No Yuusufi fiirtiri koyɗi kasunkooɓe ɗiɗo
40
1 Caggal ɗuum, gollanooɓe Fira'awna ɗiɗo mettini ɓernde muuɗum. Gooto wo mawɗo hokkooɓe njaram, gooto du wo mawɗo defanooɓe mo. 2 Fira'awna ɓernani battaa'en muuɗum ɗiɗo ɓeen, kokkoowo njaram e kokkoowo nyaamdu oon. 3 O yamiri ɓe uddee ley suudu hooreejo kasu, to Yuusufi kasaa toon. 4 Hooreejo kasu oon halfini ɓe e juuɗe Yuusufi faa reena ɓe. Battaa'en ɓeen neeɓi e juuɗe seeɗa.Haala koyɗi battaa'en
5 Jemma gomma mawɗo hokkooɓe njaram e mawɗo defooɓe neema, ɓe ɗiɗo fuu, ɓe koyɗi ley kasu toon. Mono fuu e koyɗol muuɗum, koyɗol fuu e maanaa muuɗum. 6 Beetee, Yuusufi wari to maɓɓe, tawi iɓe ɓalinii.
7 O ƴami ɓe:
— Ɗume metti on hannden?
8 Ɓe njaabii mo, ɓe mbi'i:
— Min koyɗii koyɗi de fay gooto waawaa fiirtude ɗi.
Ndeen Yuusufi jaabii ɓe, wi'i:
— De wanaa Laamɗo woni piirtoowo koyɗi naa?
— Kaalanee kam ɗi!
9 Mawɗo hokkooɓe njaram oon haalani Yuusufi koyɗol muuɗum:
10 — Mi hoyɗii cabiihi ki liccoy tatoy ina darii yeeso am. Ki waɗi piindi, ki rimi, ki ɓenndi. 11 Miɗo jogii yardude Fira'awna. Nanngumi bukki ɗiin, ɓoosumi ɗi ley yardude Fira'awna ndeen, tummbumi nde e juuɗe makko.
12 Yuusufi wi'i mo:
— Inan ko koyɗol ngol hollata: Liccoy tatoy koy ngoni balɗe tati. 13 Ley balɗe tati garooje ɗe, Fira'awna ɓantete. O soƴƴinte nokku maa, de a tummban yardude e juuɗe Fira'awna hono no mboowrunoɗaa noon. 14 Ammaa miɗo ŋaare, nde keɓuɗaa newnaneede fu, miccoɗaa miɗo wondunoo e maaɗa, ngaɗanaa kam moƴƴere, kaaldaa e Fira'awna heɓa mi ƴuwa e nokku o. 15 Si goonga, wo mi bujjowaaɗo faa leydi Ibraniyankooɓe, wooɗi fay e leydi ndi du, walaa ko ngaɗumi ko wattata kam e kasu.
16 Nde mawɗo defooɓe oon yi'unoo Yuusufi fiirtii koyɗol ngool, tawi maanaa maggol na wooɗi fu, wi'i ɗum:
— Miin du, mi hoyɗii. Ley koyɗol ngol nji'umi miɗo ronndii kandeeje tati kebbinaaɗe buuru. 17 Sii nyaamduuji keewɗi ɗi Fira'awna nyaamata fuu ina ngoni ley hanndeere dowuure ndeen. De pooli ina coppa nder mayre.
18 Yuusufi jaabii, wi'i:
— Inan ko ngol fiirti: Kandeeje tati ɗeen wo balɗe tati. 19 Ley balɗe tati Fira'awna senndan hoore maa e daande maa. O ɓilete e lekki. Pooli du coppan teewu maa.
20 Nyalaande tataɓerde ndeen ina hawra e nyalaande rimeede Fira'awna. O defani gollooɓe makko ɓeen fuu. O teddini kokkoowo njaram oon e kokkoowo nyaamdu oon hakkunde maɓɓe. 21 O soƴƴini mawɗo hokkooɓe njaram oon nokku muuɗum, de fuɗɗiti ina tummba horde e junngo makko katin. 22 De mawɗo hokkooɓe nyaamdu oon kaa, o haɓɓi ɓoggol e daande muuɗum, o ɓili ɗum hono no Yuusufi fiirtirnoo koyɗol ngool noon.
23 Ammaa kokkoowo njaram oon yeggiti Yuusufi, miccitaaki haalande Fira'awna haala muuɗum.