No Ibrahiima soodiri saabeere Saaratu
23
1 Saaratu wuuri duuɓi hemre e noogay e jeɗɗi. 2 O maayi Kiriyat-Arba, ɗum woni Heberon, ley leydi Kanaana. Ibrahiima woyi mo. 3 Ibrahiima ummii dilli to maayɗo muuɗum oon, yehi haaldowi e Hitiyankooɓe. O wi'i:4 — Mi janano hakkunde mooɗon, wo mi beero ni. Coonniree kam saabeere ley nokku mon ɗo faa mi mooɓa maayɗo am.
5 Hitiyankooɓe ɓeen njaabii Ibrahiima, mbi'i:
6 — Joomii amin, hettindana min. Wo a neɗɗo Laamɗo tedduɗo hakkunde amin. Mooɓu maayɗo maa ɗo ɓuri wooɗude ley caabeeje amin ɗee fuu. Fay gooto amin haɗataa ma mooɓude maayɗo maaɗa ley saabeere muuɗum.
— Si on njaɓii mi mooɓa maayɗo am fu, nanee ko ŋaarotoomi on. Kaaldanee kam e Eforon, ɓii Sohar oon. 9 Mbi'on ɗum soonnira kam loho wonko waamnde Makpela, ko o jeyi. Iko tawaa keerol ngesa makko toon. Mi yoɓan ceede makko fuu yeeso mooɗon, ko laatanoo kam nokku caabeeje mo njeymi.
10 Eforon Hitiyanke oon ina tawaa ɗoon, ina jooɗodii e banndiraaɓe muuɗum. O jaabii Ibrahiima faa Hitiyankooɓe warɓe dammbugal huɓeere makko ɓeen fuu nani, o wi'i:
11 — Joomam, wanaa noon! Kettindanoɗaa kam. Ngesa ngaan, mi hokkii ma nga yeeso yimɓe am ɗo. Loho wonko e magga koon du, mi hokkii ma ko. Mooɓu maayɗo maa!
12 Ibrahiima hippii yeeso yimɓe laamorde ndeen katin, 13 haaldi e Eforon faa yimɓe laamorde ndeen fuu nani. O wi'i:
— Si a jaɓii fu, kettindanoɗaa kam. Mi hokkete coggu ngesa ngaan. Jaɓaa ɗum e junngo am tafon de mi mooɓa maayɗo am.
14 Eforon jaabii Ibrahiima, wi'i:
15 — Joomam kettindanoɗaa kam! Ceede leydi ndiin ina waɗa buuɗi cardi keme nay, de ɗume ɗuum foti hakkunde am e maaɗa? Mooɓu maayɗo maa.
16 Ibrahiima faamri e Eforon. O hiisanii ɗum ceede ɗe wi'i ɗeen yeeso Hitiyankooɓe fuu: buuɗi cardi keme nay, ko hawrata e fonndirde luumotooɓe. 17 Ibrahiima soodi ngesa Eforon goonga ɗakkol Makpela, lettugal Mamre ngaan, kanga e loho wonko e magga koon, e leɗɗe gonɗe ley ngesa ngaan, e gonɗe faro keerol magga ɗeen fuu. 18 Ibrahiima soodi ɗum fuu yeeso Hitiyankooɓe e yeeso yimɓe warɓe dammbugal huɓeere ɓeen.