No Yaakuuba heɓiri barke e Isiyaaka
27
1 Nde Isiyaaka naywunoo ndeen, gite muuɗum cuddi faa yi'ataa katin. O noddi Isuwa afo makko oon. Oon nootii mo.2 O wi'i ɗum:
— Ndaar mi naywii, mi anndaa nde maayammi. 3 Ndelle hooƴu kure maa e ɓaaru maa e laanyal maa, njahaa ladde, loohanoɗaa kam teewu. 4 Moƴƴinanaa kam nyaamdu welndu hono no njiɗirmi noon, ngaddanaa kam mi nyaama, de yonki am barkine gilla mi maayaay.
5 Rifka ina hettinii nde Isiyaaka haaldannoo e ɓiyum Isuwa ndeen. Nde Isuwa yehunoo ladde faa loohowoo, waddana bammum ndeen, 6 Rifka haalani ɓiyum Yaakuuba, wi'i:
— Mi nanii bammaa ina haalda e mawna Isuwa, ina wi'a: 7 «Loohanowam teewu ladde, moƴƴinanaa kam nyaamdu welndu faa mi nyaama de mi nyaagane Joomiraaɗo, barkine gilla mi maayaay.» 8 Joonin, ɓiyam, hettinanam. Inan ko njamiranmi ma: 9 Yahu to dammuuli toon, nannganaa kam ndamkoy ɗiɗoy lobboy faa mi moƴƴina koy, mi waɗa nyaamdu welndu no bammaa yiɗiri noon. 10 Njaaranaa ɗum ndu faa nyaama, de barkine gilla maayaay.
11 Yaakuuba jaabii inna mum, wi'i:
— Mawnam Isuwa wo gorko mo ɓanndu mum heewi leeɓi, de miin, mi worraa noon. 12 Ina hasii baabam meema kam, de ndaarda kam wo mi jambotooɗo. Ndeen mi heɓataa barke, wo kuddi tan ngaddananmi hoore am.
13 De inniiko wi'i mo:
— Si wo noon fu, kuddi ndiin saama dow am. Ɓinngel am, nanu haala am tan, yahu nannganowaa kam ko mbiimaami ɗuum.
14 Ndelle o yehi, o nanngowii ndamkoy kooy, o waddani Rifka inniiko. Inniiko oon moƴƴini nyaamdu welndu hono no baabiiko yiɗiri noon. 15 Ndeen inniiwo oon hooƴi kaddule Isuwa ɓiyum mawniiwo lobbe ɗe oon resi ley suudu ɗeen, waɗi Yaakuuba minyiiwo oon ɓoornii ɗe. 16 O ɓoorni guri ndamkoy ɗiin e juuɗe muuɗum, e to leeɓi ngalaa e daande mum toon. 17 O hokki ɗum nyaamdu welndu nduun e buuru mo o moƴƴini oon.
18 Yaakuuba naati to bammum, wi'i ɗum:
— Baaba!
Oon jaabii:
— Aan moy ɓinngel am?
19 Yaakuuba wi'i bammum:
— Miin Isuwa, afo maa. Mi waɗii ko mbiiɗaa kam ɗuum. Umma jooɗa, nyaamaa teewu ngu loohoymi nguun, de mbarkinaa kam.
20 Isiyaaka wi'i ɓiyum oon:
— Ɓinngel am, noy ngaɗuɗaa de keɓuɗaa teewu ladde faa ngartuɗaa law hono nii?
O jaabii, o wi'i:
— Laamɗo Joomiraaɗo maa, kam waddi ngu to am.
21 Ndeen Isiyaaka wi'i Yaakuuba:
— Ɓinngel am, ɓatta faa mi meeme, mi faama yalla aan woni ɓiyam Isuwa naa a wanaa.
22 Yaakuuba ɓattii bammum Isiyaaka. Oon meemi mo, de wi'i:
— Haala kaa wo haala Yaakuuba, ammaa juuɗe ɗe wo juuɗe Isuwa.
23 O annditaay ɗum sabo juuɗe muuɗum ina njogii leeɓi hono juuɗe Isuwa mawniiwo oon. Ndeen o barkini ɗum.
24 Isiyaaka wi'i:
— Yalla goonga fuu a ɓiyam Isuwa naa?
O jaabii, o wi'i:
— Ayyo wo miin!
25 Isiyaaka wi'i:
— Ɓiyam, ɓattinanam teewu nguun, faa mi nyaama, de mi barkine.
Oon ɓattinani mo, o nyaami. Ndeen oon waddani mo cabijam, o yari.
26 Ndeen baabiiko oon wi'i mo:
— Ɓiyam, ɓatta muccoɗaa kam.
27 Oon ɓattitii, muccii mo. O maati henndu kaddule muuɗum, o barkini ɗum, o wi'i:
Henndu ɓiyam ina nanndi hono
henndu ngesa nga Joomiraaɗo barkini.
28 Laamɗo jippinane peewol saawandere ƴuurunde dow,
hokke du leydi lobbiri,
e alkama keewɗo, e cabijam keewɗam.
29 Cuuɗi baaba ngollane!
Lenyi cujidane!
Laamoɗaa sakiraaɓe maa!
Ɓiɓɓe inna maa cujidane.
Kuɗuɗo ma fuu, kuddi ndiin saama dow muuɗum.
Du'aniiɗo ma fuu, Laamɗo barkin ɗum!
30 Isiyaaka tilii barkinde Yaakuuba. Nde Yaakuuba wurtinoo to baaba muuɗum ndeen, wakkati oon pay, Isuwa sakiikem oon warti loohagol, naati. 31 Kanko du o moƴƴini nyaamdu welndu, o nanni to baabiiɓe, de o wi'i ɗum:
— Baaba, umma nyaamu teewu ngu loohanoymi ma nguun, de barkinaa kam, miin ɓiya.
32 Baabiiko Isiyaaka wi'i mo:
Aan, a moy?
O jaabii, o wi'i:
Wo miin Isuwa, ɓiya afo oon.
33 Wakkati oon, Isiyaaka diwni sanne, wi'i:
— Moy woni loohoyɗo de waddani kam teewu ladde nyaamumi gilla a waraay mbarkinmaami oon? Mi barkinii joomum. Noon du barke oon heddortoo e muuɗum.
34 Nde Isuwa nannoo haalaaji bammum ɗiin fu, wulli wullaango manngo mettungo sanne, wi'i bammum:
— Barkinam miin du baaba!
35 Oon jaabii, wi'i:
— Minya wardii e hiila, heɓii barke maa oon.
36 Isuwa jaabii, wi'i:
Wanaa innde makko wo Yaakuuba naa?a O hiilii kam kile ɗiɗi. O teetii mawniraagu am, joonin du o teetii barke am.
— A heddanaay kam barke naa?
37 Isiyaaka jaabii Isuwa, wi'i:
— Ndaar, mi waɗii mo joomaa, mi hokkii mo rimdaaɓe makko fuu ngollana mo, mi yooɓinii mo alkama e cabijam. Ndelle ɗume ngaɗananmaami ɓinngel am?
38 Isuwa wi'i bammum:
— Barke gooto tan njogiɗaa naa baaba? Barkinam miin du baaba!
Ndeen o wulli, o rufi gonɗi mettorgal.
39 Baabiiko Isiyaaka wi'i mo:
Wuro maaɗa woɗɗoto e leydi lobbiri, goodundi barke,
ndi saawandere kammu jippataako dow muuɗum.
40 A wuurdan kaafaahi maa.
A gollanan minya oon.
Ammaa ley yiilnde maa,
a taƴan ɓoggol margal gonngol e daande maa ngool.
No Yaakuuba doggiri Isuwa
41 Ɓernde Isuwa wanyi Yaakuuba saabe barke mo bammum barkini ɗum oon. Isuwa anniyii, wi'i:
— Maayde baabam ɓadake, caggal ɗuum, mi waran sakiike am Yaakuuba.
42 Rifka humpitaa haalaaji afo muuɗum Isuwa ɗiin. O neli o noddanee ɓiyiiko Yaakuuba minyiiwo oon.
O wi'i ɗum:
— Ndaar, sakiike maa Isuwa ina filoo warude maa faa itta dukkuru muuɗum e maaɗa. 43 Joonin, ɓiyam, nanu haala am:
— Umma, doggu, yahu to Laban sakiike am, gonɗo Haran oon. 44 Keddoɗaa to makko seeɗa faa ɓernde sakiike maa oon waaltoo. 45 Nde ɓernde makko waaltii faa o yeggiti ko ngaɗuɗaa ɗuum fu, mi nelante ngartaa. Mi yiɗaa mursude on, on ɗiɗo fuu nde wootere.
46 Caggal ɗuum Rifka wi'i Isiyaaka:
— Mi sawtii adunaaru saabe rewɓe Isuwa Hitiyankooɓe ɓeen. Si Yaakuuba ɓaŋii debbo Hitiyanke hono maɓɓe ley rewɓe leydi ndi, ɗume nguurndam am nafata?