No Yahuuda dewliri Tamar
38
1 Wooɗi, e ley nyalaaɗe ɗeen Yahuuda seedi e sakiraaɓe muuɗum, yehi jooɗodowii e gorko bi'eteeɗo Hira jeyaaɗo Adulam. 2 Toon Yahuuda yi'i suka debbo ɓii Kanaaninke bi'eteeɗo Suwa. O ɓaŋi ɗum, o wondi e muuɗum. 3 Debbo oon adi reedu, rimi ɓiɗɗo gorko. Yahuuda inndiri suka oon Er. 4 O adi reedu katin, o rimi ɓiɗɗo gorko, de o inndiri ɗum Onan. 5 Caggal ɗuum, o rimi ɓiɗɗo gorko goɗɗo, o inndiri ɗum Sela. Wakkati Sela rimanoo ndeen, tawi iɓe njooɗii wuro Kesip.6 Nde afo maɓɓe bi'eteeɗo Er oon mawnunoo fu, Yahuuda ɓaŋani ɗum debbo bi'eteeɗo Tamar. 7 Ammaa Er, afo Yahuuda oon, wo o bonɗo e gite Joomiraaɗo. Saabe majjum Joomiraaɗo wari mo.
8 Yahuuda wi'i Onan:
— Hooƴu dee mawna oon, faa mawna oon heɓa ƴuwdi.
9 Onan ina anndunoo si rimdii e debbo oon fu, jeyaa ɓiɓɓe ɓeen. Saabe majjum waɗi nde o fukkodii e debbo oon fu, imo rufa aawdiiri makko e leydi, faa taa o heɓana mawniiko ƴuwdi. 10 Ko o waɗi ɗuum metti Joomiraaɗo, de wari o kanko du.
11 Yahuuda wi'i esum Tamar:
— Jooɗa ley suudu bammaa hono wo a cuddiiɗo gorum faa ɓiyam Sela mawna.
O waɗirii noon sabo o hulii taa Sela du maaya hono no mawniraaɓe muuɗum maayri noon. Ndeen Tamar hooti, jooɗowii suudu bammum.
12 Duuɓi njehi ngarti, ɓii Suwa debbo, jom suudu Yahuuda oon maayi. Caggal ko ɓernde Yahuuda waaltii ɗuum, yehi Timna faa ndaara hesooɓe baali muuɗum. O yaadi e Hira yigiiko Adulamanke oon. 13 Tamar haalanaa, wi'aa: «Inan esa gorko ina yaha Timna faa hesowa baali muuɗum.» 14 Tamar sudditii wudere maayde gorum nde suddinoo ndeen, hooƴi lefol, suddi yeeso muuɗum. O jooɗowii dammbugal Enayim ngonungal dow laawol Timna ngaal. Sabo o yi'ii Sela mawnii, de o hokkaaka ɗum faa laatoo goriiko.
15 Nde Yahuuda yiinoo Tamar ndeen, miili wo debbo woykuuru sabo wo suuɗu yeeso muuɗum. 16 O falii to muuɗum ɗakkol laawol, o ndaari ɗum, o wi'i:
— War ngonden.
Sabo o annditaay yalla oon wo esiiko.
Debbo oon wi'i:
— Ɗume kokkataa kam de ngondaa e am?
17 Gorko oon wi'i:
— Mi neldete damngel ley be'i am.
Debbo oon wi'i:
— Ɗume laatotoo tolma hakkunde meeɗen fadde maa e neldude ngel?
18 Yahuuda wi'i:
— Ɗume kokkanmaami?
Debbo oon wi'i:
— Talkuru ndu innde maa woni e muuɗum e ɓoggol mayru e sawru wonndu e junngo maa nduun.
Yahuuda hokki debbo oon, naaddi e makko, de o hooƴi reedu. 19 Caggal ɗuum, debbo oon ummii dilli, sudditii, de ɓoornii kaddule mum cuddorɗe ɗeen. 20 Yahuuda neldi damngel ngeel yigoo muuɗum Adulamanke faa jaɓana ɗum ko tolminoo e junngo debbo oon. Ammaa yigiiko oon yi'aay debbo oon. 21 Ndeen o ƴami yimɓe wonɓe toon ɓeen, o wi'i:
— Toy debbo woykuuru gonnooɗo dow laawol Enayim oon woni?
Ɓeen mbi'i:
— Debbo woykuuru fuu walaa ɗo.
22 O yeccii to Yahuuda, o wi'i ɗum:
— Mi yi'aay mo. Wooɗi du worɓe wuro ngoon mbi'i kam debbo woykuuru fuu walaa toon.
23 Yahuuda wi'i:
— O jogoo ɗum taa cemten. Inan, mi nelii ma aan e hoore maa jaaraa damngel ngeel, de a yi'aay mo.
24 Caggal lebbi tati, Yahuuda haalanaa, wi'aa:
— Esa debbo Tamar, fijii, wooɗi reedii e fijirde ndeen.
Yahuuda wi'i:
— Njaltinee mo, mbulon mo.
25 Nde ɓe mburtinnoo mo ndeen, o neli esiiko gorko oon wi'ee:
— Wo gorko jeyɗo gineeji ɗi oon reedini kam.
O wi'i katin:
— Ndaaree, moy jeyi talkuru ndu e ɓoggol muuɗum e sawru ndu?
26 Yahuuda annditi ɗum de wi'i:
— O ɓurii kam fonnditaade sabo mi hokkaay mo ɓiyam Sela.
Caggal ɗuum, Yahuuda fukkodaaki e makko katin.
27 Wakkati nde ndimu makko yottinoo ndeen, tawaa funeereeɓe ngoni ley reedu makko. 28 Nde o rimannoo ndeen, junngo cukalel gootel yalti. Debbo dimtinoowo oon haɓɓi gaarawol boɗewol e junngo maggel, wi'i:
— O artii rimeede.
29 Ammaa ngel naattini junngo ngoon de ɗiɗaɓo oon yalti. Dimtinoowo oon wi'i:
— Noy peƴƴitirɗaa faa artuɗaa wurtaade!