No Nuuhu naatiri Laana mawka kaan
7
1 Joomiraaɗo wi'i Nuuhu:— Naatu laana kaan, aan e koreeji maa fuu, sabo aan tan nji'umi wo ponnditiiɗo e ley jamaanu o. 2 Kooƴaa daabaaji dagiiɗi ɗiin fuu jeɗɗi jeɗɗi, ɗi ngonda e maaɗa, gorel e dewel. Daabaaji ɗi ndagaaki ɗiin du ɗiɗi ɗiɗi, gorel e dewel. 3 Pooli piirooji du jeɗɗi jeɗɗi, gorel e dewel, faa sii majji heddoo e adunaaru. 4 Sabo caggal balɗe jeɗɗi mi tomnan ƴuwoonde e adunaaru balɗe capanɗe nay jemma e nyalooma. Ko wuuri ko tagumi fuu, mi ittan ɗum e adunaaru ndu. 5 Nuuhu waɗi ko Joomiraaɗo yamiri ɗum fuu.
6 Nuuhu ina woodunoo duuɓi keme jeegom nde ilam tuufaanu warannoo e adunaaru ndeen. 7 Nuuhu e jom suudu muuɗum e ɓiɓɓe muuɗum worɓe e deekiraaɓe muɓɓen naati laana kaan faa kisa ilam tuufaanu. 8 Daabaaji dagiiɗi e ɗi dagaaki fuu e pooli e kulle ladooje, 9 fuu naaddi e Nuuhu ley laana kaan. Ɗi naatiri ɗiɗi ɗiɗi, gorel e dewel, hono no Laamɗo yamiri Nuuhu noon.
10 Caggal balɗe jeɗɗi ɗeen, ilam tuufaanu fuɗɗi na yoola adunaaru. 11 Ley hitaande ndeen duuɓi Nuuhu wo keme jeegom (600). Ley lewru ɗiɗaɓurdu e ley nyalooma muuɗum sappo e jeɗɗaɓo, ilduɗe mawɗe cukkitii e adunaaru, julanɗe kammu du cukkitii. 12 Ƴuwoonde toɓiri dow adunaaru balɗe capanɗe nay, jemma e nyalooma. 13 Ley nyalooma oon Nuuhu naati laana kaan, kam e jom suudu muuɗum e ɓiɓɓe muuɗum Saam e Haam e Yaafasu e rewɓe muɓɓen tato. 14 Kamɓe e kulle ladde fuu, ngel fuu e sii muuɗum, daabaaji wuro, ngel fuu e sii muuɗum, ko ladata, ngel fuu e sii muuɗum, pooli, ngel fuu e sii muuɗum, naati laana kaan. 15 Ko tagaa ko foofata fuu, ɗiɗi ɗiɗi muɓɓen naaddi e Nuuhu ley laana kaan. 16 Ɗi fuu ɗi naatiri gorel e dewel no Laamɗo yamiri mo noon. Joomiraaɗo uddani Nuuhu dammbugal laana kaan.
17 Ilam tuufaanu waɗi dow adunaaru nduun balɗe capanɗe nay. Ndiyam ɗaam heewi, ɗam ƴepti laana kaan, ka ƴuwi e leydi. 18 Diyeele ɗeen mawni, ɗe uddi adunaaru, heddii laana kaan ina roya dow majje. 19 Ɗe mawni e adunaaru nduun sanne, ɗe njooli baamle toowɗe fuu. 20 Diyeele ɗeen njooliri baamle ɗeen tooweefi piyanɗe sappo e joy. 21 Ko tagaa ko foofata e adunaaru fuu halki: pooli e daabaaji wuro e kulle ladde e ko ladata e yimɓe fuu.
22 Ko foofirta hinere ko wuuri e adunaaru fuu halki. 23 Laamɗo halki ko wuuri ko woni e adunaaru, ɗum woni yimɓe e daabaaji e ko ladata e pooli fuu. Nuuhu e ɓe wondi ley laana ɓeen tan ndaɗi.
24 Diyeele ɗeen keddii ina cuddi adunaaru faa waɗi balɗe hemre e capanɗe joy.