No Laamɗo ndaartindorii Ibrahiima
22
1 Caggal ɗuum, Laamɗo ndaartindii Ibrahiima, wi'i ɗum:— Ibrahiima!
Oon jaabii, wi'i:
— Inani kam!
2 Joomiraaɗo wi'i mo:
— Adu Isiyaaka, ɓiya korsuɗo mo njiɗɗaa sanne oon, njahaa leydi Moriya, ngaɗaa mo sadaka buleteeɗo dow waamnde mawnde nde kollanmaami ndeen.
3 Ibrahiima dawi beetee law, feƴƴi leɗɗe duppirteeɗe sadaka, rimndi araawa muuɗum, de noddi sukaaɓe muuɗum gollooɓe ɗiɗo e Isiyaaka ɓiyum oon, ɓe njaadi. O yehi nokku mo Laamɗo sifanii mo oon. 4 E nyalooma tatoɓo, Ibrahiima hunci gite muuɗum, de yi'i nokku oon to woɗɗi. 5 Ibrahiima haaldi e gollooɓe muuɗum ɓeen, wi'i:
— Keddee ɗo, onon e araawa ngaan. Miin e suka o, min ƴeeŋan faa dow toon, min cujida, de min ngarta.
6 Ibrahiima hooƴi leɗɗe duppirteeɗe sadaka ɗeen, ronndini ɗe Isiyaaka ɓiyum oon. Imo tiigii e junngo makko yiite e laɓi. Kamɓe ɗiɗo, ɓe njaadi. 7 Isiyaaka haaldi e bammum Ibrahiima, wi'i ɗum:
— Abba!
Oon jaabii:
— Inani kam, ɓinngel am.
O wi'i:
— Inan yiite e leɗɗe, de toy jawgel duppeteengel ngeel le woni?
8 Ibrahiima jaabii, wi'i:
— Ɓinngel am, Laamɗo hokkan jawgel duppeteengel ngeel.
Ɓe njokki yaade. 9 Nde ɓe njottinoo nokku ɗo Laamɗo sifanii mo ɗoon fu, Ibrahiima nyiɓi hirsirde. O hawrundiri leɗɗe ɗeen. O haɓɓi Isiyaaka ɓiyiiko oon, o yowi ɗum dow hirsirde ndeen, faa dow leɗɗe mayre. 10 Ibrahiima foorti junngo mum, hooƴi laɓi faa hirsa ɓiyum oon. 11 Ammaa wakkati oon, Maleyka Joomiraaɗo ƴeewnii illa dow kammuuli, noddi mo, wi'i:
— Ibrahiima! Ibrahiima!
O jaabii, o wi'i:
— Inani kam!
12 Joomiraaɗo wi'i:
— Taa junngo maa yottoo suka oon! Taa ngaɗaa mo fay gootum, sabo joonin kaa, mi annditii wo a kulɗo Laamɗo. A salanaaki kam ɓiya korsuɗo gooto mo njogiɗaa oon.
13 Ibrahiima hunci gite muuɗum ndaari, tawi inan njawdiri, luwe mayri ina piilii e wuumoore. O yehi o nanngi ndi, o waɗani Joomiraaɗo sadaka buleteeɗo, ndi loomtani ɓiyiiko oon. 14 Ibrahiima inndiri nokku oon «Joomiraaɗo hokkan». Faa hannden nokku oon ina inndiree «Dow waamnde nde Joomiraaɗo hokkata.»
15 Katin Maleyka Joomiraaɗo noddi Ibrahiima illa dow kammuuli.
16 O wi'i:
— Inan konngol Joomiraaɗo: «mi hunorake e hoore am, saabe ko ngaɗuɗaa ɗuum, a salanaaki kam ɓiya gooto korsuɗo mo njogiɗaa oon, 17 mi barkinte, mi ɗuuɗinan ƴuwdi maa hono koode kammu, e hono njaareendi daande maayo. Ƴuwdi maa ronan naatirde e yaltirde wayɓe muuɗum. 18 E ƴuwdi maaɗa lenyi duuniyaaru fuu keɓirta barke, sabo a ɗowtanake konngol am.»
19 Ibrahiima yeccii to gollooɓe muuɗum toon. Ɓe ummii, ɓe kooti Beerseba sabo toon Ibrahiima jooɗinoo.
Haala ƴuwdi Nahor
20 Caggal ɗuum, Ibrahiima humpitaa, wi'aa:
Inan Milka du rimanii Nahor minya gorko oon ɓiɓɓe worɓe: 21 Us afo makko e Buus minyum, e Kemuwel baaba Aram. 22 O rimanii oon katin Keset, e Hajo, e Pildas, e Yidilaf, e Betuwel.