No Yaakuuba hawriri e Rahiina
29
1 Caggal ɗuum, Yaakuuba adi laawol muuɗum, yehi leydi yimɓe lettugal. 2 O yi'i ɓunndu ley ngesa gomma. Cogge baali tati ina mbaalii ɗakkol mayru. Ɗoon ɗe njarata. Hayre mawnde ina uddi hunnduko ɓunndu nduun. 3 Toon durooɓe kawrundurta cogge muɓɓen fuu, de tallita hayre ndeen, itta nde e hunnduko ɓunndu nduun, njarna baali muɓɓen. Caggal ɗuum, ɓe ngartira hayre ndeen nokku muuɗum, ɓe udda ɓunndu nduun.4 Yaakuuba wi'i ɓe:
— Sakiraaɓe, toy ƴuuroton?
Ɓe njaabii, ɓe mbi'i:
— Haran min ƴuurata.
5 O wi'i ɓe:
— Oɗon anndi Laban ɓii Nahor naa?
Ɓe njaabii mo, ɓe mbi'i:
— Miɗen anndi mo.
6 O wi'i ɓe:
— Imo selli naa?
Ɓe njaabii:
— Baasi fuu walaa e makko. Inan ɓiyiiko debbo Rahiina ina warda e baali.
7 O wi'i ɓe:
— Joonin wo hakkunde naange, wanaa wakkati hawritingol dammuuli. Njarnee ɗi kaa, oora.
8 Ɓe njaabii, ɓe mbi'i:
— Min mbaawaa, sanaa cogge ɗeen fuu kawrita. Ndeen min tallitan hayre ndeen ƴuwa e hunnduko ɓunndu nduun, de min njarna dammuuli ɗiin.
9 Nde ɓe kaaldannoo e makko ndeen, Rahiina yottodii e dammuuli bammum, sabo wo o duroowo. 10 Yaakuuba yi'i denɗum Rahiina ɓii kaaw mum Laban ina wondi e dammuuli bammum. O wari, o talliti hayre ndeen, o itti nde e hunnduko ɓunndu toon, de o yarni baali kaawiiko Laban. 11 Yaakuuba muccii Rahiina. Ɓernde makko hecciɗi, o woyi. 12 O humpiti Rahiina, bammum wo kaawiiko, wo o ɓii Rifka. Nde Rahiina nannoo ɗum tan, doggi, haalanowii bammum. 13 Nde Laban nannoo haala Yaakuuba, baaɗum fu, doggi hawrowii e makko, mumilii mo, muccii mo, de yaari mo to suudu muuɗum. Yaakuuba haalani Laban ko waɗi ɗuum fuu.
14 Laban wi'i mo:
— Sikke fuu walaa, wo a ƴi'al am e teewu am jaati.
Yaakuuba woni ɗo makko faa waɗi lewru.
No Yaakuuba dewliri
15 Caggal ɗuum, Laban wi'i Yaakuuba:
— Wanaa gam a baaɗam waɗata de ngolliranaa kam ɓolum? Haalanam njobdi maa.
16 Tawi Laban ina jogii ɓiɓɓe rewɓe ɗiɗo, mawniiwo oon ina wi'ee Leya, minyiiwo oon ina wi'ee Rahiina. 17 Rahiina na wooɗi alhaali, wo jom ŋari, de Leya du wo jom gite koobaajea.
18 Yaakuuba yiɗi Rahiina, de wi'i Laban:
— Mi hokke mo na ɓurani kam mi hokka mo gorko goɗɗo. Hedda ley ɓaade am.
20 Yaakuuba golli duuɓi jeɗɗi faa heɓa Rahiina. Duuɓi ɗiin nanndani mo hono balɗe seeɗa tan saabe no yidde makko e Rahiina mawniri.
21 Nde duuɓi jeɗɗi ɗiin kiɓɓunoo fu, Yaakuuba wi'i Laban:
— Hokkam deekam faa mi sudda ɗum sabo wakkati mo ndesidinnoɗen oon hiɓɓii.
22 Laban hawrini yimɓe nokku oon fuu, waɗani ɓe weltaare mawnde. 23 Ammaa nde futuro warnoo fu, o adi ɓiyiiko Leya, o waddi ɗum to Yaakuuba. Yaakuuba suddi mo. 24 Laban hokki korɗo mum bi'eteeɗo Jilpa oon ɓiyum Leya faa gollana ɗum.
25 Nde weetunoo fu, Yaakuuba tawi wo Leya hokkaa. Ndeen o wi'i Laban:
— Noy woni no ngaɗuɗaa kam ni? Wanaa saabe Rahiina ngollanmaami naa? Ko waɗi njambiɗaa kam?
26 Laban jaabii, wi'i:
— Minyiiwo artoo mawniiwo suddeede, ɗuum wanaa finaatawaa amin. 27 Kiɓɓinee jeɗɗiire mon nde, de ngollanaa kam duuɓi jeɗɗi katin faa mi hokke minyiiwo oon du.
28 Yaakuuba hiɓɓini jeɗɗiire ndeen. O golli hono no Laban wi'iri noon. Ndeen oon hokki mo ɓiyum Rahiina du, laatii jom suudu makko. 29 Laban hokki ɓiyum Rahiina oon korɗo muuɗum bi'eteeɗo Bilha faa heddoo na gollana ɗum. 30 Yaakuuba suddi Rahiina du. Oon o ɓuri yidde dow Leya. O gollani Laban duuɓi jeɗɗi goɗɗi.
Ɓiɓɓe Yaakuuba
31 Nde Joomiraaɗo yiinoo Leya yiɗaaka ndeen, hokki ɗum ɓeyngu. Ammaa Rahiina laatii dimaro. 32 Leya reedi, rimi ɓiɗɗo gorko, o inndiri ɗum Ruben.b
Sabo o wi'i:
— Joomiraaɗo yi'ii mettorgal am. Joonin goram yiɗan kam.
33 O reedi katin, o rimi ɓiɗɗo gorko. O wi'i:
— Joomiraaɗo nanii mi jeebaaɗo, saabe majjum o hokki kam o du. O inndiri oon Simeyonc.
34 O reedi katin, o rimi ɓiɗɗo gorko.
O wi'i:
— Joonin kaa, goram takkoto e am, sabo mi rimanii mo ɓiɓɓe worɓe tato.
Ɗum waɗi de o inndiri oon Lewid.
35 O reedi katin, o rimi ɓiɗɗo gorko.
O wi'i:
— Joonin mi yettan Joomiraaɗo.
Ɗum waɗi de o inndiri ɗum Yahuudae. Ndeen o seli rimude.