Nguurndam Ibrahiima
No Laamɗo noddiri Abrama
12
1 Joomiraaɗo haaldi e Abram, wi'i:— Dillu leydi maa e lenyol maa e suudu bammaa, njahaa leydi ndi kollanmaami ndiin.
2 Mi waɗete lenyol manngol,
mi barkinte,
mi mawninan innde maa.
Yimɓe fuu keɓan barke saabe maaɗa.
3 Mi barkinan barkinɓe ma,
Mi huɗan kuɗuɗo ma.
Saabe maaɗa lenyi adunaaru fuu keɓan barke.
4 Abram yehi hono no Joomiraaɗo wi'iri ɗum noon. Luudu yaadi e makko. Imo tawraa duuɓi capanɗe jeɗɗi e joy nde o dillannoo Haran. 5 O yaadi e Saaray jom suudu makko e Luudu ɓii sakiike makko e jawdi maɓɓe e maccuɓe maɓɓe ko ɓe keɓi Haran. Ɓe ndilli Haran faa ɓe njaha leydi Kanaana.
Abram ley leydi Kanaana e Misira
6 Nde ɓe njottinoo leydi Kanaana ndeen, Abram dawi feƴƴiti leydi ndiin faa yottowii Sikem, to lekki mawki ngonuki Mooreb. Wakkati oon, Kanaaninkooɓe ngonnoo e leydi ndiin.
7 Joomiraaɗo ɓangani Abram, wi'i ɗum:
— Wo ƴuwdi maa kokkammi leydi ndi.
Abram mahani Joomiraaɗo hirsirde to ɓangani ɗum toon. 8 O eggi ɗoon, o yehi hayre wonnde lettugal Baytila, o darni hukum makko. Baytila ina heedi gorgal, Ayi du ina heedi lettugal. Toon o mahani Joomiraaɗo hirsirde, o waɗi du'aare e innde Joomiraaɗo, o teddini ɗum. 9 Noon Abram heddii ina waɗa egga-hoɗa faro horɗoore leydi Kanaana.
10 Wooɗi, rafo waɗi e leydi ndiin. Wakkati oon Abram jippii, yehi Misira faa jooɗowoo toon, sabo rafo ngoon mawni sanne e leydi ndiin. 11 Nde o ɓadinoo yottaade Misira ndeen, o haaldi e Saaray jom suudu makko, o wi'i ɗum:
— A yi'ii, miɗo anndi a debbo jom ŋari, belɗo ndaarude. 12 Si Misirankooɓe nji'ii ma fu, mbi'an wo a jom suudu am. Ɓe mbaran kam, de ɓe acce aan kaa mbuura. 13 Miɗo ŋaare, mbi'aa wo a sakiike am debbo faa mi heɓa moƴƴere, de mi wuura saabe maaɗa.
14 Nde Abram yottinoo Misira ndeen, Misirankooɓe nji'i deekum oon na ŋarɗi sanne. 15 Mawɓe laamu du nji'i mo, de mani o to Fira'awna. O adaa, o yaaraa to suudu Fira'awna. 16 Abram heɓi moƴƴere saabe makko. O heɓi maccuɓe e horɓe e dammuuli e na'i e araaji gori e tefeeji e geelooɗi. 17 Ammaa Joomiraaɗo fiyiri Fira'awna e suudu muuɗum nyawuuji bonɗi saabe Saaray jom suudu Abram oon. 18 Fira'awna noddi Abram, wi'i:
— Ko saabii de ngaɗuɗaa kam ɗum? Ko waɗi de a haalanaay kam wo o deeka? 19 Ko waɗi mbiiɗaa kam wo o sakiike maa debbo, de kooƴumi mo faa o laatii jom suudu am? Joonin kaa inan deeka. Adu mo njahaa!
20 Fira'awna hokki yimɓe yamiroore ɗowta mo, kanko e jom suudu makko e huunde fuu ko o jeyi.