30
1 Nde Rahiina yiinoo rimanaay Yaakuuba ndeen, hiri mawnum debbo. O wi'i Yaakuuba:— Hokkam ɓiɓɓe! Si wanaa noon fu, mi maayan.
2 Yaakuuba mettaa e Rahiina, wi'i:
— Ndelle miin woni Laamɗo kaɗuɗo maa ɓeyngu naa?
3 Rahiina wi'i:
— Inan korɗo am Bilha. Naaddu e muuɗum faa rimana kam, miin du mi heɓira ɓiɓɓe e muuɗum.
4 O hokki Yaakuuba korɗo makko Bilha, oon laatii deekum. Yaakuuba naaddi e Bilha. 5 Oon reedi, rimani mo ɓiɗɗo gorko.
6 Rahiina wi'i:
— Laamɗo saranake kam, jaabanake kam du'aare am, de hokki kam ɓiɗɗo gorko. Saabe majjum, o inndiri oon Dana. 7 Bilha, korɗo Rahiina oon, reedi katin, rimani Yaakuuba ɓiɗɗo gorko ɗiɗaɓo.
8 Rahiina wi'i:
— Durwo naawngo kaɓumi e mawnam debbo. Mi jaalake.
Ɗum waɗi de o inndiri suka oon Naftalib.
9 Nde Leya yiinoo selii rimude ndeen, hooƴi korɗo muuɗum Jilpa, hokki Yaakuuba. 10 Jilpa, korɗo Leya oon, rimani Yaakuuba ɓiɗɗo gorko.
11 Leya wi'i:
— Mi welii hoore.
13 Leya wi'i:
— Mi seyake, sabo rewɓe fuu noddiran kam ceyiiɗo.
Ɗum waɗi de o inndiri oon Asiirad.
14 Wakkati tayri alkama, Ruben yehi ley ladde. O heɓi toon ɓiɓɓe leɗɗe mandaragoe ɓennduɗe, o waddani ɗe inniiko Leya.
Rahiina wi'i:
— Hokkaram ɓiɓɓe leɗɗe ɓiya ɗeen!
15 Leya jaabii mo, wi'i:
— Ndelle ko teetuɗaa kam goram ɗuum fuu heƴaay ma, de katin aɗa tefa teetude mandarago ɓiyam du naa?
Rahiina jaabii mo, wi'i:
— Ndelle Yaakuuba waalan suudu maaɗa jemma hannden, loomta mandarago ɓiya oon.
16 Nde Yaakuuba wartunoo ladde kiiral naange ndeen, Leya yalti hawri e muuɗum, wi'i ɗum:
— Naatu to am jemma o, sabo mi yoɓiri njobdi maa mandarago ɓiyam.
Yaakuuba wondi e makko jemma oon.
17 Laamɗo jaabanii Leya. O reedi, o rimani Yaakuuba ɓiɗɗo gorko njoyaɓo.
18 Leya wi'i:
— Laamɗo yoɓirii kam moƴƴere, sabo mi hokkii goram korɗo am.
20 Leya wi'i:
— Laamɗo hokkii kam dokkal lobbal. Joonin goram teddinan kam, sabo mi rimanii mo ɓiɓɓe worɓe njeegom.
22 Laamɗo miccitii Rahiina, jaabii du'aare muuɗum, hokki ɗum ɓeyngu. 23 O reedi, o rimi ɓiɗɗo gorko. O wi'i:
— Laamɗo ittanii kam semteende am.
24 Ɗum waɗi de o inndiri oon Yuusufih.
O wi'i:
— Joomiraaɗo ɓeydanam ɓiɗɗo gorko goɗɗo!
No Yaakuuba hemri jawdi
25 Nde Rahiina rimunoo Yuusufi ndeen, Yaakuuba wi'i Laban:
— Yoppan mi hoota wuro am e leydi am. 26 Hokkam rewɓe am e ɓiɓɓe am ɓe ngollanmi ma saabe muɓɓen ɓeen faa mi dilla. Sabo aɗa anndi golleeji ɗi ngollanmi ma.
27 Laban wi'i mo:
— Si a yardanake kam, hedda ɗo am ɗo. Mi yi'ii e tiimgal, Joomiraaɗo barkinii kam saabe maa. 28 Haalanam njobdi maa, faa mi hokke ndi.
29 Yaakuuba jaabii, wi'i:
— Aɗa anndi ko ngollanmaami. Aɗa anndi du no dammuuli maa ɓeydorii e junngo am. 30 Ko njoginoɗaa fadde am e warude heewaano. De joonin, ɗum ɓeydake, ɗum heewii sanne. Gilla koyngal am yottii ley ɓaade maa, Joomiraaɗo barkinii ma. Joonin le, faa ndeye ngollanammi ɓaade am, miin du?
31 Laban ƴami mo, wi'i:
— Ɗume kokkanmaami?
Yaakuuba jaabii, wi'i:
— Taa hokkam fay gootum. Si a jaɓii fu, mi naattan durngol dammuuli maa ɗiin katin, mi hayba ɗi. 32 Mi yiiltoto hakkunde cogge maa ɗeen fuu hannden, de mi sennda baali nyaawi e toddi e ɓaleeji fuu. Hono noon du be'i nyaawi e pantooji. Ɗiin fuu laatotoo njobdi am. 33 Fonnditaare am seedanto kam yeeso maa ko waroyta. Nyannde ngaroyɗaa faa ndaaraa njobdi am, si a yi'ii ley be'i debbi ɗiin nga wanaa nyaawa naa pantoowa fu, naa ley baali ɗiin ngu wanaa ɓaleewu fu, wo ko wujjaa.
34 Laban wi'i:
— Ina wooɗi. En ngaɗa no mbiiruɗaa noon.
35 Ammaa nyannde ndeen Laban wurtini ley be'i ɗiin damɗi toddi e pantooji. Hono noon du be'i debbi nyaawi e pantooji e ko woodi pelle daneeje fuu, e baali ɓaleeji fuu. O watti ɗi e juuɗe ɓiɓɓe makko worɓe. 36 Caggal ɗuum, o woɗɗorii Yaakuuba yaadu balɗe tati. Yaakuuba duri dammuuli Laban keddiiɗi ɗiin.
37 Wooɗi, Yaakuuba adi looci kecci leɗɗe bi'eteeɗe Popiliye e Amande e Palatan, feƴƴi ɗi. O siri ɗi heɓa leɗɗe majji daneeje ɗeen ɓanga. 38 O fukkini ɗi yeeso dammuuli ɗiin nder akalawal ndiyam to ɗi njarata ɗoon. Nde dammuuli ɗiin ngari faa njara fu, kalahali majji ina ndanya debbi ɗiin ley ɗoon. 39 Dammuuli ɗiin ndanyaa ɗakkol looci ɗiin, de ndimi toddi e pantooji e nyaawi.
40 Yaakuuba senndi ɓiɓɓe baali ɗiin. O wayliti keddiiɗi ɗiin, o huccini geese majji faro baali Laban toddi e ɓaleeji ɗiin. Hono nii o heɓirani hoore makko coggal dammuuli, o hawrunduraay ɗi e dammuuli Laban. 41 Si dammuuli payɗi ɗiin ngarii faa njara de ina ndanya fu, Yaakuuba wallinan looci ɗiin yeeso majji. 42 Si dammuuli pooƴuɗi ɗiin ngarii yarude fu, o wallintaa looci ɗiin. Noon pooƴuɗi ɗiin laatorii ɗi Laban de payɗi ɗiin laatii ɗi makko.
43 Noon Yaakuuba laatorii jom jawdi sanne. O heɓi dammuuli keewɗi e maccuɓe e horɓe e geelooɗi e araaji fuu.