Gartol Yaakuuba Baytila
35
1 Caggal ɗuum, Laamɗo wi'i Yaakuuba:— Umma, yahu Baytila, njooɗoɗaa toon, nyiɓanaa kam hirsirde, miin Laamɗo ɓanganɗo ma nde ndoggunoɗaa mawna Isuwa ndeen.
2 Yaakuuba wi'i yimɓe galle muuɗum e wonduɓe e muuɗum fuu:
— Ittee tooruuji ɗi njogiɗon ɗiin, laaɓinee ko'e mon, mbattitee kaddule mon. 3 Ummee, njehen Baytila. Toon nyiɓanten Laamɗo hirsirde, sabo o jaabanake kam wakkati ɓillaare am. Wooɗi du imo wondi e am e laawol ngol njahammi fuu.
4 Ɓe kokki Yaakuuba tooruuji gonɗi e juuɗe maɓɓe ɗiin fuu, e kootone gonɗe e noppi maɓɓe. Yaakuuba ufi ɗum fuu ley lekki mawki ngonki ɗakkol Sikem. 5 Caggal ɗuum, ɓe eggi. Laamɗo du watti kulol e kuɓeeje piiliiɗe ɓe ɗeen fuu, ɗum waɗi fay gooto taaynaay ɓiɓɓe Yaakuuba ɓeen.
6 Yaakuuba e yimɓe muuɗum fuu njottii Luus ɗoon woni Baytila ley leydi Kanaana. 7 O nyiɓi toon hirsirde, o inndiri nokku oon Laamɗo Baytilaa, sabo ɗoon Laamɗo ɓangannoo mo nde o doggunoo mawniiko gorko ndeen.
8 Deboora, bammbunooɗo Rifka oon maayi. Ɓe mooɓi ɗum ɗakkol Baytila ley lekki mawki, de ɓe inndiri ki «lekki gonɗi».
9 Nde Yaakuuba ƴuurunoo Padan-Aram ndeen, Laamɗo ɓangi e muuɗum katin, barkini ɗum. 10 Laamɗo wi'i mo:
— Yaakuuba inndirteɗaa. De a inndirtaake Yaakuuba katin, wo Israa'iila inndirteɗaa.
— Miin woni Laamɗo jom Baawɗe. Ndimaa, ɗuuɗaa. Ƴuwdi maa laatoto lenyol. Lenyi keewɗi ƴuwan e maa. Kaanankooɓe du njaltan e maaɗa. 12 Leydi ndi kokkumi Ibrahiima e Isiyaaka ndiin, mi hokkete ndi. Caggal maa du, mi hokkan ndi ƴuwdi maaɗa.
13 Laamɗo yeccii dow, yoppi mo nokku to haaldi e makko toon. 14 Yaakuuba darni hayre nokku ɗo ɓe kaaldi ɗoon. O joori nebbam dow mayre, o joori du sadaka cabijam. 15 Yaakuuba inndiri nokku to Laamɗo haaldi e muuɗum toon Baytila.
Rimeede Benyamin e maayde Rahiina
16 Ɓe ndilli Baytila. Fadde maɓɓe yottaade Efrata, Rahiina rimi. De ndimu makko tiiɗi.
17 Wakkati ŋatawere makko ndeen, dimtinoowo oon wi'i mo:
— Taa hulu sabo a heɓii ɓiɗɗo gorko katin.
18 Nde o haɓdannoo e yonki ndeen, o inndiri ɓiɗɗo oon Ben-onib. Ammaa baaba suka oon inndiri ɗum Benyaminc. 19 Rahiina maayi, mooɓaa ɗakkol laawol Efrata, ɗum woni Baytilaama. 20 Yaakuuba darni hayre dow saabeere makko. Ɗum laatii maande saabeere Rahiina faa hannden.
21 Israa'iila (bi'etenooɗo Yaakuuba) yehi yeeso, darni hukum mum caggal suudu reenirdu wonndu Eder.
22 Wakkati nde Israa'iila jooɗinoo e leydi ndiin ndeen, Ruben yehi fukkodowii e Bilha korɗo bammum. Israa'iila nani kabaaru oon.
Yaakuuba ina jogii ɓiɓɓe worɓe sappo e ɗiɗo. 23 Ɓiɓɓe Leya ngoni: Ruben e Simeyon e Lewi e Yahuuda e Isakar e Jabulon. Ruben woni afo Yaakuuba. 24 Ɓiɓɓe Rahiina ngoni: Yuusufi e Benyamin. 25 Ɓiɓɓe Bilha korɗo Rahiina oon: Dan e Naftali. 26 Ɓiɓɓe Jilpa korɗo Leya wo: Gad e Asiira. Ɓeen ngoni ɓiɓɓe Yaakuuba rimaaɓe Padan-Aram.
Maayde Isiyaaka
27 Yaakuuba yottii Mamre to bammum Isiyaaka, faa Kiriyat-Arba, ɗum woni Heberon. Wo toon Ibrahiima e Isiyaaka koɗunoo. 28 Duuɓi Isiyaaka fuu wo hemre e capanɗe jeetati (180). 29 O wuuri duuɓi keewɗi e nguurndam kiɓɓuɗam, gaɗa ɗuum o maayi, o hawritowii e maamiraaɓe makko. Ɓiɓɓe makko Isuwa e Yaakuuba mooɓi mo.