No Laamɗo waɗiri amaana hakkunde muuɗum e Abram
15
1 Caggal ɗuum, konngol Joomiraaɗo wari e Abram, wi'i:— Taa hulu Abram! Miin woni wawaade maa, mbarjaari maa mawnan sanne.
2 Abram jaabii, wi'i:
— Hey, Laamɗo Joomiraaɗo, ɗume njiɗɗaa hokkude kam? Inani kam, faa joonin mi walaa ɓiɗɗo. Donoowo kam e suudu am du wo Eliyeser jeyaaɗo Damasku.
3 Abram ɓeydi, wi'i:
— A hokkaay kam ƴuwdi. A yi'i, janano bammbaaɗo e suudu am oon ronata kam.
4 Ndeen konngol Joomiraaɗo wari e makko, wi'i:
— Wanaa oon ronete. Donoowo ma oon e maaɗa jaati yaltata.
5 Joomiraaɗo wurtini mo yaasin, wi'i:
— Ndaar kammu, de limaa koode maggu si aɗa waawi.
O ɓeydi, o wi'i:
— Noon ƴuwdi maaɗa heewirta.
6 Abram goonɗini Joomiraaɗo, de saabe majjum Laamɗo hiisorii mo wo o ponnditiiɗo.
7 Joomiraaɗo haaldi e makko, wi'i:
— Miin woni Joomiraaɗo jaltinɗo ma wuro Uur, leydi Kaldiya faa hokke leydi ndi, ndonaa ndi.
8 Abram ƴami mo, wi'i:
— Joomiraaɗo, maande ndeye annditirammi mi ronan ndi?
9 Laamɗo jaabii, wi'i:
— Kooƴanaa kam wiige tatiiwe, e mbeewa nga duuɓi tati, e njawdiri tatiiri, e wuugaandu ladde, e wuugaandu maraandu.
10 Abram hooƴi, fecci ɗi, ɗi fuu hakkunde. O huccunduri pecce ɗeen ammaa pooli ɗiin kaa, o feccaay ɗum'en. 11 Jigaaje njippii dow daabaaji kirsaaɗi ɗiin, de Abram riiwi ɗe.
12 Nde naange yanunoo fu, ɗoyngol tekkungol nanngi Abram. Nimre mawnde suddi mo, o huli kulol manngol. 13 Joomiraaɗo haaldi e Abram, wi'i:
— Paamaa ƴuwdi maa ndiin laatoto njananndi nder leydi ndi ɓe njeyaaka e muuɗum. Ɓe laatoto maccuɓe yimɓe leydi ndiin, ɓe torrete duuɓi keme nay. 14 Ammaa mi jukkoto lenyol ngol ɓe laatanii maccuɓe ngool, de caggal ɗuum, ɓe njaltidan e jawdi keewndi. 15 Aan kaa, a yahan e jam to maamiraaɓe maa, a mooɓete, tawa a heɓii nayeewu mbelngu. 16 Ley jamaanu nayaɓu, ƴuwdi maa ndiin wartan ɗo, sabo etorgal hakkeeji Amorinkooɓe hiɓɓaay tafon sakko mi jukkoo ɗum'en.