No Laamɗo faaminiri Saaratu heɓan ɓiɗɗo gorko
18
1 Joomiraaɗo ɓangani Ibrahiima ɗakkol leɗɗe mawɗe Mamre tawi imo jooɗii dammbugal hukum makko hakkunde naange. 2 O hunci gite makko, o yi'i worɓe tato ina ndarii yeeso makko. Nde o yi'unoo ɓe fu, o harii, o ƴuwi dammbugal hukum ɗoon, o doggi, o sakkitii ɓe. O hippii yeeso maɓɓe, o wi'i:3 — Joomam, si mi heɓii hinney yeeso maaɗa fu, taa caloɗaa weerande kam, miin maccuɗo maaɗa. 4 Accee ndiyam seeɗa waddee, looton koyɗe mon, ŋottinoɗon ley lekki ɗo. 5 Mi waddanan on tayre buuru nyaamon de keɓon semmbe. Saabe ko pantuɗon kam miin maccuɗo mooɗon ɗuum, accee ngarren noon. Caggal ɗuum oɗon mbaawi faltaade.
Ɓe mbi'i:
— Waɗu no mbiiruɗaa noon.
6 Ibrahiima waɗi law yottii to Saaratu ley hukum toon, wi'i ɗum:
— Yaawnu! Moƴƴin conndi alkama etirɗe tati, ndiibaa, ngaɗaa maasaaje.
7 Ibrahiima doggiri to na'i muuɗum toon, suɓii ga'el payngel baggel, hokki ngel suka golloowo muuɗum, oon moƴƴini ngel law. 8 O hooƴi kettungol e ɓiraaɗam e ga'el moƴƴinaangel ngeel, o yaari yeeso maɓɓe. O heddii imo darii ɗakkol maɓɓe ley lekki kiin, iɓe nyaama. 9 Ɓe kaaldi e makko, ɓe mbi'i:
— Toy Saaratu deeka oon woni?
O jaabii, o wi'i:
— Inani mo ley hukum.
10 Gooto e maɓɓe wi'i:
— Mi wartan to maa mawuuri hono wakkati o, tawan Saaratu jom suudu maa oon heɓii ɓiɗɗo gorko.
Saaratu nani, tawi ina wonnoo dammbugal hukum caggal makko. 11 Ndeen tawi duuɓi Ibrahiima e Saaratu keewii sanne, tawi du Saaratu faltake ɓeyngu. 12 Saaratu jali e ɓernde muuɗum, wi'i:
— Yalla muuyo ina woodani kam katin no naywirmi nii naa? Wooɗi du, duuɓi jom suudu am keewii!
13 Joomiraaɗo haaldi e Ibrahiima, wi'i:
— Ko waɗi Saaratu jali de wi'i noy waawri rimude de wo nayeejo. 14 Yalla na woodi ko tiiɗani Laamɗo naa? Mi wartan to maaɗa mawuuri hono wakkati o, tawan Saaratu heɓii ɓiɗɗo gorko.
15 Saaratu kaa yeddi, wi'i:
— Mi jalaay!
Joomiraaɗo jaabii mo, wi'i:
— A'aa! A jalii.
No Ibrahiima surdani huɓeere Sodoma
16 Worɓe tato ɓeen ndilli ɗoon, ponndii faro Sodoma. Ibrahiima ɗowti ɓe faa waynoo ɓe. 17 Joomiraaɗo miilii, wi'itii:
— Ndelle mi suuɗan Ibrahiima ko ngaɗammi ɗuum naa? 18 Si goonga Ibrahiima laatoto lenyol manngol, jogiingol semmbe. Lenyi adunaaru fuu e makko keɓirta barke. 19 Sabo mi suɓake mo faa o yamira ɓiɓɓe makko e suudu makko tinnaade e laawol Joomiraaɗo caggal makko, ɓe ngolla ko fonnditii e ko dartii faa mi waɗana Ibrahiima ko aadaniimi ɗum ɗuum.
20 Ndeen Joomiraaɗo wi'i Ibrahiima:
— Ko Sodoma e Gomoora mbullitaa saabe bonanda muɓɓen ɗuum mawnii faa faltake. Hakkeeji maɓɓe du keewii sanne. 21 Saabe ɗuum mi jippoto mi ndaara yalla golleeji maɓɓe ina poti e bullitaali ɗi nanumi ɗiin naa. So ɗi potaa noon du, mi faaman.
22 Ɗiɗo maɓɓe ndewi faro Sodoma. De Ibrahiima kaa heddii ina darii yeeso Joomiraaɗo. 23 Ibrahiima ɓattii, wi'i:
— Ndelle a halkidan fonnditiiɓe e oonyiiɓe fuu naa? 24 Ina waawi tawee fonnditiiɓe capanɗe njoyo ina ngoni ley huɓeere ndeen. Ndeen le a halkan nde naa? A yoppataa nde saabe capanɗe njoyo fonnditiiɓe wonɓe e mayre ɓeen naa? 25 Kayto! A wanaa ngaɗoowo iri ɗuum! Wardude fonnditiiɓe e oonyiiɓe faa fonnditiiɓe ngaɗee hono no oonyiiɓe ngaɗetee nii. Wanaa carotooɗo adunaaru fuu ina golla ko fonnditi naa?
26 Joomiraaɗo jaabii, wi'i:
— Si mi tawii fonnditiiɓe capanɗe njoyo ley huɓeere Sodoma ndeen, mi yoppan nde nde fuu saabe maɓɓe.
27 Ibrahiima jaabii katin, wi'i:
— Wooɗi, mi suusii haaldude e maaɗa, aan Joomiraaɗo, miin laatiiɗo colla e ndoondi ɓoldi o. 28 Si tawii njoyo ina nyaki ley capanɗe njoyo ɓeen le? Saabe njoyo nyakuɓe ɓeen, a halkan huɓeere ndeen fuu naa?
Joomiraaɗo wi'i:
— Mi halkataa nde si mi tawii toon fonnditiiɓe capanɗe nayo e njoyo.
29 Ibrahiima haaldi e makko katin wi'i:
— Si capanɗe nayo tawaama toon le?
Joomiraaɗo jaabii, wi'i:
— Mi halkataa ɓe saabe fonnditiiɓe capanɗe nayo ɓeen.
30 Ibrahiima wi'i katin:
— Joomiraaɗo, taa ɓernu, won ko njiɗumi ɓeydude. De si fonnditiiɓe capanɗe tato tawaama toon le?
O jaabii, o wi'i:
— Mi halkataa ɓe si mi tawii toon fonnditiiɓe capanɗe tato.
31 Ibrahiima ɓeydi katin, wi'i:
— A yi'ii mi suusii haaldude e maaɗa, aan Joomiraaɗo. De si fonnditiiɓe noogayo tawaama toon le?
Joomiraaɗo wi'i:
— Mi halkataa ɓe saabe fonnditiiɓe noogayo ɓeen.
32 Ibrahiima wi'i katin:
— Joomiraaɗo, taa ɓernu. Mi ɓeydan huunde wootere tan. Si fonnditiiɓe sappo tawaama toon le?
Joomiraaɗo jaabii, wi'i:
— Mi halkataa ɓe saabe fonnditiiɓe sappo ɓeen.
33 Joomiraaɗo dilli nde tilinoo haaldude e Ibrahiima ndeen. Ibrahiima hooti wuro muuɗum.