilii ɗum, o woyi faa ɓooyi. 30 Israa'iila wi'i Yuusufi:
— Joonin miɗo waawi maayude, sabo mi yi'ii yeeso maa, mi faamii aɗa wuuri.
31 Yuusufi haalani mawniraaɓe muuɗum worɓe e yimɓe suudu bammum fuu, wi'i:
— Mi yahan mi haalanowa Fira'awna haala mon, mi wi'a ɗum: «Sakiraaɓe am, yimɓe suudu baaba am wonnooɓe leydi Kanaana ɓeen ngartii to am ɗo. 32 Worɓe ɓeen wo durooɓe daabaaji, margol woni gollal maɓɓe. Ɓe ngaddii be'i maɓɓe e baali maɓɓe e na'i maɓɓe e ko ɓe njogii fuu.» 33 Si Fira'awna noddii on, ƴamii on ɗume woni golleeji mon fu, 34 mbi'on: «Minen maccuɓe maa, min ekintinaaɓe durngol gilla cukaaku amin faa joonin, minen e baabiraaɓe amin fuu.» Noon keɓirton jooɗaade ley leydi Goosan, sabo durooɓe dammuuli fuu wo tuunɓe to Misirankooɓe.