9
1 Laamɗo barkini Nuuhu e ɓiɓɓe muuɗum worɓe, wi'i ɓe:— Ndimee, ɓeydoɗon, keewon adunaaru.
2 Daabaaji adunaaru fuu kulan on kullol manngol. Pooli e liƴƴi e huunde fuu ko wuuri e adunaaru, mi wattii ɗum'en e juuɗe mooɗon. 3 Ko wuuri ko foofata e adunaaru fuu laatanoo on nyaamdu. Mi hokkii on ɗi hono no kokkirnoomi on haako hecco noon. 4 Ammaa taa nyaamee teewu ngu ƴiiƴam muuɗum ittaaka, sabo yonki ley ƴiiƴam woni. 5 Si daaba naa neɗɗo rufii ƴiiƴam mon, kanjam laatiiɗam yonki mon fu, mi ƴamtan ɗum ɗam. 6 Barɗo neɗɗo fuu warete. Sabo Laamɗo tagii neɗɗo e dow alhaali muuɗum.
7 Onon le, ndimee, ɓeydoɗon, keewon adunaaru.
8 Laamɗo haaldi e Nuuhu e ɓiɓɓe mum worɓe ɓeen, wi'i:
9 — Joonin inan mi tabintinan on amaana, onon e ƴuwdi mon, 10 e ko tagaa, ko wuuri, ko wondi e mooɗon fuu. Ɗum woni pooli e daabaaji wuro e kulle ladde, e daabaaji adunaaru jaltidinɗi e mooɗon laana mawka ɗiin fuu. 11 Inan amaana mo tabintinanmi on: ko tagaa ko foofata fuu, ndiyam tufaanu halkataa ɗum katin. Ilam tuufaanu halkataa adunaaru katin.
12 Laamɗo wi'i:
— Inan maande amaana hakkunde am e mooɗon e ko jogii yonki, ko wondi e mooɗon fuu, faa jamaanuuji garooji: 13 Mi waɗan ciiɓo-ciiɓongal ley duule, faa laatoo maande amaana hakkunde am e adunaaru. 14 Nde ɓanginmi duule dow adunaaru ndu, de ciiɓo-ciiɓongal ngaal ɓangii e duule fu, 15 miilo am wartan e amaana hakkunde am e mooɗon e ko tagaa ko foofata fuu. Ilam tuufaanu waɗataa katin faa halka ko tagaa fuu. 16 Ciiɓo-ciiɓongal waɗan ley duule, mi yi'a ngal de mi miccoo amaana duumiiɗo hakkunde am e ko tagaa ko foofata ko woni dow adunaaru fuu.
17 Laamɗo wi'i Nuuhu:
— Inan maande amaana mo ngaɗumi hakkunde am e ko tagaa dow adunaaru fuu.
Ɓiɓɓe Nuuhu
18 Ɓiɓɓe Nuuhu wurtiiɓe e laana ɓeen ngoni: Saam e Haam e Yaafasu. Haam woni Baaba Kanaana. 19 Ɓee tato ngoni ɓiɓɓe Nuuhu. E maɓɓe lenyi cankitiiɗi e adunaaru ɗiin fuu ƴuuri.
20 Nuuhu laatii demoowo arano. O waɗi ngesa cabiije. 21 Nyannde gomma o yari cabijam faa o sulii, de o taartii ley hukum makko. 22 Haam baaba Kanaana yi'i bammum ina taartii, de haalani sakiraaɓe muuɗum ɗiɗo wonɓe yaasin ɓeen. 23 Saam e Yaafasu kooƴi kaddungal, tiigii ngal, njaari gaɗa gaɗalde, cuuri baaba muɓɓen. Ɓe njeccii, ɓe nji'aay baabiiɓe ina taartii. 24 Nde Nuuhu sulitinoo fu, nani ko ɓiyum koddaajo oon golli ɗuum, 25 de wi'i:
— Laamɗo ittu Kanaana barke! O laatoto maccuɗo sakiraaɓe makko.
26 O wi'i katin:
Barke woodanii Joomiraaɗo, kanko woni Laamɗo Saam.
Kanaana laatoo maccuɗo Saam!
27 Laamɗo yaajin Yaafasu,
faa o jooɗoo ley hukumaaji Saam.
Kanaana du laatoo maccuɗo makko.