Dewgal hakkunde Isiyaaka e Rifka
24
1 Ibrahiima naywi, duuɓi muuɗum ɗuuɗi. Joomiraaɗo barkini Ibrahiima e huunde fuu.2 Nyannde gomma Ibrahiima haaldi e mawɗo maccuɓe muuɗum, kiilniiɗo jawdi muuɗum oon, wi'i:
— Wattu junngo maa e busal am kunanoɗaa kam 3 e innde Joomiraaɗo, taguɗo kammu e leydi, a ɓaŋantaa ɓiyam hakkunde ɓiɓɓe rewɓe Kanaaninkooɓe ɓe njooɗodiimi ɓe. 4 Ammaa a yahan leydi am ndi ndimaami e muuɗum ndiin, ɓaŋanowaa ɓiyam Isiyaaka debbo toon.
5 Maccuɗo makko oon jaabii, wi'i:
— Noy ngaɗanmi si debbo oon salake jokkude kam wara leydi ndi? Yalla mi fornyinan ɓiya gorko oon leydi to ƴuuruɗaa toon naa?
6 Ibrahiima haaldi e makko, wi'i:
— Tinna taa njeccinaa ɓiyam toon. 7 Joomiraaɗo, Laamɗo taguɗo kammu oon ƴuwni kam suudu baabam e leydi ndi ndimaami e muuɗum ndiin. O hunanii kam, o wi'i: «Wo ƴuwdi maa kokkammi leydi ndi.» Kanko nulata maleyka makko yeeso maaɗa, faa ɓaŋanaa ɓiyam debbo toon. 8 Si debbo oon jaɓaay jokkude ma wara fu, a humtake e hunayeere nde kunaniɗaa kam ndeen. Ammaa taa njeccinaa ɓiyam toon!
9 Maccuɗo oon watti junngo mum e busal joomum Ibrahiima. Nii o hunoranii ɗum dow ko ɓe kaaldi ɗuum.
10 Maccuɗo oon suɓii geelooɗi sappo hakkunde geelooɗi joomum, rimdi ɗi dokke feere feere mawɗe. Ndeen o adi laawol leydi Mesopotamiya faa o yaha wuro Nahor toon.
11 Nde o yottinoo ndeen, o hofini geelooɗi ɗiin caggal wuro ngoon, tawi wo wakkati laasara nde rewɓe ƴoogooɓe njaltata ndeen. 12 O wi'i:
— Joomiraaɗo, Laamɗo joomam Ibrahiima, miɗo nyaage, moƴƴinanam laawol am hannden, kiɓɓinaa hinney maa e joomam Ibrahiima. 13 Inani miɗo darii ɗakkol ɓunndu ndu. Ɓiɓɓe rewɓe wuro ngoon ina njalta faa ƴooga ndiyam. 14 Accaa tawee suka debbo mo kaaldammi, mi wi'a ɗum «oonyu loonde maa faa mi yara», de jaaboo kam, wi'a «Yar! Wooɗi mi yarnan geelooɗi maa ɗi du,» oon laatoo mo podaniɗaa maccuɗo maa Isiyaaka. Ngaɗaa ɗum maande nde paamirammi a hiɓɓinii hinney maa e joomam.
15 Gilla o timminaay haala makko, inan Rifka ina wara, loonde mum ina woni dow balawal muuɗum. Oon wo ɓii Betuwel debbo, taan Milka jom suudu Nahor. Nahor wo sakiike Ibrahiima. 16 Suka debbo oon ina weli yi'ude sanne, wo surbaajo mo gorko fuu yottaaki abada. O jippii to ɓunndu ndiyam toon, o hebbini loonde makko, o yeccii. 17 Maccuɗo oon yaawni, sakkitii mo, de wi'i mo:
— Miɗo ŋaare, kokkoraa kam ndiyam seeɗa e loonde maa ndeen mi yara.
18 Surbaajo oon jaabii mo, wi'i:
— Joomam, yaru!
O harii, o leeƴini loonde ndeen, o hokki oon yari. 19 Nde o tilinoo hokkude oon ndiyam ndeen, o ɓeydi, o wi'i:
— Mi ƴooganan geelooɗi maa ɗiin du, njara faa ɗomɗita.
20 O yaawni, o watti ndiyam keddiiɗam ɗaam ley akalaawal. O doggi katin yaade to ɓunndu nduun, o ƴoogi, o yarni geelooɗi ɗiin fuu. 21 Gorko oon ina ndaara mo, ina deƴƴinii, faa ndaara yalla Joomiraaɗo moƴƴinii laawol muuɗum ngool naa moƴƴinaay.
22 Nde geelooɗi ɗiin ɗomɗitinnoo fu, gorko oon itti hootonnde kaŋŋe nde teddeefi mum waɗi mutakal gootal, e jawe kaŋŋe ɗiɗi ɗe teddeefi muɓɓen waɗi mutakalaaje noogay. O watti e juuɗe oon. 23 O wi'i:
— Haalanam moy woni baaba maa? Yalla galle baaba maa na woodi ɗo min mbaala naa?
24 Oon jaabii mo, wi'i:
— Miin, mi taan Milka e Nahor.
25 O ɓeydi, o wi'i:
Huɗo e haako ina ngoodi to amin faa heewi, ɗo waalee du ina woodi.
— Jettooje ngoodani Joomiraaɗo, Laamɗo joomam Ibrahiima, kanko mo yoppaay waɗande joomam hinney e hoolaare. Joomiraaɗo ɗowii kam e laawol faa e suudu sakiraaɓe joomam.
28 Suka debbo oon doggiri wuro, haalanowii ɗum fuu suudu inna mum. 29 Tawi Rifka ina woodi mawniiwo gorko bi'eteeɗo Laban. Laban doggiri yaasin to neɗɗo oon faa to ɓunndu toon. 30 Nde o yiinoo hootonnde e jawe gonɗe e juuɗe minyiiko debbo oon, de o nani du haalaaji ɗi haali dow ko gorko oon wi'i ɗum fu, o yehi to gorko oon, o tawi ɗum ina ndarodii e geelooɗi mum ɗakkol ɓunndu nduun. 31 O wi'i ɗum:
— War barkinaaɗo Joomiraaɗo! Ko saabii de aɗa ndarii yaasin? Mi segilanake ma suudu, e nokkuure geelooɗi ma.
32 Gorko oon naati ley galle toon. Geelooɗi ɗiin ndimnditaa, kokkaa huɗo. O hokkaa ndiyam kanko du faa o loota koyɗe makko, kanko e yaadiraaɓe makko ɓeen. 33 Ndeen nyaamdu du joƴƴinaa yeeso makko. De o wi'i:
— Mi nyaamataa si mi haalaay ko waddi kam.
Laban wi'i mo:
— Wooɗi, ndelle haalu!
34 O adi haala, o wi'i:
— Miin, wo mi maccuɗo Ibrahiima. 35 Joomiraaɗo barkinii joomam Ibrahiima sanne faa laatii jom jawdi sanne, hokkii mo na'i e be'i e baali e cardi e kaŋŋe e maccuɓe e horɓe e geelooɗi e araaji. 36 Saaratu jom suudu joomam du rimanii mo ɓiɗɗo gorko ley nayeewu muuɗum. O hokki ɓiɗɗo oon huunde fuu ko o jeyi.
37 Joomam huninii kam, wi'i taa mi hooƴana ɓiyum deekiyo hakkunde ɓiɓɓe rewɓe Kanaaninkooɓe ɓe jooɗii ley leydi muɓɓen ɓeen. 38 Ammaa mi yaha suudu baabiiko e ley lenyol makko, mi ɓaŋanowa ɓiyiiko toon.
39 Mbi'umi joomam:
— De si debbo oon salake jokkude kam, noy ɗum laatortoo?
40 O wi'i kam: Joomiraaɗo mo o jokki laawol muuɗum oon nulan maleyka muuɗum yeeso am faa laawol am wooɗa, mi ɓaŋana ɓiyiiko oon debbo ley jeydaaɓe makko e suudu baabiiko. 41 Ndeen kaa, si mi yottake to jeydaaɓe makko, mi laaɓii e hunayeere nde o wi'i mi hunoo ndeen. Fay si ɓe calii hokkude kam, mi laaɓii miin kaa e hunayeere ndeen.
42 Wooɗi, ngarumi hannden ɗakkol ɓunndu nduun, de mbiimi:
— Joomiraaɗo, Laamɗo joomam Ibrahiima, si a jaɓii fu, moƴƴin laawol am ngol njahammi ngool. 43 Inan miɗo ndarii ɗakkol ɓunndu ndu. Si surbaajo yaltii faa ƴooga de mbiimi ɗum: «hokkam ndiyam seeɗa e loonde maa mi yara», 44 de wi'i kam: «Yaru, wooɗi mi ƴoogan, mi yarna geelooɗi maa ɗiin du» fu, oon laatoo debbo mo Joomiraaɗo suɓanii ɓii joomam oon.
45 Fadde am e yottinde du'aare am, Rifka yalti na wara, na deki loonde dow balawal. O jippii to ɓunndu nduun, o ƴoogi.
De mbi'umi mo:
— Miɗo ŋaare, kokkaa kam ndiyam mi yara.
46 O harii, o jippini loonde makko, o wi'i:
— Yaru! Geelooɗi maa ɗi du, mi yarnan ɗum'en.
Njarumi, de o yarni geelooɗi am ɗiin du.
47 Lamndiimi mo:
— Aan wo a ɓii moy?
O jaabii, o wi'i:
— Miin, mi ɓii Betuwel, mi taan Milka e Nahor.
Ndeen ngattumi hootonnde e hinere makko, ngattumi jawe du e juuɗe makko. 48 Ndikkiniimi, cujidanmi Joomiraaɗo.
Mi yettii Laamɗo Joomiraaɗo mo joomam Ibrahiima, sabo ɗowii kam e laawol dartiingol, faa mi hooƴana ɓii joomam Ibrahiima oon jom suudu e ƴuwdi sakiike muuɗum. 49 Wooɗi! Joonin kaa, si oɗon njarrii waɗande joomam oon hinney e hoolnaare fu, kumpiton kam. Si wanaa noon du, kumpitee kam faa mi annda ko ngaɗanmi.
50 Laban e Betuwel njaabii, mbi'i:
— Kabaaru o ƴuurii to Joomiraaɗo, min mbaawaa wi'ude ma na wooɗi naa wooɗaa. 51 Inan Rifka yeeso maa. Hooƴu mo, njahaa. O laatoo jom suudu ɓii jooma hono no Joomiraaɗo wi'iri noon.
52 Nde maccuɗo Ibrahiima oon nannoo ko ɓe mbi'i ɗuum fu, sujidani Joomiraaɗo, yetti ɗum.
53 Ndeen o wurtini kaŋŋe e cardi e kaddule, o hokki Rifka. O hokki sakiike muuɗum gorko oon e inna mum dokke korsuɗe. 54 Ndeen, kanko e worɓe makko ɓeen, ɓe nyaami, ɓe njari, de ɓe mbaali ɗoon.
Nde ɓe umminoo beetee ndeen, maccuɗo Ibrahiima oon wi'i:
— Accee kam mi hoota to joomam.
55 Ammaa ɓe njaabii mo, ɓe mbi'i:
— Accaa o heddodoo e amin balɗe seeɗa, fay si wo balɗe sappo, ndeen o yaha.
56 O jaabii ɓe, o wi'i:
— Taa kanndee kam, sabo Joomiraaɗo moƴƴinii laawol am. Accee kam mi nannga laawol am, mi hoota to joomam.
57 Ɓe mbi'i:
— Nodden suka debbo oon, lamndoɗen ɗum miilo muuɗum.
58 Ɓe noddi Rifka, ɓe mbi'i ɗum:
— Yalla a yaadan e gorko o naa?
O jaabii, o wi'i:
— Mi yaadan e makko.
59 Ɓe ɗowtiri Rifka sakiike maɓɓe debbo oon, kam e korɗo kayboowo ɗum gilla wo suka e maccuɗo Ibrahiima oon e yimɓe muuɗum. 60 Ɓe ndu'anii Rifka, ɓe mbi'i ɗum:
— Sakiike amin debbo keewaa faa laatoɗaa ujunaaje ujune, ƴuwdi maa rona naatirde e yaltirde wayɓe muuɗum.
61 Rifka ummii, kam e horɓe muuɗum. Ɓe mbaɗɗii geelooɗi, ɓe njokki gorko oon. Nii maccuɗo Ibrahiima oon yaadiri e Rifka.
62 Wooɗi, tawi wakkati oon du, Isiyaaka ina ƴuurannoo ɓunndu Lahay Roy, sabo wo horɗoore leydi Kanaana o jooɗinoo. 63 O yalti, imo yiiltoo (imo miiloo) ley ladde wakkati laasara. O hunci gite makko, de o yi'i geelooɗi ina ngara. 64 Rifka hunci gite muuɗum, de yi'i Isiyaaka. Wakkati oon o jippii ngeelooba ngaan. 65 O ƴami maccuɗo oon, o wi'i:
— Moy woni gorko ƴuuroowo ley ladde ina fonndii en o?
Maccuɗo oon jaabii, wi'i:
— Wo joomam.