Hawrugol Yaakuuba e Isuwa
33
1 Yaakuuba hunci gite muuɗum, haynii Isuwa ina warda e yimɓe keme nayo. O fecci sukaaɓe makko ɓeen, o hokki gere maɓɓe Leya, gere du Rahiina, gere du horɓe ɗiɗo ɓeen. 2 O ardini horɓe ɓeen e sukaaɓe muɓɓen, o jokkini Leya e sukaaɓe muuɗum, de o sakintini Rahiina e ɓiyum Yuusufi. 3 Kanko e hoore makko du, o ardii ɓe. Nde o ɓadinoo mawniiko Isuwa ndeen, o sujidi kile jeɗɗi. 4 Isuwa du doggi hawri e makko, mumilii daande makko, muccii mo. Ɓe mboyi. 5 Isuwa hunci gite muuɗum yi'i rewɓe e sukaaɓe ɓeen, wi'i:— Moy en ngoni wonduɓe e maaɗe ɓe?
Yaakuuba jaabii, wi'i:
— Sukaaɓe ɓe, wo ɓe Laamɗo hokkari maccuɗo maa.
6 Horɓe ɓeen ɓattitii, kam'en e sukaaɓe muɓɓen, cujidi. 7 Leya du ɓattitii, kam e sukaaɓe muuɗum cujidi. Caggal ɗuum, Yuusufi e Rahiina, kam'en du ɓattitii, cujidi. 8 Isuwa wi'i:
— Ɗume woni cefe ɗe kawrumi ɗeen fuu?
Yaakuuba jaabii:
— Ɗuum wo faa mi heɓa moƴƴere yeeso maa, aan joomam.
9 Isuwa wi'i:
— Sakiike am, miin miɗo hebbini jawdi. Joga ko njeyɗaa ɗum.
10 Yaakuuba wi'i:
— A'aa, miɗo ŋaare! Si a yardanake kam, nanngu ko kokkumaami ɗuum. Sabo ko njiimi yeeso maa, ɗum nanndii hono wo yeeso Laamɗo nji'umi. A jaɓɓake kam no wooɗiri. 11 Nanngu moƴƴere nde ngaddanmi ma ndeen, sabo Laamɗo barkinii kam, miɗo jogii huunde fuu.
— Ummoɗen njehen, miin mi wonan yeeso.
13 Yaakuuba jaabii mo:
— Joomam, aɗa anndi sukaaɓe ɓeen wo lokkaaɓe, miɗo jogii dammuuli e na'i ɓeyɗi muynooji. Si ɗi coggaama fay nyalooma gooto, dammuuli ɗiin fuu mbaatan. 14 Miɗo ŋaare joomam, jaɓu ardaade maccuɗo maaɗa. Mi yahiran heese heese, mi jokka coggal gonngal yeeso am ngaal e sukaaɓe ɓeen faa kewta to joomam ley leydi Seyiir.
15 Isuwa wi'i:
— Mi accante gere yimɓe wonduɓe e am ɓeen.
Yaakuuba jaabii, wi'i:
— Saabe ɗume? Ko keɓumi moƴƴere yeeso maa, aan joomam ɗuum, heƴii!
16 Nyannde ndeen jaati Isuwa yeccii jokki laawol muuɗum yehi Seyiir. 17 Ammaa Yaakuuba eggi, fonndii Sukot. O mahani hoore makko suudu, o waɗani dammuuli makko buguuji. Ɗum waɗi de nokku oon inndiraa Sukota.
18 Noon Yaakuuba ƴuwiri Padan-Aram, faa yottii huɓeere Sikem wonnde ley leydi Kanaana ndeen e jam. O hoɗi ɗakkol mayre. 19 Ɗo o nyiɓi hukum makko ɗoon, o soodi leydi ndiin buuɗi cardi hemre e junngo ɓiɓɓe Hamor. Hamor woni baaba Sikem. 20 Yaakuuba darni toon hirsirde. O inndiri nde El-Elohe-Israa'iilab.