Haala jahaangal ɗiɗaɓal Misira
43
1 Rafo ngoon ɓeydii mawnude e leydi maɓɓe ɗoon. 2 Nde ɓe timminnoo nyaamri maɓɓe ndi ɓe keɓoynoo Misira ndiin fu, baabiiɓe wi'i ɓe:— Coƴƴee, coodanowon en nyaamri seeɗa.
3 Yahuuda jaabii mo, wi'i:
— Gorko oon tindiniri min e semmbe, wi'i min, min nji'ataa yeeso muuɗum si minyii amin oon waldaa e amin. 4 Si a jaɓii minyii amin oon yaada e amin, min coodanoyte nyaamri. 5 Ammaa si a jaɓaay du, min njahataa, sabo gorko oon wi'i min, min nji'ataa yeeso muuɗum si minyii amin oon waldaa e amin.
6 Israa'iila (bi'etenooɗo Yaakuuba) wi'i:
— Ko waɗi de ngaddanɗon kam torra o, kaalanɗon gorko oon oɗon ngoodi minyiiwo goɗɗo?
7 Ɓe njaabii, ɓe mbi'i:
— Gorko oon ƴamii min dow haala suudu baaba amin sanne, o wi'i: «Baammon ina wuuri naa? Oɗon njogii minyiiwo naa?» Tilay min njaaborii mo. Ndelle miɗen mbaawnoo faamude yalla o wi'an min ngaddowa minyii amin naa?
8 Ndeen Yahuuda wi'i bammum Israa'iila:
— Accu suka oon yaada e am. Min njahan heɓa mbuuren taa maayen rafo, minen e maaɗa e ɓiɓɓe amin fuu. 9 Mi hokkan yonki saabe yonki makko. Si mi wartiraay mo to maa, kokkumaami mo fu, feloore majjum yowotoo dow hoore am haddi nguurndam am fuu. 10 Si goonga, si min neeɓaayno ɗo fu, tawan min ngartiino ɗiɗaɓerde.
11 Baabiiɓe Israa'iila, wi'i ɓe:
— Si tilay wo noon worri fu, inan no ngaɗoton: si oɗon njaha fu, ngattee e gineeji mon kulle ittaaɗe e leydi men. Kooƴee, kokkowon gorko oon nebbam leɗɗe seeɗa e njuumndi seeɗa e ɗakkere uurnde e tigaaje e kuƴe. 12 Njaaree ceede ɗe tawɗon ley bootooji mon ɗeen, wooɗi du kooƴon ceede goɗɗe. Ina waawi tawee wo ɗum boofi. 13 Njaadee e minyii on oon, coƴƴee to gorko oon. 14 Laamɗo Jom baawɗe hokku on hinney yeeso makko, o hokkita on sakiike mon e Benyamin. Naa du si mi waasan ɓiɓɓe am fu, mi waasa ɗum'en.
Jiidal Yuusufi e sakiraaɓe mum
15 Worɓe ɓeen njaadi e dokkal ngaal e ko foti kile ɗiɗi ceede ɗe ɓe njeynoo yaarude. Ɓe kooƴi Benyamin du, ɓe njehi Misira, ɓe njottii yeeso Yuusufi.
16 Nde Yuusufi yiinoo Benyamin ina wondi e maɓɓe ndeen, wi'i golloowo ardiiɗo wuro oon:
— Yaaru worɓe ɓe ley suudu, kirsaa daaba, moƴƴinaa, sabo ɓe nyaamndan e am hannden hakkunde naange.
17 Gorko oon ɗowtorii no Yuusufi wi'iri noon, nanni worɓe ɓeen ley suudu Yuusufi. 18 Ko ɓe nannaa ley suudu Yuusufi ɗuum hulɓinii ɓe. Ɓe mbi'i:
— Ko ɓe ngatti en ley suudu ɗuum, tawan wo saabe ceede gattanooɗe ley bootooji meeɗen e kootol men aranol ɗeen. En nannaama faa ɓe mbi'a wo en wuyɓe, ɓe nannga en, ɓe ngaɗa en maccuɓe, ɓe kooƴa araaji men.
19 Ndelle, ɓe ɓattitii golloowo ardiiɗo wuro Yuusufi oon, ɓe kaaldi e muuɗum ley dammbugal suudu. 20 Ɓe mbi'i:
— Accaa hakke joomii amin, arande min ngariino faa min cooda nyaamri. 21 Nde min njippinoo to min mbaalata toon, min omti bootooji amin, de gooto fuu tawii ceede ko fotata e ceede muuɗum ley bootooru mum. Min ngartirii ceede ɗeen. 22 Min ngardii du e ceede goɗɗe faa min cooda nyaamri. Min anndaa gattuɗo ceede ɗeen ley bootooji amin.
23 Oon jaabii, wi'i:
— Mbaaltinee hakkillooji mon, taa kulee. Laamɗo mon, Laamɗo baaba mooɗon, kam watti jawdi ndiin ley bootooji mon. Ceede mon ɗeen yottake kam.
Caggal ɗuum oon hokkiti ɓe Simeyon. 24 Gorko oon nanni ɓe ley suudu Yuusufi. O hokki ɓe ndiyam ɓe loota koyɗe maɓɓe, o nyaamni araaji maɓɓe. 25 Ɓe cegilii dokkal maɓɓe ngal ɓe ngaddani Yuusufi ngaal fadde muuɗum e wartude hakkunde naange, sabo ɓe paamii ɗoon ɓe nyaamdata. 26 Nde Yuusufi wartunoo ley suudu ndeen, ɓe kokki ɗum dokkal maɓɓe ngaal, ɓe cujidani ɗum. 27 O jowti ɓe, o ƴami jam maɓɓe, o wi'i:
— Kori jam ina wondi e baaba mon, gorko mawɗo mo kaalɗon haala muuɗum oon? Imo wuuri naa?
28 Ɓe njaabii, ɓe mbi'i:
— Baaba amin, maccuɗo maa oon, ina woni e jam. Faa hannden imo wuuri.
— O woni minyii mooɗon mo kaalunoɗon haala muuɗum oon naa?
O ɓeydi, o wi'i:
«Ɓiyam, Laamɗo waɗane hinney!»
30 Ɓernde makko hecciɗi nde o yiinoo minyiiko ndeen, o deƴƴinii, o filii nokku ɗo o woya. O naati fukkordu makko, o woyi. 31 O wuyɓii, o yalti. Nde o waaltinnoo ɓernde makko ndeen, o wi'i: «Ndottee ngaddee bottaari!». 32 Ndeen o hokkaa e feere makko, kamɓe du, ɓe kokkaa feere maɓɓe. Misirankooɓe wonduɓe e makko ɓeen du, kokkaa feere muɓɓen. Misirankooɓe njeyaano nyaamdude e Ibraninkooɓe sabo Misirankooɓe ina ndardannoo ɓe wo ɓe tuunɓe. 33 Sakiraaɓe ɓeen njoƴƴiniraa yeeso Yuusufi hono no ɓe kecconduri noon: mawniiwo oon artii, koddaajo oon sakitii. Ɗum haayɗinii ɓe, ɓe keddii iɓe ƴeewundura. 34 Ɓe ɓattinanaa le'e joƴƴinaaɗe yeeso Yuusufi ɗeen, mono e maɓɓe fuu e le'al muuɗum, ammaa le'al Benyamin ngaal ina ɓuri keddiiɗe ɗeen kile joy. Noon ɓe nyaamdiri e Yuusufi, ɓe njardi e muuɗum du, faa ɓe fuu ɓe ceyii.