No Yaakuuba doggiri to Laban
31
1 Yaakuuba nani ɓiɓɓe Laban ina mbi'a:— Yaakuuba teetii ko baaba meeɗen mari fuu. Wo ley jawdi baaba men o heɓiri jawdi.
2 Yaakuuba taykii tawi yeeso Laban waylitake, wanaa noon ngo worrannoo ɗum.
3 Joomiraaɗo wi'i Yaakuuba:
— Yecca kootaa leydi maamiraaɓe maa to wuro baaba maa. Mi wondan e maaɗa.
4 Yaakuuba neli noddanee Rahiina e Leya, ngara to durdude baali muuɗum ley ladde toon.
5 Yaakuuba wi'i ɓe:
— Mi yi'i yeeso baaba mooɗon waylitake, wanaa noon ngo worrannoo kam. Ammaa Laamɗo baabam ina wondi e am. 6 Oɗon anndi mi golliranii baammon haddu semmbe am fuu. 7 Baaba mooɗon jambake kam, waylitii njobdi am kile sappo. Ammaa Laamɗo jaɓaay o torra kam. 8 Nde o wi'unoo nyaawi laatoto njobdi am ndeen, dammuuli ɗiin fuu ndimi nyaawi. Nde o wi'unoo toddi laatoto njobdi am ndeen du, dammuuli ɗiin fuu ndimi toddi. 9 Nii Laamɗo teetiri baammon dammuuli muuɗum, de hokki kam ɗi.
10 Wakkati hubugol dammuuli, mi yi'ii e koyɗol, kalahali kubooji dammuuli ɗiin wo nyaawi e pantooji e toddi. 11 Maleyka Laamɗo wi'i kam e ley koyɗol: «Yaakuuba!» Nootiimi.
12 O wi'i: «Huncu gite maa, ndaar! Kalahali be'i kubooji dammuuli ɗiin fuu wo nyaawi e pantooji e toddi. Sabo mi yi'ii ko Laban waɗi maa fuu. 13 Miin woni Laamɗo ɓanganɗo ma Baytila, nokku ɗo ndarnuɗaa hayre miccinoore, de mbujuɗaa nde nebbam. Nokku ɗo kunaniɗaa kam ɗoon. Joonin, umma yaltu leydi ndi, yecca suudu bammaa.»
14 Rahiina e Leya njaabii, mbi'i:
— Yalla miɗen keddorii ngeɗu naa ndongu ley suudu baaba amin katin naa? 15 Wanaa o ndaardii min hono jananɓe naa? Sabo o sonnii min, katin du o nyaamii ceede amin. 16 Jawdi ndi Laamɗo teeti baaba amin ndiin fuu, enen e ɓiɓɓe men njeyi. Joonin, waɗu ko Laamɗo wi'i maa fuu.
17 Ndeen Yaakuuba ummii, waɗɗini ɓiɓɓe muuɗum e rewɓe muuɗum geelooɗi. 18 O adi dammuuli makko fuu e ko o mari, ko o heɓi ley Padan-Aram fuu. O fonndii leydi Kanaana to baabiiko Isiyaaka. 19 Tawi Laban yehii hesoyde baali muuɗum. Nde ɓe ndillannoo ndeen, Rahiina wujji tooruuji bammum.
20 Noon Yaakuuba hiildi Laban Aramanke, sabo o humpitaay ɗum o dillan. 21 Yaakuuba hooƴi ko jeyi fuu, de doggi. O ummii o feƴƴiti maayo Efrat, o fonndii waamnde Galaad.
No Laban taayniri Yaakuuba
22 Ley nyalooma tataɓo Laban humpitaa Yaakuuba doggii. 23 Laban ummodii e sakiraaɓe muuɗum, ɓe taayniti mo. Ɓe njehiri balɗe jeɗɗi, de ɓe kewtii mo dow waamnde Galaad.
24 Laamɗo ɓangani Laban Aramanke oon jemma ley koyɗol, wi'i ɗum:
— Tinna, taa haaldu e Yaakuuba fay huunde, yalla ko wooɗi naa ko wooɗaa.
25 Laban hewtii Yaakuuba, tawi Yaakuuba darnii hukum muuɗum dow waamnde ndeen. Laban e sakiraaɓe muuɗum du ndarni hukum muɓɓen dow waamnde Galaad toon.
26 Laban wi'i Yaakuuba:
— Ɗume woni ko ngaɗuɗaa ɗuum? A jambake kam, a egginii ɓiɓɓe am rewɓe hono wo kaafaahi konirɗaa de nannguɗaa ɓe. 27 Ko waɗi ndoggirɗaa cuncukka, njambiɗaa kam, a humpitaay kam? Si a humpitiino kam, mi ɗowtirteno e seyo e jimi e baggi e kolli. 28 A accaay kam fay mucciimi taaniraaɓe am worɓe e ɓiɓɓe am rewɓe faa mi waynoo ɗum'en. Joonin, a waɗii puuyndam. 29 Miɗo waawi torrude on. Ammaa Laamɗo baammon haaldii e am hankin, wi'i mi tinnoo taa mi haalda e Yaakuuba fay huunde, yalla ko wooɗi naa ko wooɗaa. 30 Joonin, aan a dillii sabo a muuyii yeccaade to suudu bammaa sanne. De ko saabii mbujjuɗaa tooruuji am?
31 Yaakuuba jaabii Laban, wi'i:
— Mi hulu taa teetaa kam ɓiɓɓe maa rewɓe. 32 De mo tawɗaa tooruuji maa e junngo mum fu, waree! Ndaar, yeeso sakiraaɓe men ɓe, fila nder gineeji am ko njeyɗaa fu, adaa.
Tawi Yaakuuba anndaa salla wo Rahiina wujji tooruuji Laban ɗiin. 33 Laban naati hukum Yaakuuba e hukum Leya e hukum horɓe ɗiɗo ɓeen. O tawaay fay huunde toon. O yalti hukum Leya, o naati hukum Rahiina. 34 Tawi Rahiina kam hooƴunoo tooruuji ɗiin, watti ɗi ley kirke ngeelooba de jooɗii dow makko. Laban filii ley hukum oon fuu, de yi'aay fay huunde.
35 Rahiina wi'i bammum:
— Taa joomam tikka, ko mi waawaa ummaade mi daroo yeeso muuɗum ɗuum, wo saabe al'aada rewɓe ina woni e am.
Noon Laban filorii tooruuji ɗiin de yi'aay ɗi. 36 Wakkati oon Yaakuuba mettaa, haɓi e Laban. Yaakuuba wi'i mo:
— Ɗume ngaɗumi? Hakke oye ngaɗumi de ɓernuɗaa, taaynuɗaa kam? 37 A ndaarii ley gineeji am fuu, gineeji suudu maa ɗiye tawɗaa toon? Wurtin ɗi yeeso yimɓe am e yimɓe maa, faa ɓe caroo hakkunde meeɗen, enen ɗiɗo. 38 Joonin, duuɓi noogay miɗo wondi e maa. Mbaalu maa e mbeewa maa fuu mbonnaay (mboppaay). Mi nyaamaay njawdiri maa fay ngootiri. 39 Mi wartiranaay ma fuu ko kulle ladde mbari. Si ɗum waɗii du, wo miin yoɓata ɗum. Jemma e nyalooma fuu a horii kam yalla won ko wujjaa faa njomnoɗaa kam. 40 Nyalooma fuu, nguli na torra kam, jemma du wo jaangol. Ɗoyngol dilli e gite am. 41 Joonin duuɓi noogay ngonumi ley suudu maa. Mi gollanii ma duuɓi sappo e nay saabe ɓiɓɓe maa rewɓe ɗiɗo ɓe. Mi gollanii ma duuɓi jeegom saabe dammuuli maa. Wooɗi du, a waylitii njobdi am kile sappo. 42 Si wanaa Laamɗo wondunoo e am, joonin a yoppanno kam junngo ɓolo. Kanko woni Laamɗo baaba am, Laamɗo Ibrahiima, Laamɗo mo Isiyaaka hulannoo oon. Laamɗo ƴeewii torra am e tampiri am de walli kam jemma hankin.
Aadi hakkunde Yaakuuba e Laban
43 Laban jaabii Yaakuuba, wi'i:
— Ɓiɓɓe rewɓe ɓeen wo ɓiɓɓe am, ɓiɓɓe maɓɓe du wo taaniraaɓe am. Daabaaji ɗiin wo daabaaji am. Ko nji'uɗaa ɗoon fuu, wo miin jeyi. Ɗume mbaawumi waɗude ɓiɓɓe am rewɓe ɓeen e ɓiɓɓe muɓɓen? 44 Wooɗi joonin, war faa ngadden aadi enen ɗiɗo, ndarnen seede hakkunde men.
45 Yaakuuba hooƴi hayre, darni nde faa nde laatoo maande miccinoore.
46 Yaakuuba wi'i koreeji muuɗum:
— Kawrunduree kaaƴe.
Ɓe kawrunduri kaaƴe faa ɗum waɗi joorde, ɓe nyaami dow majje.
47 Laban inndiri nokku oon Yegar-Sahaduta, Yaakuuba du inndiri ɗum Galeta.
48 Laban wi'i:
— Joorde kaaƴe nde seedoo hakkunde men hannden.
— Joomiraaɗo haybu hakkunde men, enen ɗiɗo, nde ceeduɗen fuu. 50 Si a torrii ɓiɓɓe am rewɓe ɓe, naa a nawlirii ɓe, fay si fay gooto yi'ataa ma, anndu, Laamɗo wo seede hakkunde men.
51 Laban wi'i Yaakuuba:
— Ndaar joorde kaaƴe nde, ndaar hayre miccinoore nde ndarnumi hakkunde men, enen ɗiɗo. 52 Joorde kaaƴe nde e haayre miccinoore nde fuu wo seede. Mi faltataako joorde nde faa mi waddane torra, aan du a faltataako joorde nde e maande miccinoore ndeen faa ngaddanaa kam torra. 53 Laamɗo Ibrahiima e Laamɗo Nahor e Laamɗo baabiiɓe saroo hakkunde men.