Abram e Kaanankooɓe e Malkisedek
14
1 Waɗiino ley nyalaaɗe ɗe, Amrafel kaananke Sinar e Ariyok kaananke Elasaar e Kedar-Layomer kaananke Elam e Tidal kanaanke Goyim 2 oorani Bera kaananke Sodoma e Birsa kaananke Gomoora e Sinabu kaananke Aduma e Semeber kaananke Seboyim e kaananke Bela, ɗum woni Sowar.3 Ɓe fuu ɓe kawritowi naɗɗol Sidim. Kanngol inndirtee Weendu Lamɗam. 4 Duuɓi sappo e ɗiɗi ɓe laatorii maccuɓe Kedar-Layomer, ammaa ley hitaande sappo e tataɓerde ndeen, ɓe muurti. 5 Ley hitaande sappo e nayaɓerde, Kedar-Layomer e kaanankooɓe wonduɓe e muuɗum ɓeen ngari njaalii Refayinkooɓe nokku bi'eteeɗo Astarot Karnayim. Ɓe njaalii Jujinkooɓe ngenndi Ham, ɓe njaalii Eminkooɓe ley njaayri Kiriyatayim, 6 ɓe njaalii Horinkooɓe dow waamnde muɓɓen Seyir ndeen faa yottii Eyel-Paran wuro wonngo ɗakkol seeno ngoon. 7 Ɓe ngarti. Ɓe oorani En-Mispat, ɗum woni Kaades. Ɓe njaalii leydi Amalek'en e leydi Amorinkooɓe to Hasason-Tamar.
8 Kaananke Sodoma oon yaltidi e kaanankooɓe Gomoora e Aduma e Seboyim e Bela, ɗum woni Sowar. Ɓe cegilanii konu ley naɗɗol Sidim. 9 Ɓe kaɓdi e Kedar-Layomer kaananke Elam, e Tidal kanaanke Goyim, e Amrafel kaananke Sinar, e Aryok kaananke Elasaar. Ndelle kaanankooɓe nayo na kaɓda e kaanankooɓe njoyo. 10 Wakkati oon tawi naɗɗol Sidim ngool ina heewi loofe ɗaatuɗe hono taari. Nde kaanankooɓe Sodoma e Gomoora ndoggannoo ndeen, caami toon. Woɓɓe maɓɓe ndoggi ponndii waamde. 11 Kaanankooɓe nayo ɓeen kooƴi jawdi Sodoma e Gomoora fuu. Ɓe adi neema e ko ɓeen njoginoo fuu, ɓe ndillidi. 12 Ɓe nanngi Luudu, ɓii sakiike Abram, e jawdi muuɗum fuu, ɓe ndilli. Tawi ley Sodoma Luudu jooɗinoo.
13 Woodii dogguɗo daɗi, haalanowi Abram Ibraninkeejo. Ndeen tawi Abram ina hoɗi ley leɗɗe Amorinke bi'eteeɗo Mamre. Oon wo sakiike Eskol e Aner. Aadi ina wonnoo hakkunde maɓɓe e Abram. 14 Nde Abram nanunoo sakiike muuɗum oon nanngaama ndeen, ummodii e maccuɓe muuɗum waawuɓe wolde, rimaaɓe ley ɓaade muuɗum, worɓe keme tato e sappo e njeetato. O taayniti kaanankooɓe nayo ɓeen faa Dan. 15 O fecci yimɓe makko ɓeen, de ɓe koni kaanankooɓe ɓeen ley jemma. O riiwi ɓe, o jokki ɓe faa Hooba, soɓɓiire Damasku. 16 O teeti jawdi ndiin fuu, o wartiri Luudu sakiike makko e jawdi muuɗum, e rewɓe, e jamaa oon fuu.
17 Nde Abram jaaloynoo Kedar-Layomer e kaanankooɓe wonduɓe e muuɗum ɓeen ley naɗɗol Saawe toon, ɗum woni naɗɗol bi'eteengol naɗɗol Kaananke ndeen, kaananke Sodoma yalti jaɓɓii o.
18 Malkisedek kaananke Salaam wurtini buuru e cabijam. Kanko woni almaami Laamɗo Toowɗo.
19 O barkini Abram, o wi'i:
— Laamɗo Toowɗo taguɗo kammu e leydi,
barkin Abram.
20 Jettooje ngoodanii Laamɗo Toowɗo
gattuɗo wayɓe maaɗa e junngo maa.
Abram hokki mo sappoɓerde e ley huunde fuu ko jogii.
21 Kaananke Sodoma oon haaldi e Abram, wi'i:
— Hokkam yimɓe am, de njogoɗaa jawdi ndiin.
22 Abram jaabii mo, wi'i:
Mi ƴeptii junngo am mi hunorake Laamɗo Joomiraaɗo Toowɗo, taguɗo kammu e leydi, 23 mi hooƴantaa ma fay huunde, fay gaarawol naa ɓoggol paɗe maa, sakko mbi'aa aan waɗi Abram jom jawdi. 24 Mi hooƴataa fay huunde si wanaa ko yimɓe am ɓeen nyaami e ngeɗu yaadooɓe e am. Ɓeen ngoni Aner e Eskol e Mamre, accaa ɓeen kaa kooƴa ngeɗu muɓɓen.