Haala horde Yuusufi nder bootooru Benyamin
44
1 Yuusufi wi'i golloowo ardiiɗo wuro oon:— Hebbin bootooji worɓe ɓeen nyaamri, haddi ko ɓe mbaawi adude, wooɗi du ngattaa ceede mono fuu ley bootooru muuɗum. 2 Ndeen ngattaa du ley hunnduko bootooru minyiiɓe oon horde am cardi, kayre e coggu nyaamri makko ndiin.
Oon waɗi no Yuusufi wi'iri ɗum noon. 3 Nde weetunoo fu, worɓe ɓeen e araaji muɓɓen ndimndaaɗi ɗiin fuu njoppaa, ndilli. 4 Nde ɓe njaltunoo huɓeere ndeen, gilla ɓe mboɗɗaaki, Yuusufi wi'i golloowo ardiiɗo wuro oon:
— Umma! Tewnitin worɓe ɓeen. Nde kewtiɗaa ɓe fu, mbi'aa ɓe: «Ko saabii oɗon mbarjitoo moƴƴere e ko boni? 5 Wanaa on kooƴii ko joomam yardata e ko o tiimirta ɗuum naa? On ngaɗii ko boni.»
— Noy waɗi de joomii amin haaliri ni? Laamɗo hiinu maccuɓe maa gollude hono ɗi golleeji! 8 Miccitoɗaa ceede ɗe min tawi nder bootooji amin illa Kanaana ɗeen, min ngartirii ɗe to ma? Ndelle noy min mbujjirta cardi naa kaŋŋe ley suudu joomii amin? 9 Mo horde ndeen tawaa to muuɗum hakkunde maccuɓe maa fuu, joomum waree de minen heddiiɓe du min laatoo maccuɓe maaɗa.
10 O wi'i:
— Ayyo, joonin ɗum laatortoo hono no kaalirɗon noon: tawraaɗo horde ndeen fu laatoo maccuɗo am, ammaa heddiiɓe ɓeen kaa njoofee.
11 Ɓe karii, ɓe njippini bootooji maɓɓe de mono fuu omti bootooru muuɗum. 12 Gollanoowo Yuusufi oon fuɗɗiri bootooru mawniiwo oon, ina filoo faa yottii Benyamin, minyiiwo oon. De inan, horde ndeen ina woni ley bootooru minyiiwo oon. 13 Nde ɓe nji'unoo ɗum fu, ɓe ceeki kaddule maɓɓe. Mono fuu rimndi araawa muuɗum, ɓe njeccii ley huɓeere toon.
No Yuusufi anndintiniri ɓe hoore muuɗum
14 Yahuuda e sakiraaɓe mum ngarti suudu Yuusufi. Ɓe tawti Yuusufi ɗo ɓe mbayrunoo ɗum ɗoon. Ɓe caami e leydi yeeso muuɗum.
15 O wi'i ɓe:
— Ko ngaɗuɗon ɗuum wo ɗume? On anndaa gorko hono am ina tiima naa?
16 Yahuuda jaabii, wi'i:
— Joomii amin, ɗume min mbi'ata? Ɗume min mbaawi haalude? Noy min ngaɗata ko min laamna ko'e amin? Laamɗo wannginii hakke amin. Joomii amin, min maccuɓe maa, minen e mo horde ndeen tawaa e junngo muuɗum oon fuu.
17 Ammaa Yuusufi jaabii, wi'i:
— Laamɗo hiinam waɗude noon! Gorko mo horde ndeen tawaa e junngo mum oon, kam tan laatotoo maccuɗo am. Onon kaa, kootee to baammon e jam.
18 Yahuuda ɓattitii mo, wi'i:
— Miɗo ŋaare joomam! Hettina faa maccuɗo maa haala konngol gootol. Taa metteɗaa e maccuɗo maa. Si goonga wo a hono Fira'awna. 19 Joomam, aan ƴami maccuɓe maa yalla ina njogii baaba e minyiiwo. 20 De min mbi'i joomii amin miɗen njogii baaba e minyiragel korsungel ngel o heɓi ley nayeewu makko. Mawniigel maayii, kanngel tan baabiigel heddorii e reedu inniigel, de ingel horsi e baabiigel sanne. 21 Ndeen mbiiɗaa maccuɓe maa ngaddane ngel faa njiiraa ngel gite maa. 22 Min njaabii joomii amin, min mbi'i ma suka oon waawaa seedude e bammum, sabo nde o seedi e baabiiko fuu, maayan. 23 Ndeen mbiiɗaa maccuɓe maa «Si minyii mooɗon oon wardaay e mooɗon, on keɓataa yi'ude kam katin.» 24 Nde min kootunoo to baaba amin, maccuɗo maa oon, min kaaltanii ɗum haalaaji joomii amin ɗiin. 25 Baaba amin wi'i: «Coƴƴee, coodanon en nyaamri seeɗa.» 26 Min mbii: «Min mbaawaa yaade, sanaa tawee minyii amin oon ina wondi e amin. Sabo min mbaawaa yottaade gorko oon si minyii amin oon waldaa e amin.» 27 De caggal ɗuum, baaba amin, maccuɗo maa oon, wi'i: «Oɗon anndi jom suudu am oon rimanaay kam si wanaa ɓiɓɓe ɗiɗo. 28 Gooto oon heddaaki, mbi'umi: Sikke fuu walaa o taƴaama, mi yi'aay mo katin. 29 Oɗon njiɗi teetude kam o du. Si won bone kewtiiɗo mo fu, on ngaɗan miin gorko mawɗo jom ndanandi mi maayda e mettorgal ɓernde.»
30 Noy mbaawrumi yeccoraade to baabam, maccuɗo maa oon, tawee suka oon waldaa e amin. Si goonga, nguurndam makko e nguurndam muuɗum haɓɓodi. 31 Sikke walaa, si o yi'aay suka oon, o maayan. Min mbardan baaba amin, gorko mawɗo jom ndanandi oon mettorgal ɓernde. 32 Miin maccuɗo maa du, mi waɗani baabam aadi, suka oon ƴiiƴam muuɗum wona dow hoore am. Mbi'umi si mi wartiraay mo fu, feloore majjum yowoto dow hoore am haddi nguurndam am fuu. 33 Joonin kaa joomam, miɗo nyaage, accu maccuɗo maa laatoo loomtuɗo suka oon. Suka oon hootida e mawniraaɓe muuɗum. 34 Noy mbaawrumi hootirde to baabam, tawee suka oon waldaa e am. Miɗo hula yi'ude torra kewtotooɗo baabam oon.