13
1 Abram dilli Misira, hoɗowi horɗoore leydi Kanaana, kam e jom suudu muuɗum e ko jeyi fuu. Luudu ina wondi e makko.No Abram e Luudu ceediri
2 Abram ina woodunoo jawdi sanne. Imo jogii daabaaji e cardi e kaŋŋe faa heewi. 3 O waɗi egga-hoɗa gilla leydi horɗoore faa Baytila, faa nokku ɗo hukum makko wonnoo arande ɗoon, hakkunde Baytila e Ayi, 4 faa nokku ɗo o nyiɓunoo hirsirde arande ɗoon. Toon Abram noddi innde Joomiraaɗo, teddini ɗum.
5 Luudu, jaadoowo e Abram oon du, ina joginoo dammuuli e na'i e hukumuuji. 6 No jawdi maɓɓe foti heewude, leydi ndiin heƴaay ɓe. Gondal maɓɓe tiiɗi. Ɓe mbaawaay jooɗodaade. 7 Haɓo waɗi hakkunde durooɓe Abram e durooɓe Luudu. Katin du, Kanaaninkooɓe e Perisinkooɓe ngonnoo ɓiɓɓe leydi ndiin wakkati oon. 8 Abram haaldi e Luudu, wi'i ɗum:
— Taa hamre waɗa hakkunde men, taa durooɓe maa e durooɓe am du kaɓa, sabo en sakiraaɓe. 9 Ndaar leydi ndi fuu yeeso maa. Tilay ceeden. Si a rewii gere nano, miin mi rewan gere nyaamo. Si a rewii gere nyaamo du, mi rewan gere nano.
10 Luudu ƴepti gite muuɗum, de yi'i njaayri Urdun, indi feewi hono ngesa leɗɗe Joomiraaɗo, hono leydi Misira heedde Sowar. Ɗum woni fadde Joomiraaɗo halkude gure Sodoma e Gomoora. 11 Luudu suɓii njaayri Urdun ndiin fuu, faro lettugal. Nii ɓe ceediri. 12 Abram heddii e leydi Kanaana, de Luudu du hoɗowii ley gure mawɗe gonɗe e njaayri ndiin. O tonti hukumuuji makko faa Sodoma. 13 Ammaa yimɓe Sodoma wo bonɓe, luttuɓe Joomiraaɗo sanne.
14 Gaɗa ko Luudu seedii e Abram ɗuum, Joomiraaɗo haaldi e Abram, wi'i ɗum:
— Huncu gite maa, ƴeewaa illa nokku mo ngonɗaa oon, soɓɓiire e horɗoore, lettugal e gorgal. 15 Leydi ndi nji'ataa ndiin fuu, wo aan e ƴuwdi maa kokkammi ndi faa abada. 16 Mi waɗan ƴuwdi maa heewa hono njaareendi. Si njaareendi na waawi limeede fu, ƴuwdi maa ndiin du waawan limeede. 17 Umma, njiiltoɗaa e leydi ndiin, ndaaraa njuuteefi mayri e njaajeefi mayri sabo aan kokkammi ndi.
18 Abram eggi, darnoyi hukum muuɗum ley leɗɗe mawɗe ɗe Mamre, ley Heberon. Toon o nyiɓani Joomiraaɗo hirsirde.