No yonkiiji yimɓe poti ɓawlude
6
1 Nde yimɓe puɗɗunoo heewude dow adunaaru faa ndimanaa ɓiɓɓe rewɓe ndeen, 2 ɓiɓɓe Laamɗo nji'i no ɓiɓɓe rewɓe ɓeen ŋarɗiri. Ɓe cuɓii ley ɓeen ɓe ɓe njiɗi, ɓe ndewli ɗum'en.3 Ndeen Joomiraaɗo wi'i:
— Ruuhu am heddataako e neɗɗo faa abada, sabo wo o teewu maayoowu tan. Duuɓi makko paltataako hemre e noogay katin.
4 Ley jamaanu oon, e caggal muuɗum fu, yimɓe mawɓe, toowɓe ina ngonnoo ley adunaaru. Sabo ɓiɓɓe Laamɗo kawritii e ɓiɓɓe tagaaɓe rewɓe, ndimdii e muɓɓen. Ɓeen ngoni worɓe jom'en semmbe ɓe inɗe muɓɓen cankitii gilla e jamaanuuji.
Haala ilam tuufaanu
5 Joomiraaɗo yi'i no yonkiiji yimɓe poti ɓawlude ley adunaaru, miilooji bonɗi tan ngoni e ɓerɗe muɓɓen wakkati fuu. 6 Joomiraaɗo mimsiti ko tagi neɗɗo ley adunaaru, ɓernde muuɗum metti. 7 Ndeen o wi'i:
— Mi ittan yimɓe ɓe tagumi ɓeen e adunaaru, kamɓe e daabaaji e kulle ladooje e pooli piirooji fuu, sabo mi mimsitii ko tagumi ɗum fuu.
8 Ammaa Nuuhu kaa heɓi moƴƴere yeeso Joomiraaɗo.
9 Inan kabaaru Nuuhu e ɓiɓɓe muuɗum. Nuuhu wo gorko ponnditiiɗo mo walaa feloore e ley jamaanu muuɗum. O wuuri imo wondi e Laamɗo. 10 O rimi ɓiɓɓe worɓe tato, ɓeen ngoni: Saam e Haam e Yaafasu. 11 Adunaaru nduun boni yeeso Laamɗo, toonya heewi e mayru. 12 Laamɗo ndaari adunaaru, tawi ndu bonii, sabo tagaaɓe fuu mbonnii laabi muɓɓen ley adunaaru nduun. 13 Laamɗo wi'i Nuuhu:
— Timmoode ko tagunoomi fuu yottake, sabo tagaaɓe ɓeen kebbinirii adunaaru ndu nyanngere muɓɓen. Si goonga, mi halkidan ɓe e adunaaru nduun. 14 Kooƴa leɗɗe Gofir, moƴƴinanaa hoore maa laana mawka. Ngaɗaa cuuɗi ley makka, takkiraa ceeki makka ɗiin taari, dow e ley fuu. 15 Inan no moƴƴinirtaa ka:
— Njuuteefi makka laatoo piyanɗe keme tati, njaajeefi makka laatoo piyanɗe capanɗe joy, tooweefi makka du laatoo piyanɗe capanɗe tati. 16 Ngaɗaa feneetere e wecco makka nde njuuteefi muuɗum wo fiyannde wootere. Ngaɗaa dammbugal laana kaan e wecco makka. Ngaɗanaa ka cuuɗi leyiiji e hakkundeeji e dowuuji. 17 Ndaar, miin du, mi waddan ilam tuufaanu e adunaaru faa mi halka ko wuuri ko foofata fuu. Ko woni e adunaaru ndu fuu halkan. 18 Ammaa mi tabintinan amaana am e maaɗa. A naatan laana, aan e ɓiɓɓe maaɗa worɓe e jom suudu maa e esiraaɓe maaɗa rewɓe. 19 Ko wuuri fuu, nannaa ɗum'en ley laana kaan, ɗiɗi ɗiɗi, gorel e dewel faa keddodoo e maaɗa. 20 Pooli e siyiiji muɓɓen, daabaaji e siyiiji muɓɓen, ko ladata fuu e siyiiji muɓɓen, ɗiɗi ɗiɗi ngara to maa faa keddoo, mbuura. 21 Kooƴanaa hoore maa sii neema fuu, ndesaa to maaɗa, faa laatane aan e majji fuu nyaamdu.
22 Nuuhu golliri noon pay, o waɗi ko Laamɗo yamiri ɗum fuu.