No Dina yaniraa
34
1 Dina ɓii Leya debbo mo rimani Yaakuuba oon, yalti faa ndaara ɓiɓɓe rewɓe leydi ndiin. 2 Sikem ɓii Hamor Hewinke laamiiɗo leydi ndiin yi'i mo, nanngi mo, fukkodii e makko e semmbe, tuunni mo, semtini mo. 3 Sikem yiɗi Dina ɓii Yaakuuba debbo oon sanne. O yiɗi oon, o haalani ɗum haalaaji belɗi. 4 Sikem wi'i bammum Hamor:— Filanam suka debbo oon faa mi ɓaŋa.
5 Yaakuuba nani Sikem tuuninii Dina ɓiyum debbo oon, tawi ɓiɓɓe muuɗum worɓe nduroyi dammuuli muuɗum. Yaakuuba deƴƴinii faa ɓe ngarti. 6 Hamor baaba Sikem yehi to Yaakuuba faa haalda e muuɗum. 7 Nde ɓiɓɓe Yaakuuba njaanyunoo fu, nani haala kaan. Ɗum metti ɓe, ɗum haɓɓi ɓe ko'e sanne. Sabo Sikem fukkodake e ɓii Yaakuuba debbo, waɗii ko semtinii Israa'iila, ko haanaa waɗeede. 8 Hamor wi'i ɓe:
— Sikem ɓiyam gorko ina yiɗi suka mon oon sanne. Miɗo nyaagoo on kokkon mo oon, o dewla. 9 Ngaɗen dewle hakkunde men, kokkon min ɓiɓɓe mon rewɓe, onon du adon ɓiɓɓe amin rewɓe. 10 Njooɗodoɗon e amin, leydi ndi laatanoo on ngeɗu. Ngonon ley mayri, njuloɗon e mayri, keɓon du ngeɗu mayri.
11 Sikem wi'i mawniraaɓe Dina e baaba muuɗum:
— Njardanee kam. Ko mbiiɗon fuu, mi hokkan on. 12 Ƴamee kam futte e dokke keewɗe. Mi hokkan on ɗum fuu hono no mbiiruɗon noon, de kokkon kam suka debbo oon, mi dewla.
13 Ɓiɓɓe Yaakuuba njaaborii Sikem e Bammum Hamor hiila, sabo o tuuninii sakiike maɓɓe debbo. 14 Ɓe mbi'i mo:
— Min mbaawaa hokkude sakiike amin debbo gorko mo taadaaki, sabo ɗum semtinan min. 15 Ammaa miɗen mbaawi yardanaade on si on ngaɗii huunde wootere nde: worɓe mon fuu taadee hono amin ni. 16 Ndeen min kokkan on ɓiɓɓe amin rewɓe, minen du, min ɓaŋa ɓiɓɓe mooɗon rewɓe, min njooɗodoo e mooɗon, laatoɗen suudu baaba wooturu. 17 Si on njaɓaay taadaade hono no min mbiiri on noon fu, min kooƴan sakiike amin debbo, min ndilla.
18 Haala maɓɓe weli Hamor e ɓiyum Sikem. 19 Ɓooyaay fey, suka jokolle oon waɗi ko wi'aa ɗuum, sabo o yiɗii ɓii Yaakuuba debbo oon sanne. Tawi o tedduɗo sanne e ley suudu baabiiko. 20 Hamor e ɓiyum gorko Sikem njehi faa dammbugal huɓeere muɓɓen, kaaldi e worɓe huɓeere ndeen, mbi'i:
21 — Yimɓe ɓeen na ngoodi jam. Accen ɓe njooɗoo e leydi men, ɓe njuloo e mayri. Leydi ndi ina yaaji, ina heƴa en fuu. Ɓaŋen ɓiɓɓe maɓɓe rewɓe, enen du, kokken ɓe ɓiɓɓe men rewɓe. 22 Ammaa ɓe njaɓataa njooɗodoɗen faa laatoɗen gootum si wanaa worɓe men fuu taadoo hono no ɓe taadorii noon. 23 Si en ngaɗii noon, wanaa dammuuli maɓɓe e na'i maɓɓe e jawdi maɓɓe fuu laatoto halal meeɗen? En njaɓa ko ɓe mbi'i, ɓe njooɗodoto e men.
24 Yimɓe tawaaɓe e dammbugal huɓeere ɓeen fuu njaɓi haala Hamor e ɓiyum gorko Sikem. Worɓe tawaaɓe toon ɓeen fuu taadii.
25 Wooɗi, balɗe tati caggal ɗuum, iɓe keddii e naawreede. Nyannde ndeen fu, ɓiɓɓe Yaakuuba ɗiɗo, Simeyon e Lewi, mawniraaɓe Dina, kooƴi kaafaaje muɓɓen, naati huɓeere ndeen, njuhi nde, mbari worɓe ɓeen fuu. 26 Hamor e ɓiyum Sikem du mbardaa kaafaahi. Ɓe adi Dina ley suudu Sikem, ɓe ndilli. 27 Caggal ɗuum, ɓiɓɓe Yaakuuba fuu caami e nawnaaɓe ɓeen, ɓe koni huɓeere ndeen, ɓe njomnitii ko sakiike maɓɓe debbo tuunnaa ɗuum. 28 Ɓe kooƴi huunde fuu ko huɓeere ndeen woodi, dammuuli e na'i e araaji e ko tawaa ley gese fuu. 29 Ɓe adi jawdi e sukaaɓe e rewɓe e ko woni ley cuuɗi fuu.
30 Yaakuuba wi'i Simeyon e Lewi:
— On torrii kam, on ngaddanii kam wanyeede ley Kanaaninkooɓe e Perisinkooɓe ɓeen. Miin yimɓe seeɗa tan njogiimi. Si ɓe kawritii, ɓe ummanake kam, ɓe kippake kam fu, mi halkan miin e ɓaade am fuu.
31 Simeyon e Lewi njaabii, mbi'i:
— Yalla sakiike amin debbo ina jeyi ndaardeede hono woykuuru naa?