No Yaakuuba neliri ɓiɓɓe muuɗum Misira
42
1 Nde Yaakuuba maatunoo neema ina heɓee Misira fu, wi'i ɓiɓɓe muuɗum:— Ko waɗi de oɗon njooɗii oɗon ƴeewundura?
2 O wi'i:
— Mi nanii neema ina woni Misira. Njehee, coodonowee en nguurey heɓa mbuuren, taa maayen rafo.
3 Sakiraaɓe Yuusufi sappo ɓeen njehi Misira faa coodowa neema. 4 Ammaa Yaakuuba accaay Benyamin, minyoo Yuusufi oon yaadi e maɓɓe. Sabo o wi'i ina hasii si oon yehii fu, masiiba hewtan ɗum. 5 Ɓiɓɓe Israa'iila ngardi e woɓɓe warɓe faa cooda, sabo rafo waɗii e leydi Kanaana ndiin.
Jiidal Yuusufi e sakiraaɓe muuɗum
6 Joonin Yuusufi laatake hooreejo leydi Misira, wo kam sonnirta yimɓe leydi ndiin fuu neema. Sakiraaɓe makko ɓeen ngari cujidani mo.
7 Yuusufi yi'i mawniraaɓe muuɗum ɓeen. Nde o yi'unoo ɓe fu, o annditi ɓe, ammaa o waɗi hono o anndaa ɓe. O jawani ɓe, o wi'i:
— Toy ƴuuroton?
Ɓe njaabii mo, ɓe mbi'i:
— Wo leydi Kanaana min ƴuwi. Min ngarii faa min cooda neema.
8 Ndelle Yuusufi annditi sakiraaɓe muuɗum, ammaa ɓeen annditaay mo. 9 Ndeen Yuusufi miccitii koyɗi ɗi hoyɗunoo dow maɓɓe ɗiin, de wi'i ɓe:
— Onon, wo on horooɓe leydi, on ngarii faa ndaaron lokkaaku leydi ndi.
10 Ɓe njaabii, ɓe mbi'i:
— Joomii amin, wanaa noon! Maccuɓe maa wo ngaru faa cooda nyaamri. 11 Min fuu, wo min baaba gooto, miɗen koolnii. Minen maccuɓe maa, min nganaa horooɓe leydi.
12 O jaabii ɓe, o wi'i:
— Wanaa koy! Wo on ngaru faa ndaaron lokkaaku leydi ndi.
13 Ɓe njaabii, ɓe mbi'i:
— Minen maccuɓe maa ɓe, wo min sakiraaɓe sappo e ɗiɗo min ngonnoo. Min fuu, min kawtuɓe baaba ley leydi Kanaana. Koddaajo amin oon ina toon hannden to baaba amin de gooto amin oon kaa heddaaki.
14 Yuusufi jaabii, wi'i:
— Ɗum saabii de mbi'umi wo on horooɓe. 15 Inan no ndaartindortoomi on: Mi hunorake nguurndam Fira'awna, on njaltataa ɗo si koddaajo mooɗon oon waraay. 16 Nelee gooto mooɗon yaha waddowa mo. Onon heddiiɓe ɓeen, on uddete faa haalaaji mon ɗiin ndaartinee yalla oɗon ngoodi goonga. Si on ngaɗaay noon fu, mi hunorake nguurndam Fira'awna wo on horooɓe.
17 O watti ɓe, ɓe fuu ley kasu faa waɗi balɗe tati.
18 Nyannde tataɓerde ndeen, Yuusufi wi'i ɓe:
— Inan no ngaɗoton de mbuuron, sabo miin wo mi kuloowo Laamɗo. 19 Si on goongalaaɓe fu, gooto mon heddoo ley suudu kasu ɗo. Onon heddiiɓe ɓeen njaaranee cuuɗi mon jolbuɗi ɗiin nyaamri. 20 Ngaddanowee kam minyii mooɗon oon, heɓa haalaaji mon ɗiin ngoonɗinee, de kison maayde.
Si goonga ni, ɗum hewtake en sabo en mboniino e sakiike men nde ngattunoɗen ɗum e torra ndeen. O filake njurmoɗen mo sanne de en njaɓaay. Ɗum waɗi de torra o hewtii en.
22 Ruben wi'i ɓe:
— Wanaa mi wi'iino on taa ngaɗon suka oon ko boni naa? De on njaɓaay. Ndelle joonin, ƴiiƴam makko ina woni dow meeɗen.
23 Ɓe paamaay Yuusufi ina nana ko ɓe kaalata ɗuum, sabo nantinoowo wonnoo hakkunde maɓɓe. 24 Yuusufi woɗɗii ɓe de woyi.
Caggal ɗuum o warti, o haaldi e maɓɓe. O nanngi Simeyon, o haɓɓi ɗum yeeso maɓɓe.
Haala yeccagol sakiraaɓe Yuusufi Kanaana
25 Caggal ɗuum, Yuusufi yamiri gooto maɓɓe fuu bootooru muuɗum hebbinee nyaamri de ceede muuɗum ngattee ley toon. Wooɗi du ɓe kokkee njooɓaari. Noon o waɗani ɓe. 26 Ndeen ɓe ndimndi nyaamri ndiin araaji maɓɓe, ɓe ndilli. 27 To ɓe mbaalowii toon, gooto maɓɓe omti bootooru muuɗum faa nyaamna araawa mum. Wakkati oon, o yi'i ceede makko e hunnduko bootooru nduun. 28 O wi'i sakiraaɓe makko:
— Ceede am ngattitaama e bootooru am. Inan ɗe!
Ɓerɗe maɓɓe taƴi. Ɓe kuli, ɓe ƴamunduri:
«Ɗume woni ko Laamɗo waɗi en ɗuum?»
29 Ɓe njottii leydi Kanaana to baabiiɓe Yaakuuba, ɓe pillanii ɗum ko hewtii ɓe ɗuum fuu. Ɓe mbi'i:
30 — Gorko laamiiɗo leydi oon sattinanii min sanne. O ndaardii min hono wo min horooɓe leydi ndiin. 31 Min njaabii mo, min mbi'i wo min yimɓe hoolniiɓe. Min mbi'i min nganaa horooɓe. 32 Min mbi'i wo min sappo e ɗiɗo hawtuɓe baaba gooto, ammaa gooto amin heddaaki, wooɗi koddaajo amin du ina heddodii e baaba amin ley leydi Kanaana. 33 Ndeen gorko laamiiɗo leydi oon wi'i min: «Inan no paamirammi wo on hoolniiɓe: njoppanee kam gooto mooɗon, kooƴanon cuuɗi mooɗon njolbuɗi ɗiin ko kaajaa, de njahon». 34 Ngaddonon kam minyii mooɗon, ndeen mi faaman on nganaa horooɓe, wo on hoolniiɓe. Ndeen mi hokkitan on sakiike mon oon, de ngaɗon haajuuji mon e leydi ndi.
35 Wooɗi, ɓe puɗɗi waylude bootooji maɓɓe. De ko ɓe mbaylata ɗi ɗuum, inan ceede mono fuu ley bootooru muuɗum! Nde kamɓe e baabiiɓe njiinoo ceede ɗeen fu, ɓe kuli. 36 Baabiiɓe Yaakuuba wi'i ɓe:
— On njiɗu mursinde kam ɓiɓɓe am! Yuusufi heddaaki, Simeyon du heddaaki, de joonin on teetan kam Benyamin. Ɗum fuu ɗum saami dow hoore am.
37 Ndeen Ruben wi'i bammum:
— Si mi wartiranaay ma mo fu, mbaraa ɓiɓɓe am ɗiɗo ɓeen. Wattu mo e junngo am, de mi wartirante mo.
38 Oon jaabii, wi'i:
— Ɓiyam o yaadataa e mooɗon. Sabo mawniiko maayii, kanko tan heddii. Si won torra kewtiiɗo mo e laawol ngool fu, ɗum waɗan faa miin gorko mawɗo jom ndanandi mi maayda e mettorgal ɓernde.