32
1 Jaango mum, Laban dawi gilla beetee kecco, muccii ɓiɓɓe muuɗum rewɓe e taaniraaɓe muuɗum worɓe, barkini ɗum'en. Caggal ɗuum, o dilli to maɓɓe, o hooti wuro makko.No Yaakuuba segilorii hawrude e Isuwa
2 Yaakuuba du jokki laawol muuɗum. Nde o yahannoo ndeen, maleyka'en Laamɗo kawri e makko. 3 Nde o yi'unoo ɓe fu, o wi'i:
— Ɓe wo konunkooɓe Laamɗo!
O inndiri nokku oon Mahanayima.
4 Yaakuuba waɗi nelaaɓe ardii ɗum njehi to mawnum Isuwa ley Seyiir ɗuum woni leydi Edom. 5 O yamiri ɓe, o wi'i:
— Inan ko mbi'oton joomam Isuwa:
«Inan ko maccuɗo maa Yaakuuba wi'i: Mi jooɗake to Laban, miɗo heddii toon faa joonin. 6 Mi heɓii na'i e araaji e dammucce e maccuɓe e horɓe. Mi nelii yimɓe faa mi humpite, aan joomam, yalla miɗo heɓa yarramuye maa.»
7 Nelaaɓe ɓeen ngarti to Yaakuuba, mbi'i ɗum:
— Min njehii to mawna Isuwa, kam du ina wara faa hawra e maaɗa. Imo wondi e worɓe keme nayo.
8 Yaakuuba huli sanne, wemmbaa. O fecci yimɓe wonduɓe e makko ɓeen pecce ɗiɗi, kam e dammucce e na'i e geelooɗi ɗiin.
9 O wi'itii:
— Si Isuwa yanii e feccere wootere, fiyii nde fu, tawan ɗiɗaɓerde ndeen ina reenii.
10 Yaakuuba wi'i:
— Laamɗo maamam Ibrahiima, Laamɗo baabam Isiyaaka, aan Joomiraaɗo wi'i kam: «Yecca leydi maa e suudu bammaa, mi waɗante moƴƴere!» 11 Miin maccuɗo maa, mi fotaay heɓude hinney e hoolaare nde ngaɗanɗaa kam ndeen fuu. Sabo sawru am tan njoginoomi nde peƴƴannoomi gooruwol Urdun, ammaa joonin mi laatake cefe ɗiɗi. 12 Miɗo ŋaare reenam e junngo mawnam Isuwa, sabo miɗo hula taa o wara, o fiya kam, miin e ɓiɓɓe am e inniraaɓe muɓɓen, o wara min. 13 Aan Joomiraaɗo wi'i kam: «Mi waɗante moƴƴere, mi hebbinan ƴuwdi maa hono njaareendi maayo, ndi limataako.»
14 Yaakuuba waali toon jemma oon. Finti beetee, o itti dokkal ley ko o jogii e junngo makko fuu, o neli mawniiko Isuwa hokkee: 15 be'i debbi keme ɗiɗi e damɗi noogay. Baali debbi keme ɗiɗi e jawɗi noogay. 16 Geelooɗi capanɗe tati ɓireteeɗi e ɓiɓɓe muɓɓen. Na'i debbi capanɗe nay e ga'i sappo. Tefeeji noogay e gorbi sappo. 17 O hokki ɗi maccuɓe makko, coggal fuu yaha e feere muuɗum, o wi'i ɓe:
— Ardee kam, ngaɗon daawre hakkunde coggal e coggal fuu.
18 O yamiri arano oon, o wi'i:
— Si mawnam Isuwa hawri e maaɗa, de ƴami ma: «Wo a maccuɗo moy? Toy njahataa? Moy jeyi coggal gonngal yeeso maa ngaal?» fu, 19 njaaboɗaa, mbi'aa: «Maccuɗo maa Yaakuuba jeyi ngal. Wo ɗum dokkal ngal o neldi joomiiko, Isuwa hokkee. Kanko du imo wara caggal amin.»
20 O wi'i noon ɗiɗaɓo oon e tataɓo oon e soggooɓe cogge ɓeen fuu:
— Inan no kaaldirton e Isuwa si on kawrii e muuɗum, 21 mbi'on mo: «Maccuɗo maa Yaakuuba du ina wara caggal amin.»
Sabo o wiitake: «Mi filoto surdude mo e dokkal teddungal ardotoongal. Caggal ɗuum si min kawrii, na hasii o jaɓɓoo kam.» 22 Dokkal ngaal ardii, de kanko e hoore makko kaa, o waalti e hoɗorde ndeen jemma oon.
Durwo Yaakuuba
23 Ley jemma oon, o ummini rewɓe makko ɗiɗo e horɓe muɓɓen ɗiɗo e ɓiɓɓe makko worɓe sappo e ngo'o ɓeen. O feƴƴintini ɓe feƴƴitirde gooruwol Yabok. 24 Nde o feƴƴintinnoo ɓe ndeen, o feƴƴintini ko o mari fuu. 25 De kanko kaa heddii gaɗa toon.
Ley jemma majjum gorko gomma wari, durwi e makko faa weeti. 26 Nde oon yiinoo waawataa mo ndeen, fiyi mo dow asangal, de asangal makko ngaal silɓi ley durwo maɓɓe ngoon.
27 Gorko oon wi'i:
— Yoppam faa mi dilla, sabo ɓadake weetude.
Ndeen Yaakuuba jaabii mo, wi'i:
— Mi yoppataa ma, si wanaa mbarkinɗaa kam.
28 Gorko oon wi'i mo:
— Noy mbi'eteɗaa?
O jaabii, o wi'i:
— Miɗo wi'ee Yaakuuba.
29 Oon wi'i:
— A inndirtaake Yaakuuba katin. A noddirte Israa'iilab sabo a durwii e Laamɗo, wooɗi e yimɓe du, de keɓuɗaa barke.
30 Yaakuuba ƴami mo, wi'i:
— Haalanam innde maa.
O jaabii, o wi'i:
— Ko saabii lamndiɗaa innde am?
Ndeen oon barkini mo.
31 Yaakuuba wi'i:
— Mi yi'i Laamɗo gite e gite, de ɗuum fuu yonki am hisi.
Saabe majjum, o inndiri nokku oon Paniyel. Ɗuum woni «Yeeso Laamɗo».