Ɓiɓɓe ƴuwɓe e Aadama
5
1 Inan binndi kollooji ƴuuruɓe e Aadama:Nyannde Laamɗo tagunoo neɗɗo ndeen, dow alhaali makko o tagi ɗum. 2 O tagi gorko e debbo, o barkini ɓe. Nyannde ɓe taganoo ndeen o inndiri ɓe «Neɗɗo».
3 Nde Aadama wuurnoo duuɓi hemre e capanɗe tati ndeen, heɓi ɓiɗɗo e dow alhaali muuɗum, nannduɗo e muuɗum. O inndiri oon Siita. 4 Caggal rimeede Siita, Aadama wuuri duuɓi keme jeetati. O rimi ɓiɓɓe worɓe e rewɓe. 5 Duuɓi Aadama fuu wo keme jeenay e capanɗe tati (930), de maayi.
6 Nde Siita wuurnoo duuɓi hemre e joy ndeen, heɓi ɓiɗɗo gorko bi'eteeɗo Enos. 7 Caggal rimeede Enos, Siita wuuri duuɓi keme jeetati e jeɗɗi. O rimi ɓiɓɓe worɓe e rewɓe. 8 Duuɓi Siita fuu wo keme jeenay e sappo e ɗiɗi (912), de maayi.
9 Nde Enos wuurnoo duuɓi capanɗe jeenay ndeen, heɓi ɓiɗɗo gorko bi'eteeɗo Kenan. 10 Caggal rimeede Kenan, Enos wuuri duuɓi keme jeetati e sappo e joy. O rimi ɓiɓɓe worɓe e rewɓe. 11 Duuɓi Enos fuu wo keme jeenay e joy (905), de maayi.
12 Nde Kenan wuurnoo duuɓi capanɗe jeɗɗi ndeen, heɓi ɓiɗɗo gorko bi'eteeɗo Mahalalel. 13 Caggal rimeede Mahalalel, Kenan wuuri duuɓi keme jeetati e capanɗe nay. O rimi ɓiɓɓe worɓe e rewɓe. 14 Duuɓi Kenan fuu wo keme jeenay e sappo (910), de maayi.
15 Nde Mahalalel wuurnoo duuɓi capanɗe jeegom e joy ndeen, heɓi ɓiɗɗo gorko bi'eteeɗo Yared. 16 Duuɓi Mahalalel caggal rimeede Yared wo keme jeetati e capanɗe tati, o rimi ɓiɓɓe worɓe e rewɓe. 17 Duuɓi Mahalalel fuu wo keme jeetati e capanɗe jeenay e joy (895), de maayi.
18 Nde Yared wuurnoo duuɓi hemre e capanɗe jeegom e ɗiɗi ndeen, heɓi ɓiɗɗo gorko bi'eteeɗo Henok. 19 Caggal rimeede Henok, Yared wuuri duuɓi keme jeetati, o rimi worɓe e rewɓe. 20 Duuɓi Yared fuu wo keme jeenay e capanɗe jeegom e ɗiɗi (962), de maayi.
21 Nde Henok wuurnoo duuɓi capanɗe jeegom e joy ndeen, heɓi ɓiɗɗo gorko bi'eteeɗo Matusala. 22 Caggal rimeede Matusala, Henok wuuri duuɓi keme tati, e ley ɗum fuu imo wondi e Laamɗo. O rimi ɓiɓɓe worɓe e rewɓe 23 Duuɓi Henok fuu wo keme tati e capanɗe jeegom e joy (365). 24 Henok wuuri ina wondi e Laamɗo. Caggal ɗuum, o yi'aaka, sabo Laamɗo adii mo.
25 Nde Matusala wuurnoo duuɓi hemre e capanɗe jeetati e jeɗɗi ndeen, heɓi ɓiɗɗo gorko bi'eteeɗo Lamek. 26 Caggal rimeede Lamek, Matusala wuuri duuɓi keme jeɗɗi e capanɗe jeetati e ɗiɗi, o rimi ɓiɓɓe worɓe e rewɓe. 27 Duuɓi Matusala fuu wo keme jeenay e capanɗe jeegom e jeenay (969), de maayi.
28 Nde Lamek wuurnoo ɗuuɓi hemre e capanɗe jeetati e ɗiɗi ndeen, heɓi ɓiɗɗo gorko. 29 O inndiri oon Nuuhua. O wi'i:
— Oon waaltinan hakkillooji meeɗen e ley golleeji men e tampiri juuɗe meeɗen dow leydi ndi Joomiraaɗo huɗi ndiin.
30 Caggal rimeede Nuuhu, Lamek wuurii duuɓi keme joy e capanɗe jeenay e joy. O rimi ɓiɓɓe worɓe e rewɓe. 31 Duuɓi Lamek fuu wo keme jeɗɗi e capanɗe jeɗɗi e jeɗɗi (777), de maayi.
32 Duuɓi Nuuhu wo keme joy, de rimi Saam e Haam e Yaafasu.