No Yuusufi anndintiniri hoore mum sakiraaɓe muuɗum
45
1 Nde Yaahuudu timminoo haalude ndeen, Yuusufi waawaay jogaade hoore muuɗum yeeso yimɓe fiiliiɓe ɗum ɓeen. O feekii, o wi'i: «mbuurtinee yimɓe fuu!»Ndelle fay gooto e battaa'en ɓeen tawaaka ɗoon nde Yuusufi anndintinannoo sakiraaɓe ɓeen hoore mum. 2 O haacci haaccaango manngo faa Misirankooɓe nani, yimɓe suudu Fira'awna du nani.
3 O wi'i sakiraaɓe makko ɓeen:
— Miin woni Yuusufi. Yalla baaba am ina wuuri naa?
Ammaa sakiraaɓe makko ɓeen mbemmbaa yeeso makko faa ndonki jaabaade.
4 Yuusufi wi'i sakiraaɓe muuɗum ɓeen:
— Miɗo ŋaaroo on, ɓattitee kam!
Ɓe ɓattitii. Ndeen o wi'i:
— Miin woni Yuusufi, sakiike mon mo coottuɗon Misira oon. 5 Ammaa joonin, taa pelee ko'e mooɗon, taa mbemmbeɗon saabe ko coottuɗon kam ɗuum. Wo Laamɗo ardini kam on faa mi danna on. 6 Gilla duuɓi ɗiɗi rafo ina woni ley leydi. Duuɓi joy ngarooji ɗiin du aawataake, taƴataake. 7 Laamɗo neli kam yeeso mon e leydi ndi faa mi hisina on, onon e ɓiɓɓe mooɗon, kisindam mawɗam. 8 Wanaa onon neli kam ga, wo Laamɗo. O waɗii kam baaba Fira'awna e jom ɓaade muuɗum fuu. O laaminii kam dow leydi Misira fuu. 9 Joonin le, njaawnee kootee to baaba am, mbi'on ɗum: «Ɓiya Yuusufi wi'i: Laamɗo waɗii kam kaananke Misira fuu. War to am, taa neeɓu. 10 A hoɗan ley leydi Goosan, faa tawa aɗa ɓadii kam, aan e ɓiɓɓe maa e taaniraaɓe maa e dammuuli maa e na'i maa e jawdi maa fuu. 11 Mi jogete, aan e ɓaade maaɗa, e jeydaaɗo maa fuu, faa taa ɓilloɗon, sabo rafo ngo heddoto, waɗira duuɓi joy katin.» 12 On njiirii gite mon, onon e minyam Benyamin fuu, wo miin jaati haaldata e mooɗon. 13 Kumpitee baabam no potumi teddeengal ley Misira e ko nji'uɗon fuu. Njaawnee law, ngaddon baaba am.
14 Kanko e Benyamin sakiike makko oon, ɓe mumbiliri, ɓe mboyi. 15 O muccii sakiraaɓe makko ɓeen fuu, o woyi e juuɗe maɓɓe. Caggal ɗuum ɓe njeewtidi e makko.
No sakiraaɓe Yuusufi kootiri
16 Wooɗi, ɓaade Fira'awna fuu nani kabaaru ngarol sakiraaɓe Yuusufi. Ɗum weli Fira'awna e gollanooɓe ɗum fuu.
17 Fira'awna wi'i Yuusufi:
— Inan ko mbi'ataa sakiraaɓe maa ɓeen: «Ndimndee araaji mon, njeccee leydi Kanaana. 18 Ngardowon e baammon e koreeji mon to am. Mi hokkan on to ɓuri wooɗude e leydi Misira, on nyaaman ko ɓuri welde ley leydi ndiin.» 19 Inan ko njamirammaami mbi'aa ɓe katin: «Kooƴee torkooji ley leydi Misira, ngaddirowon sukaaɓe mon e rewɓe mon e baammon faa ɗo. 20 Taa mimsitee ko njoppoton toon ɗuum, sabo on keɓan ko ɓuri fuu wooɗude ley leydi Misira.»
21 Ɓiɓɓe Israa'iila ngaɗi noon. Yuusufi hokki ɓe torkooji fodde yamiroore Fira'awna. O hokki ɓe njooɓaari du. 22 O hokki mono e maɓɓe fuu kaddule kese baylitirɗe, de Benyamin kaa, o hokki ɗum buuɗi cardi keme tati e kaddule kese baylitirɗe joy. 23 Inan ko o neldi baabiiko: gorbi sappo dimndaaɗi kulle ɓurɗe fuu woodde ley Misira. O neldi ɗum araaji debbi sappo dimndaaɗi alkama, buuru e nyaamduuji faa baabiiko heɓa ko yooɓoo.
24 Ndeen o waynonduri e sakiraaɓe makko, de ko ɓe ndillata ɗuum, o wi'i ɓe: «Taa ngaɗon kalala dow laawol!»
— Yuusufi ina wuuri! Wooɗi, wo kam jaati laamii leydi Misira fuu!
Ammaa ɓernde Yaakuuba dimmbaaki sabo o jaɓaay haala maɓɓe.
27 Ndeen ɓe kaaltani mo haalaaji ɗi Yuusufi haali fuu. O yi'i du torkooji ɗi Yuusufi neldi faa kooƴa mo ɗiin. Ndeen hakkillo makko waaltii.
28 O wi'i:
— Mi jaɓii, ɓiyam Yuusufi ina wuuri! Mi yahan, mi yi'owa mo gilla mi maayaay.