Haala maayde Ibrahiima e ƴuuruɓe e muuɗum
25
1 Ibrahiima hooƴi debbo goɗɗo katin, innde debbo oon wo Ketuura. 2 Oon rimani mo Simraan, Yoksaan, Medaan, Madiyan, Yiisbak, e Suwak. 3 Yoksaan rimi Seeba e Dedan. Ɓiɓɓe Dedan ngoni Asurinkooɓe e Letusinkooɓe e Le'uminkooɓe. 4 Inan ɓiɓɓe Madiyan: Efa, e Efer, e Hanok, e Abidaa e Elda'a. Ɓeen fuu e Ketuura ƴuuri.5 Ibrahiima hokki Isiyaaka huunde fuu ko jeyi. 6 Ibrahiima itti jawdi, hokki ɓiɓɓe worɓe ɓe rewɓe muuɗum naattaaɓe ndimani ɗum ɓeen, o woɗɗini ɓe, ɓe njehi faro lettugal, ɓe ndilli ɗakkol ɓiyiiko Isiyaaka gilla imo wuuri.
7 Duuɓi Ibrahiima fuu wo hemre e capanɗe jeɗɗi e joy. 8 Ibrahiima wuuri duuɓi keewɗi e nguurndam kiɓɓuɗam. O maayi gaɗa nayeewu mbelngu, de o mooɓaa, o hawritowi e maamiraaɓe makko. 9 Isiyaaka e Ismaa'iila ɓiɓɓe makko ɓeen mooɓi mo e loho Makpela ɗakkol Mamre e ngesa Eforon ɓii Sohar, Hitiyanke. 10 Ngaan woni ngesa nga Ibrahiima soodi to Hitiyankooɓe ngaan. Toon Ibrahiima e deekum Saaratu fuu mooɓaa. 11 Caggal maayde Ibrahiima, Laamɗo barkini Isiyaaka ɓiyiiko oon. Isiyaaka jooɗowii ɗakkol ɓunndu Lahay Roy.
12 Inan ƴuwdi Ismaa'iila ɓii Ibrahiima mo Hajara Misirankeejo oon rimani ɗum. 13 Inan inɗe ɓiɓɓe Ismaa'iila worɓe e no ɓe njokkunduri: Nebayot afo makko e Kedaar e Adubel e Mibsaam, 14 e Misma e Duuma e Masa, 15 e Hadat e Teyma e Yetuur e Nafiis e Kedema. 16 Ɓeen ngoni ɓiɓɓe Ismaa'iila worɓe, wo ɓe sappo e ɗiɗo. Mono e maɓɓe fuu laamake lenyol tawaangol ley kuɓeeje e gure ɗo tawaa. Mono fuu innde muuɗum heddii e nokku ɗo laamii ɗoon. 17 Duuɓi ɗi Ismaa'iila wuuri fuu wo hemre e capanɗe tati e jeɗɗi. O maayi, o mooɓaa, o hawritowi e maamiraaɓe makko. 18 Yuwdi makko jooɗake illa Hawila faa yaade Suur ɗakkol Misira faa yaade Asuur. Ɓe keddodii toon rafi potal e sakiraaɓe maɓɓe.
Nguurndam Yaakuuba
Haala rimeede Isuwa e Yaakuuba
19 Inan ɓeyngu Isiyaaka ɓii Ibrahiima:
Ibrahiima rimi Isiyaaka. 20 Duuɓi Isiyaaka wo capanɗe nay nde o ɓaŋannoo Rifka minyoo Laban, ɓii Betuwel Aramanke ƴuuruɗo Padan-Aram oon. 21 Rifka kaa wo dimaro. Saabe ɗuum Isiyaaka du'ii, ŋaarii Joomiraaɗo saabe jom suudu muuɗum. Joomiraaɗo nani du'aare makko, de Rifka hooƴi reedu. 22 Ɓiɓɓe ɓeen ina ndunƴundura ley reedu muuɗum. O wi'i:
— Si wo nii, ko saabii miɗo wuuri?
— Lenyi ɗiɗi ngoni ley reedu maa, ƴuwdiiji ɗiɗi ceeduɗi njaltan e maa. Lenyol gootol laatoto ɓurngol semmbe. Mawniiwo oon gollanan minyum.
24 Nde wakkati ɓeyngu makko yottinoo ndeen, inan funeereeɓe ngoni ley reedu makko. 25 Arandeejo oon yalti, wo boɗeejo coy, de leeɓi ina keewi dow ɓanndu muuɗum fuu hono saaya kaasa. Ndelle o inndiraa Isuwa. 26 Caggal ɗuum, ɗiɗaɓo oon yalti, junngo mum ina tiigii teppere Isuwa. O inndiraa Yaakuuba (ɗum na fiirta «tiigiiɗo teppere»). Duuɓi Isiyaaka wo capanɗe jeegom nde ɓe ndimetenoo ndeen.
27 Sukaaɓe ɓeen mawni. Isuwa laatii loohotooɗo mawɗo jiɗuɗo yiilaade ley ladde, de Yaakuuba kaa laatii neɗɗo keesindiiɗo buuruɗo ley hukumuuji. 28 Isiyaaka ina yiɗunoo Isuwa sabo imo yiɗi teewu ladde, de Rifka kaa wo Yaakuuba yiɗi.
29 Nyannde gomma Yaakuuba defi nyebbe, Isuwa du ƴuuri ladde warti, ina tampi sanne. 30 Isuwa haaldi e Yaakuuba, wi'i:
— Miɗo ŋaare, accu mi nyaama nyebbe maa boɗeeje ɗe seeɗa, sabo mi tampii.
Saabe ɗuum o inndiraa Edom (ɗum na fiirta «Boɗeejo»).
31 Yaakuuba wi'i:
— Wooɗi conniraa kam mawniraagu maa tafon.
32 Isuwa jaabii, wi'i:
— Inan miɗo maaya! Ɗume mawniraagu nafata kam?
33 Yaakuuba wi'i:
Kunanoɗaa kam, tafon.