39
1 Wooɗi, Yuusufi yaaraa Misira. Nde o yaaranoo toon fu, Misiranke bi'eteeɗo Potifaar, mawɗo sordaasiiɓe Fira'awna, soodi mo e juuɗe Ismaa'iilankooɓe wadduɓe mo ɓeen.2 Joomiraaɗo ina wondi e Yuusufi, ko o moƴƴini fuu, gasan. O jooɗii ley ɓaade joomiiko Misiranke oon.3 Oon taykii, yi'i Joomiraaɗo ina wondi e makko. Ko junngo makko moƴƴini fuu, Joomiraaɗo ina barkina ɗum.4 Yuusufi heɓi hoolaare to joomum oon. Oon ɓattini mo e muuɗum, waɗi mo kayboowo ɓaade muuɗum e jawdi muuɗum fuu.5 Nde Yuusufi waɗanoo kayboowo jawdi ndiin fu, Joomiraaɗo barkini ɓaade Misiranke oon saabe muuɗum. Barke oon heddii dow jawdi makko, dow wuro makko e gese makko fuu.6 Ndelle ko o jogii fuu, o halfini ɗum e ley juuɗe Yuusufi. Walaa fuu ko o daaranta sanaa ko o nyaamata.
Tawi le Yuusufi wo jom ŋari, belɗo ndaarude.
7 Nde ɓooytunoo seeɗa fu, dee joomiiko oon deki mo yitere njinngu, wi'i mo:
— War, pukkodoɗen.
8 Yuusufi salii, wi'i dee joomum oon:
— Ndaar, jooman ɓattinii kam hoore muuɗum, o accii huunde fuu ko woni e ɓaade nde e juuɗe am. 9 O ɓuraa kam teddeengal ley ɓaade nde. Walaa fuu ko o haɗi kam ley mayre, sanaa aan taan, sabo wo a jom suudu makko. Ndelle noy ngolliranmi bonanda mawɗo o, mi lutta Laamɗo?
10 Nyannde fuu debbo oon ina haalda e makko heɓa o fukkodoo e muuɗum, de Yuusufi jaɓaay fay wondude e makko nokku gooto. 11 Nyannde gomma Yuusufi naati ley suudu faa golla golleeji muuɗum, tawi neɗɗo fuu walaano toon.
12 Ndeen, debbo oon nanngi saaya makko, wi'i mo:
Fukkoda e am!
Yuusufi yoppidi mo e saaya kaan, doggi, yalti yaasin.
13 Nde o yi'unoo oon yoppidii mo e saaya kaan, doggii, yaltii yaasin fu, 14 o noddi worɓe wuro ngoon, o wi'i:
— Ee! Timmii! En ngaddanaama Ibraninkoowel faa fijira en. O warii faa o yana kam, de toownumi daande am, mbullumi. 15 Nde o nannoo ƴeewniimi, mbullumi fu, o yoppi saaya makko ɗakkol am, o doggi, o yalti yaasin.
— Maccuɗo Ibraninke mo ngaddanɗaa min oon, warii to am faa semtina kam. 18 Nde ƴeewninoomi, mbullumi fu, o yoppi saaya makko ɗakkol am, o doggi, o yalti.
19 Nde joomiiko oon nannoo ko deekum haali, de wi'i «Inan ko maccuɗo maa oon waɗi kam» ndeen, ɓerni, mettaa sanne. 20 O waɗi Yuusufi nanngaa, wattaa ley suudu kasu to kasunkooɓe kaananke ngoni toon. Wo noon Yuusufi kasiraa.
Yuusufi ley kasu
21 Ammaa Joomiraaɗo wondi e Yuusufi, waɗani ɗum moƴƴere. O waɗi hooreejo kasu oon du yiɗi Yuusufi, laatanii ɗum moƴƴuɗo. 22 Oon halfini kasunkooɓe ɓeen fuu Yuusufi. Huunde fuu ko golletee toon wo kam gollinta. 23 Hooreejo kasu oon ndaarantaa fay huunde e ko Yuusufi halfinaa ɗuum, sabo Joomiraaɗo ina wondi e Yuusufi. Ko o anniyii fuu, Joomiraaɗo gaynan ɗum.