28
1 Isiyaaka noddi Yaakuuba barkini ɗum, yamiri ɗum, wi'i:
— Taa ɓaŋu debbo e ley ɓiɓɓe rewɓe Kanaana. 2 Umma, yahu faa Padan-Aram, faa suudu Betuwel baaba inna maa. Kooƴanaa hoore maa debbo ley ɓiɓɓe kaaw maa Laban, sakiike inna maa oon. 3 Laamɗo jom Baawɗe barkine, waɗa ndimaa, ɗuuɗaa faa laatoɗaa lenyi keewɗi. 4 O hokke barke Ibrahiima, aan e ƴuwdi maa. Ndonaa leydi ndi ngonɗaa ley muuɗum, ndi Laamɗo hokki Ibrahiima ndiin.
5 Isiyaaka neli Yaakuuba yaha Padan-Aram to Laban ɓii Betuwel Aramanke. Kanko woni sakiike Rifka, inna Yaakuuba e Isuwa. 6 Isuwa faamii Isiyaaka barkinii Yaakuuba, nelii ɗum Padan-Aram faa ɓaŋana hoore muuɗum debbo. O faamii du nde Isiyaaka barkinnoo Yaakuuba ndeen, yamirii ɗum, wi'ii: «Taa ɓaŋu ley ɓiɓɓe rewɓe Kanaana!» 7 Yaakuuba ɗowtanii saaraaɓe muuɗum, yehi Padan-Aram.
8 Isuwa faamii ɓiɓɓe rewɓe Kanaana mbelaa bammum Isiyaaka. 9 Ndeen Isuwa yehi ɓaŋowi Makalat ɓii Ismaa'iila, taan Ibrahiima, sakiike Nebayot debbo. O hawrunduri ɗum e rewɓe makko.
Koyɗol Yaakuuba
10 Yaakuuba ƴuuri Beerseba, fonndii Haran. 11 Naange yani mo nokku gomma, o tawi sanaa o walaa ɗoon. O hooƴi hayre, o wawlii, de o fukkii ɗoon. 12 O yi'i e koyɗol, inan ƴeeŋirgal ina darii e leydi, hoore maggal ina meema kammu, maleyka'en Laamɗo ina ƴeenyira ngal, ina njipporoo ngal.
13 Joomiraaɗo darii dow maggal, wi'i:
— Miin woni Laamɗo, Joomiraaɗo bammaa Ibrahiima, Laamɗo Isiyaaka. Leydi ndi pukkiɗaa dow muuɗum ndiin, mi hokkete ndi, aan e ƴuwdi maa. 14 Ƴuwdi maa ɗuuɗan hono gabbe njaareendi, ndi sankitoto faro lettugal, e gorgal, e soɓɓiire, e horɗoore. Lenyi duuniyaaru fuu keɓan barke saabe maa e saabe ƴuwdi maaɗa. 15 Aan du, miɗo wondi e maa. Mi reenete ɗo njahuɗaa fuu. Mi wartirte e leydi ndi, sabo mi yoppataa ma. Mi hiɓɓinan ko aadaniimi ma ɗuum.
16 Yaakuuba finti, wi'i:
— Tennyoral, Joomiraaɗo ina woni ley nokku oo! De mi anndaano.
17 O huli, o wi'i:
— Hey nokku oo ina hulɓinii! Tennyoral, ɗo wo suudu Laamɗo, wo dammbugal kammu.
18 Ndeen Yaakuuba dawi law, hooƴi hayre nde wawlinoo ndeen, darni nde, waɗi maande miccinoore. O joori nebbam dow hayre ndeen. 19 O inndiri nokku oon Baytila.a Arande huɓeere ndeen ina inndirenoo Luus.
20 Yaakuuba hunii, wi'i:
— Si Laamɗo wondii e am, reenii kam e jahaangal am ngaal, si o hokkii kam ko nyaamammi e ko koltanmi, 21 faa mi wartii suudu baabam e jam fu, Joomiraaɗo laatoto Laamɗo am. 22 Wooɗi hayre nde ndarnumi, ngaɗumi maande miccinoore ndeen du, nde laatoto suudu maa aan Laamɗo. Ko kokkuɗaa kam fuu, mi ittante sappoɓerde muuɗum jakka.