Ɓeeɓugol ilam tuufaanu
8
1 De Laamɗo miccitii Nuuhu e kulle ladde e daabaaji wuro gonduɗi e muuɗum ley laana ɗiin fuu. Laamɗo waɗi henndu wifi e adunaaru, ndeen diyeele ɗeen puɗɗi ɓuytaade. 2 Ilduɗe mawɗe ɗeen fuu ommbi, julanɗe kammu du kelti. 3 Caggal balɗe hemre e capanɗe joy ɗeen, ndiyam ɗaam ɓuytii faa famɗiti e adunaaru. 4 E lewru jeɗɗaɓurdu, sappo e jeɗɗi muuɗum, laana kaan jippii hakkunde baamle Ararat. 5 Ndiyam ɗaam heddii ina ɓeeɓa faa go'o lewru sappoɓurdu. Go'o mayru ko'e baamle ɗeen punti.6 Caggal balɗe capanɗe nay, Nuuhu omti feneetere nde o waɗi e laana kaan ndeen. 7 O yoofi daawuwal. Daawuwal ngaal ina yaha ina warta faa ndiyam hanti dow leydi. 8 O yoofi wuugaandu faa o faama yalla ndiyam ɗaam famɗitii e adunaaru nduun. 9 Ammaa wuugaandu nduun heɓaay fuu ɗo jippoo. Ndu yeccii to Nuuhu ley laana kaan, sabo ndiyam ɗaam ina heddii e adunaaru fuu. Nuuhu foorti junngo mum, nanngi ndu, nanni ley laana kaan.
10 O doomi faa balɗe jeɗɗi katin, de o yoofi wuugaandu nduun. 11 Wuugaandu nduun warti to makko kiiral naange ina wuufii haakorowol Jaytuunia keccol. Ndeen Nuuhu annditi ndiyam ɗaam famɗitii e adunaaru. 12 O doomi faa balɗe jeɗɗi goɗɗe, o yoofi wuugaandu nduun, de ndu wartaay to makko katin. 13 Nyannde arandeere, lewru go'oɓurdu, ndiyam ɗaam ɓeeɓi. Nyannde ndeen tawi duuɓi Nuuhu wo keme jeegom e go'o (601). Nuuhu omti laana kaan, ndaari, tawi leydi sunndii. 14 Nyannde noogay e jeɗɗi, lewru ɗiɗaɓurdu tawi leydi ndiin yoorii.
15 Laamɗo haaldi e Nuuhu, wi'i:
16 — Njaltee laana kaan, aan e jom suudu maa e ɓiɓɓe maaɗa worɓe e esiraaɓe maa. 17 Ko wuuri, ko tagaa ko wondi e maa fuu, njaltida e maaɗa. Ɗuum woni pooli e daabaaji e ko wuuri ko ladata fuu. Ɗi ndima faa heewa, ɗi ɓeydoo faa ɗi ɗuuɗa ley adunaaru. Ɗum woni pooli e daabaaji e ko wuuri ko ladata fuu.
18 Nuuhu yaltidi e ɓiɓɓe muuɗum e jom suudu mum e esiraaɓe muuɗum. 19 Daabaaji ɗiin e ko ladata e pooli, ko wuuri e adunaaru nduun, ngel fuu e sii muuɗum, njalti laana kaan.
20 Nuuhu mahani Joomiraaɗo hirsirde. O itti ley daabaaji dagiiɗi e pooli dagiiɗi ɗiin fuu, o hirsi, o waɗi sadaka buleteeɗo dow hirsirde ndeen. 21 Joomiraaɗo nani uurngol mbelngol, de wi'i ley miilo mum:
— Mi huɗataa adunaaru saabe neɗɗo katin, sabo ɓernde neɗɗo ina anniyoo ko boni gilla wo cukalel. Mi warataa katin ko wuuri fuu hono ko ngaɗunoomi ɗuum.
22 Haddi leydi na heddii fu,
aawre e tayri,
jaangol e nguli,
ceeɗu e ndunngu,
jemma e nyalooma,
fuu celataa waɗude.