No innde Abram waylitorii Ibrahiima
17
1 Nde Abram waɗunoo duuɓi capanɗe jeenay e jeenay ndeen, Joomiraaɗo ɓangani mo, wi'i:— Miin woni Laamɗo Jom Baawɗe. Jokku laawol am, laatoɗaa ponnditiiɗo. 2 Mi waɗan amaana hakkunde am e maaɗa, mi ɗuuɗinan ƴuwdi maa sanne.
3 Abram sujidi. Laamɗo haaldi e makko, wi'i:
4 — Miin kaa, inan amaana mo ngaɗanmaami: A laatoto baaba lenyi keewɗi. 5 A noddirtaake Abram katin (ɗum na fiirta «Abba tedduɗo»), de joonin kaa, innde maa laatake Ibrahiimaa sabo mi waɗete baaba lenyi keewɗi. 6 Mi ɗuuɗinan ɓeyngu maa sanne. Mi waɗete lenyi keewɗi. Kaanankooɓe njaltan e maaɗa. 7 Mi tabintinan amaana am hakkunde am e maaɗa e ƴuwdi maa ngaroori caggal maaɗa, o laatoo amaana duumotooɗo faa abada. Mi laatoto Laamɗo maaɗa, aan e ƴuwdi maaɗa ngaroori caggal maa. 8 Mi hokkete aan e ƴuwdi maaɗa ngaroori caggal maa, leydi ndi laatiɗaa koɗo e muuɗum ndiin. Leydi Kanaana ndiin fuu, laatoto halal maa faa abada. Mi laatoto Laamɗo ƴuwdi maaɗa.
9 Laamɗo haaldi e Ibrahiima katin, wi'i ɗum:
— Aan kaa, njogoɗaa amaana am oon, aan e ƴuwdi maaɗa ngaroori caggal maa ley jamaanuuji muɓɓen fuu. 10 Inan amaana hakkunde am e maaɗa mo njeyɗaa jokkude aan e ƴuwdi maa ngaroori caggal maaɗa: Taadon ɓiɗɗo gorko fuu. 11 Taadol ngool laatoo maande amaana gonɗo hakkunde am e mooɗon oon. 12 Ley waalde ummiinde fuu, ɓiɗɗo gorko dimaaɗo faa waɗi balɗe jeetati fuu, taadon ɗum. Taadon ɓiɗɗo gorko jeyaaɗo ley suudu mooɗon fuu, e janano dimaaɗo ley suudu mooɗon mo coodunoɗon fuu. 13 Dimaaɗo ley suudu maa e mo cooduɗaa fuu taadee faa amaana am oon tawee e ɓalli mon. Ɗum laatoo amaana duumotooɗo faa abada. 14 Gorko mo taadaaka fu ittete e yimɓe muuɗum, sabo joomum bonnii amaana am oon.
15 Laamɗo haaldi e Ibrahiima katin, wi'i ɗum:
— Saaray deeka oon, taa mbi'aa mo Saaray katin. Joonin kaa, Saaratu woni innde makko (ɗum na fiirta «ɓii laamu debbo»). 16 Mi barkinan mo, mi hokkete du ɓiɗɗo gorko ƴuuroowo e makko. Mi barkinan mo, o laatoto inna lenyi keewɗi. Laamiiɓe e lenyi keewɗi njaltan e makko.
17 Ibrahiima hippii sujidi, jali, de wi'i e ɓernde mum:
— Gorko mo duuɓi hemre ina rima katin naa? Yalla Saaratu keɓuɗo duuɓi capanɗe jeenay o, ina waawi heɓude ɓeyngu katin naa? 18 Ibrahiima haaldi e Laamɗo, wi'i:
— Jaɓu Ismaa'iila laatoo donoowo kam.
19 Laamɗo jaabii, wi'i:
— Wanaa ɗum! Saaratu deeka oon jaati rimante ɓiɗɗo gorko. A inndiran mo Isiyaaka. Mi tabintinan amaana am e makko, de amaana oon laatanto ƴuwdi makko ngaroori caggal makko, amaana duumotooɗo faa abada. 20 Ko mbiiɗaa e Ismaa'iila ɗuum, mi jaɓanii ma. Mi barkinan mo. Mi hokkan mo ɓeyngu, mi ɗuuɗinan mo sanne. O laatoto baaba laamotooɓe sappo e ɗiɗo. Mi waɗan mo lenyol manngol. 21 Ammaa aadi am ndiin, mi tabintinan ndi e Isiyaaka mo Saaratu rimante mawuuri ley wakkati o.
22 Nde Laamɗo selnoo haaldude e Ibrahiima fu, dilli.
23 Ibrahiima hooƴi Ismaa'iila ɓiyum oon, e rimaaɓe e suudu muuɗum, e ɓe soodi ɓeen fuu. O hooƴi worɓe galle makko fuu, o taadi ɗum'en nyalooma oon hono no Laamɗo wi'iri mo noon. O taadi hoore makko du. 24 Nde Ibrahiima taadotonoo ndeen, duuɓi muuɗum wo capanɗe jeenay e jeenay. 25 Ismaa'iila ɓiyiiko oon du duuɓi muuɗum wo sappo e tati de taadaa. 26 Nyalooma oon pay, Ibrahiima e Ismaa'iila ɓiyum oon taadodii. 27 Yimɓe ɓaade makko, e rimaaɓe to makko, e ɓe o soodi to jananɓe fuu, taadodii e makko.