Haala koyɗi Fira'awna
41
1 Duuɓi ɗiɗi caggal majjum, Fira'awna hoyɗi ina darii hunnduko maayo manngo wi'eteengo Nil. 2 De inan na'i jeɗɗi payɗi, belɗi ndaarude njalti ley maayo ngoon. Iɗi ndura daande maayo. 3 Caggal ɗuum na'i jeɗɗi goɗɗi, ɗi mbelaa ndaarude, pooƴuɗi, njalti ley maayo ngoon, ngari ndarii ɗakkol majji. 4 Na'i jeɗɗi ɗi mbelaa ndaarude, pooƴuɗi ɗiin, nyaami na'i jeɗɗi belɗi ndaaruude, payɗi ɗiin. Ndeen Fira'awna fini. 5 Caggal ɗuum, o ɗaantii, o hoyɗi katin, inan ƴommbal gootal saawti butaali jeɗɗi ɓutti lobbi. 6 De caggal majji du butaali jeɗɗi cewɗi, ɗi henndu lettugal ɗaylini, njalti. 7 Butaali cewɗi ɗiin moɗi butaali jeɗɗi ɓutti lobbi ɗiin. Ndeen Fira'awna finti, tawi wo ɗum koyɗol. 8 Beetee Fira'awna fini ina wemmbaa. O yamiri daggadaaɓe e jom'en hakkillo Misira fuu noddee. O fillanii ɓe koyɗi makko ɗiin de fay gooto waawaay fiirtande mo ɗi.9 Ndeen kokkoowo njaram oon wi'i Fira'awna:
— Hannden kaa mi miccitake boofi am. 10 Joomam Fira'awna, a tikkaniino maccuɓe maa, miin e mawɗo defooɓe neema oon, de nannguɗaa min, ngattuɗaa ley suudu hooreejo kasu. 11 Jemma gomma min ɗiɗo fuu, min koyɗi, mono fuu koyɗol mum e maanaa muuɗum. 12 Miɗen ngondunoo toon e suka jokkolle Ibraninkeejo, maccuɗo hooreejo kasu oon. Min kaalani mo koyɗi amin de o fiirtani min ɗi, mona fuu fodde koyɗol mum. 13 De no o fiirtiri ɗi fu, wo noon jaati ɗi laatorii: miin, mi soƴƴinaama nokku am, gooto oon du, ɓoggol ɓilaa e daande muuɗum de maayi.
14 Nden Fira'awna wi'i Yuusufi noddowee. Ɓe njehi law ɓe mburtini mo ley kasu toon. O femmbaa, o ɓoornii kaddule kese, de o yehi yeeso Fira'awna.
15 Oon wi'i mo:
— Mi hoyɗii koyɗol ammaa yimɓe fuu ndonki fiirtude ngol. De mi nanii aan kaa si a fillanaama koyɗol fu, aɗa waawi fiirtude ngol.
16 Yuusufi jaabii Fira'awna, wi'i:
— Miin, mi waawaa, ammaa Laamɗo ina waawi humpitinde ma ɗum faa hakkillo maa waaloo.
17 Ndeen Fira'awna wi'i Yuusufi:
— Mi hoyɗii miɗo darii hunnduko maayo Nil. 18 Ndeen na'i jeɗɗi payɗi, belɗi ndaarude njalti ley maayo ngoon, iɗi ndura ɗakkol maggo. 19 Caggal ɗuum na'i jeɗɗi goɗɗi njalti. Wo ɗi pooƴuɗi, bonɗi alhaali sanne, ɗi mbelaa ndaarude, abada mi yi'aay hono majji bonde alhaali ley leydi Misira. 20 Na'i pooƴuɗi, bonɗi alhaali ɗiin nyaami na'i jeɗɗi payɗi arandeeji ɗiin. 21 Nde ɗi nyaamunoo ɗiin ndeen, nanndaay yalla fay huunde ina woni ley deedi majji sabo ɗi keddake iɗi pooƴi. Ndeen pinumi. 22 Nji'umi katin ley koyɗol ƴommbal gootal saawti butaali jeɗɗi ɓutti, lobbi. 23 Caggal majji ɓutaali jeɗɗi joorɗi, cewɗi, ɗi henndu lettugal ɗaylini, njalti. 24 Butaali joorɗi ɗiin moɗi butaali jeɗɗi lobbi ɗiin.
Wooɗi, mi fillanake ɗum daggadaaɓe de fay gooto waawaay fiirtande kam ɗum.
25 Yuusufi jaabii Fira'awna, wi'i:
— Koyɗi ɗi Fira'awna hoyɗi ɗiin wo huunde wootere. Laamɗo humpitii Fira'awna ko waɗoyta. 26 Na'i jeɗɗi lobbi ɗiin wo duuɓi jeɗɗi. Butaali jeɗɗi ɗiin du wo duuɓi jeɗɗi, wo ɗum koyɗol gootol. 27 Na'i jeɗɗi pooƴuɗi, bonɗi alhaali cakitiiɗi njalti ɗiin, e butaali jeɗɗi cewɗi ɗi henndu lettugal ɗaylini ɗiin wo duubi jeɗɗi. Ɗum ɗiɗum fuu maanaa majjum woni rafo duuɓi jeɗɗi. 28 Fira'awna kaananke, hono no mbiirumaami wo Laamɗo ɓanginani ma ko waɗata. 29 Duuɓi jeɗɗi haarannde mawnde waɗan ley leydi Misira fuu. 30 Caggal ɗuum duuɓi jeɗɗi rafo njokkan faa yeggitee yalla leydi Misira haariino. Rafo torran leydi ndiin. 31 Haarannde waɗunoonde ndeen yeggitete saabe no rafo ngoon fotata nyaaɗude. 32 Ko koyɗol ngool wari to Fira'awna kile ɗiɗi ɗuum, ɗum hollii Laamɗo siinii waɗude ko fodii ɗuum. Laamɗo waɗan ɗum law. 33 Joonin le, Fira'awna ndaar neɗɗo jom hakkillo e faamu, ardinaa ɗum leydi Misira. 34 Ina haani Fira'awna suɓoo woɓɓe faa ardina ɗum'en leydi ndi faa ɓe njaɓa haɓɓere gawri wootere ley kaɓɓe joy fuu. Ɓe ngaɗiraa noon e leydi Misira ndiin ley duuɓi haarannde jeɗɗi ɗiin. 35 Fira'awna hawjoo ɓe, ɓe kawrondira nguureeji ley duuɓi jeɗɗi garooji, ɓe ngaɗa beembe alkama. Ɗum laatoo nguureeji desaaɗi ley kuɓeeje. 36 Nguurey oon laatanoo leydi Misira ndesaari ley duuɓi rafo jeɗɗi ɗiin, heɓa taa rafo ngoon timmina leydi ndiin.
No Yuusufi laatorii hooreejo ley leydi Misira
37 Haala kaan weli Fira'awna e gollooɓe muuɗum fuu.
38 Fira'awna wi'i:
— Yalla en keɓan neɗɗo mo Ruuhu Laamɗo woni e muuɗum hono gorko o naa?
39 Fira'awna haali katin wi'i Yuusufi:
— Saabe ko Laamɗo anndini ma ɗuum, walaa fuu goɗɗo gooduɗo hakkillo e faamu hono ma. 40 Aan dawranta ɓaade am. Yimɓe am fuu ɗowtanto ko njamirɗaa. Si wanaa jooɗorgal laamu am du walaa fu ko ɓurdumaami.
41 Fira'awna wi'i Yuusufi katin:
— Inan mi ardinii ma dow leydi Misira fuu.
42 O itti hootonnde makko, o ɓoorni nde Yuusufi. O ɓoorni ɗum kaddule kese ɗaatuɗe, o waɗani ɗum koɗol kaŋŋe.
43 Caggal ɗuum o waɗɗini ɗum torkooru makko ɗiɗaɓurdu. Yimɓe ina ƴeewnoo yeeso muuɗum, ina mbi'a:
— Ndikkinee!
Noon Fira'awna waɗiri mo hooreejo dow leydi Misira fuu.
44 O wi'i Yuusufi:
— Miin woni Fira'awna. Gooto fuu gollataa fay huunde e leydi Misira si wanaa aan hokki joomum laawol.
45 Ndeen Fira'awna noddiri Yuusufi Safnata-Paneya. O ɓaŋani ɗum Asanata ɓii Potifera, almaami huɓeere Ona. Noon laamu Yuusufi tabitiri ley leydi Misira fuu. 46 Yuusufi na tawraa duuɓi 30 nde fuɗɗannoo gollande Fira'awna, kaananke Misira ndeen. Yuusufi seedi e makko, yehi yiiltowii ley leydi Misira fuu. 47 Ley duuɓi haarannde jeɗɗi ɗiin, leydi ndiin waɗi barke sanne. 48 Ley duuɓi jeɗɗi ɗiin o hawrunduri nguurey fuu ley kuɓeeje. Ley wuro fuu nguureeji keɓaaɗi ɗakkol muuɗum, ndesaa ley muuɗum. 49 Yuusufi hawrunduri alkama faa heewi hono njaareendi maayo, faa seli limude sabo waawaa limeede. 50 Fadde hitaande rafo ndeen warude, Asanata, ɓii Potifera almaami Ona oon, rimani Yuusufi ɓiɓɓe worɓe ɗiɗo.
51 O inndiri afo oon Manasa (ɗum na fiirta «imo waɗa faa mi yeggita»). O wi'i:
— Laamɗo yeggintinii kam tampiriiji am ɗi keɓumi ley suudu baabam ɗiin fuu.
52 Minyiiwo oon, o inndiri ɗum Efrayim (ɗum na fiirta «ɓeyngu»). O wi'i:
— Laamɗo hokkii kam ɓeyngu ley leydi ndi torraami e muuɗum. 53 Duuɓi haarannde jeɗɗi leydi Misira ɗiin kiɓɓi. 54 Ndeen duuɓi rafo ɗiin puɗɗi hono no Yuusufi sapporinoo noon. Rafo ngoon waɗi e leyɗe ɗeen fuu, ammaa ley leydi Misira fuu ko nyaametee ina woodi.
55 Nde rafo ngoon sattunoo e leydi Misira fu, yimɓe ɓeen fuu mbullitii Fira'awna ko nyaama. O jaabii Misirankooɓe fuu, o wi'i:
— Njehee to Yuusufi, ngaɗon ko wi'i on fuu.